Hæ hæ og takk fyrir síðast... mikið um að ske hjá minni

Maggi bróðir búin að vera hjá mér alla vikuna, ég reyndar unnið mikið en hann er svo duglegur að bjarga sér. Reyndar rosa næs að hafa einhvern svona heima hjá sér sem er búinn að vaska upp og svoleiðis þegar maður kemur þreyttur heim úr vinnunni (hmmmm spurning hvort þetta sé eitthvað sem maður ætti að vinna í.....).
Gerði hin undarlegustu kaup í gær.. hvað jú ég keypti nýjan gemsa sem er ekkert óeðlilegt svosem en hann var á tilboði maður borgaði ekkert út og svo er visst mánaðargjald mér leið eins og ég væri að stela, labbaði inn í búð benti á það sem mig langaði í og gekk svo út með það án þess að borga krónu =)
Svo þegar við vorum í strætó á leiðinni heim gerðist svolítið sniðugt (já ég veit þið hugsið Anna Dóra og strætó hvað gerði hún núna!!) að þessu sinni var ég ekki valdur að skemmtiatriðinu heldur miðaldra kona sem brölti inn í vagninn með lága hillusamstæðu já I kid you not ég fór reyndar út á undan kellu en Maggi sá hana brölta út með hilluna og svo stóð hún ein eftir á biðstöðinni, ég vona bara að einhver hafi komið til að sækja hana og hilluna:-S
HVAÐ haldiði Maggi keypti Die hard myndirnar og við horfðum á fyrstu myndina saman og við höfum barasta aldrei séð verri íslenska þýðingu, hér koma nokkur dæmi úr myndinni: hólí sjitt, fokking sjitt, djíses kræst, keyra mig niður = drive me crazy og svona mætti lengi telja. Hvað segið þið, hvað viljið þið gefa þýðandanum í einkun, við ákvaðum að fella hann c",)

Kram
Anna Dóra sem kveður Magga á morgun til þess að geta tekið á móti honum aftur á föstudagskvöld.

Í gær.....

Hjóluðu pabbi og Maggi með Eggerti síðasta áfangann í hringferð hans um landið... Ég er STOLT af þeim
Komu nokkrir langþráðir rigningardropar í Karlskrona
Brutu þrumur himininn og hreinsuðu loftið
Blésu kaldari vindar hér

Í dag.....

Er ég úthvíld eftir að hafa sofið heila nótt án þess að vakna kafnandi úr hita, fyrsta skiptið í 3 vikur
Er ennþá skýjað og gott loft úti
Eru 2 dagar þangað til Maggi kemur

Annars er allt gott að frétta héðan, keyrði til Köben á fimmtudaginn og sótti Guðrúnu, Eirík og Guðfinnu. Ákvað að skella mér í matvöruverslun og kaupa smá vín meðan ég beið eftir þeim og villtist endalaust um götur Kaupmannahafnar, þetta gerði mig ennþá ákveðnari í því að vilja ekki keyra í þar þegar ég gisti eina nótt þegar ég fer að hitta fjölskylduna, NEI það verður fundið bílastæði og bíllinn geymdur þar í öruggri fjarlægð frá einstefnugötum og akgreinum ætluðum strætisvögnum ekki utangátta ferðamönnum.
Bið að heilsa í bili

Anna Dóra sem á einstaklega auðvelt með að villast og keyra vitlaust í Köben
c",)

Sól sól skín á mig..............

Lífið er ljúft, eyddi gærdeginum með Jessicu á ströndinni, legið í sólbaði, kælt sig í vatninu. Rúna við förum pottþétt á þessa strönd þegar þið komið til mín, hún er svo vel búin að þar eru stór tré þannig að maður getur setið í skugga með litla pottorma ef maður vill=) Fórum svo í gærkvöldi með Caroline inn til Ronneby á Tosia Bonndager dæmigerður markaður en gaman engu að síður. Ég og Jessica skelltum okkur í tvö tívolítæki og ég veit ekki hvort þetta sé aldurinn eða eitthvað annað en maginn fór ansi skemmtilega á hvolf og manni var hálf óglatt og leið eins og eftir nokkra bjóra að ferðunum loknum- þið getið rétt ímyndað ykkur hvað það var "gaman" að vita að maður ætti eftir að keyra svo heim!! Stefnan er tekin á Ronneby aftur annaðkvöld í þetta skipti á tónleika Lars Winnerbäck held hann sé nokkurs konar Bubbi hér í Svíþjóð hann er alla vega góður, stendur einn á sviðinu með gítarinn sinn.
Jæja spurning um að skella sér út í góða veðrið, klukkan er 11 og ekki nema 25°C í skugganum I love it
Kram
Anna Dóra I'm loving it

Ég og Svíar erum fallin eins og dómínókubbar fyrir japanskri talnaþraut sem kallast sudoku ekkert smá skemmtilegt. Prófið sjálf á http://www.vnunet.com/spotlight/sudoku og látið svo ljós ykkar skína um hvað ykkur finnst.
Annars er allt gott að frétta héðan, hitabylgja í gangi sem er náttúrulega ekki slæmt, verst að þurfa að vinna og geta ekki bara verið úti. Reyndar er gott að hvíla sólbrennda húðina í vinnunni öðru hvoru og til að leyfa henni að jafna sig=)
Var í fríi í gær og eyddi deginum á ströndinni, er í fríi á morgun og ætla að reyna að kaupa mér skó og svo eyða deginum á ströndinni er svo í fríi um helgina þannig að það er aldrei að vita nema maður kíki á ströndina ;-Þ
Bið að heilsa héðan úr sólinni
Anna Dóra

Svíar og hraðbankar = ekkert nema fyndið

Þegar þið leitið eftir hraðbanka leitið þið þá eftir hraðbanka frá ykkar banka eða takið þið bara næsta sem þið sjáið- ykkur vantaði hvort sem er peninginn? Þegar öllu er á botninn hvolft þá er þetta bara hraðbanki!! Var í búð í dag þegar ég var spurð um hraðbanka (bankomat) og benti manninnum vingjarnlega á að hann hefði nú barasta gengið fram hjá einum slíkum en nei það var minuten- hraðbanki frá öðrum banka. Svíar geta ruglað mann endalaust með mörgum heitum yfir sama hlutinn=)

Til hamingju með daginn Jónas Ásgeir og til hamingju með morgundaginn Ásdís, hlakka til að hitta ykkur ásamt öllum hinum núna í lok júlí ótrúlegt mánuður til stefnu.

Hamingjukveðjur

Anna Dóra

Nú fer að styttast í komu 2ja uppáhalds gauranna minna, Magga bróðir og Harry Potters. Ég er búin að panta nýjustu Harry Potter bókina á netinu og Maggi er búinn að panta flugmiða til mín á netinu=) Áætlaður komutími HP 16. júlí og MJ 19. júlí, alltaf eitthvað til að hlakka til. Eins og í dag nú er einn vinnudagur búinn og bara sex eftir í næsta frídag, lífið er yndislegt sól og gott veður og ég í vinnunni, sólbrenn ekki á meðan. Naut þess einmitt í fríinu mínu í gær að leggjast á ströndina og sleikja sólina, yndislegt.

Sólskinskveðjur
Anna Dóra

Er maður óheppinn eða? Vorum að grínast með skurðprógrammið í morgun, einn sjúklingur, það sem við ætluðum að hafa það náðugt í dag, nei það bara bættust við sjúklingar og við unnum eins og mofo's í allan dag. Maður á ekki að bjóða örlögunum byrginn, maður fær það margfalt tilbaka. Annars er allt gott að frétta af mér, same old same old vinna, borða og sofa, djamma þess á milli =) Mamma á afmæli í dag, til hamingju með daginn mútter Jæja best að borga reikninga og hringja svo í þá gömlu kram Anna Dóra

Draumur á Jónsmessunótt?

Þar sem ég er að vinna núna um helgina þegar Svíar fagna Jónsmessunni/Midsommar ákváðu stelpurnar (Caroline og Jessica) að koma mér á óvart síðasta miðvikudag með Midsommarpartý. Ég hélt að við værum að fara út að labba og var því frekar hissa þegar þær stóðu með síld, ferskar kartöflur, ís, jarðaber og vodkabokkuna fyrir utan dyrnar hjá mér. Þetta voru þær víst búnar að ákveða heima á Íslandi að þær yrðu nú að gera eitthvað skemmtilegt fyrir mig til að þakka fyrir ferðina. Þetta tókst alla vega hrikalega vel hjá þeim. Þær færðu mér meira að segja pakka Hrafninn flýgur og í Skugga hrafnsins. Kvöldið var alla vega hrikalega vel heppnað eftir nokkuð mörg vodkaskot fór ég og Jessica út á lífið kíktum á Piraten og skemmtum okkur alveg konunglega (eins og alltaf) við áttum dansgólfið því karlmennirnir voru eins og bísveipur í kringum blómvönd í kringum okkur. Ekki leiðinlegt.
Kíktum svo frekar tuskulegar á hinn árlega laufmarkað í gær og aldrei þessu vant keypti Anna Dóra ekki neitt á markaðnum, var einhvern veginn ekki í stuði til að versla- jú ég var nú hálflasin
:-S kannski þess vegna sem ég gleymdi líka að bera á mig sólarvörnina og þannig að ég roðnaði ansi duglega á höndum og bringu í sólinni í gær =(
Bið að heilsa í bili spennandi vinna sem bíður alla helgina
kram kram
Anna Dóra sólbrennda

Doris svarar fyrir sig.........

Doris er mjög svo vel meðvituð um að 17. júní er frídagur heima á Íslandi en þar sem Doris er með mjög gott en stutt minni ákvað hún að slá á þráðinn til móðir sinnar áður en hún skellti sér út úr bænum á 17. júní. Þar sem Doris hafði hringt eitt samtal milli þess sem hún sveif um af þjóðernisstolti og samtalinu við móðir sína hvarf úr undirmeðvitundinni vitneskjan um að sá möguleiki væri fyrir hendi að móðir hennar lægi heima sofandi=) Maggi minn hefði getað hringt mikið fyrr en að hringja klukkan 9 er nú ekkert svaðalega snemma um morgun þó svo að maður sé í fríi!!!
Mínum 17. júní eyddi ég með Jessicu, við fórum heim til hennar í sveitina fyrir utan Växjö, ég er nefnilega með bíl í láni frá Guðrúnu og Eiríki, dæmigerður 17. júní rigndi á mig ég veit að það var besti 17. júní síðan 1700 og súrkál heima en ég skemmti mér engu að síður vel, svo fórum við í Picknic í gær og síðan í afmæli til bróðir hennar áður en við keyrðum svo heim.
Jæja ætla að henda mér aftur út í góða veðrið sól og fínt
Doris
P.s Maggi var að velta fyrir mér þegar ég sæki ykkur til Köben eftir rúman mánuð hvort ykkur sé ekki sama um að geyma barasta bílinn á Kastrup, Doris er ekkert alltof spennt fyrir því að keyra inni í Stórborginni og týnast ;-) Bara smá hugmynd!!
kram kram

Rakst á þetta á flakki um netið. Enjoy
Í Ástralíu er bannað að stunda kynlíf með kengúrum auk þess sem bannað er að eiga rúm á ákveðnum stöðum án tilskilinna leyfa. Almennir borgarar mega heldur ekki skipta um ljósaperur. Löggiltir rafvirkjar mega einir gera slíkt. Það fáránlegasta af þessu öllu saman er kannski það að í bænum Victoria er bannað að vera í bleikum stuttbuxum eftir hádegi á sunnudögum.

Í bænum Santa Cruz í Bólivíu er bannað að stunda kynlíf með móður og dóttur á sama tíma.

Kanada íbúum er bannað að stíga um borð í flugvél eftir að hún er farin á loft. Það er líka ólöglegt að fjarlægja plástur og önnur sárabindi opinberlega. Í bæ einum segja lögin enn fremur til um að þegar fangi losnar úr fangelsi skal honum afhent hlaðin byssa ásamt hesti svo hann geti riðið út úr bænum sem fyrst.

Íbúum Calgary er bannað að kasta snjóboltum án þess að hafa sérstakt leyfi frá bæjarstjóra og í Nova Scotia er bannað að vökva garða þegar það rignir. Þar er jafnframt bannað að prumpa á meðan maður reykir en í bænum Oxbridge er bannað að hafa internettengingu sem er öflugri en 56k.
Í Kólumbíska bænum Cali mega konur aðeins stunda kynlíf með eiginmanni sínum og þegar það gerist í fyrsta skipti skal móðir konunnar vera viðstödd.
Enskum konum er bannað að borða súkkulaði í almenningssamgöngutækjum, s.s. lestum og strætisvögnum. Það er líka bannað að borða bökur á jóladag og svo mega eiginmenn alls ekki lemja konur sínar eftir kl. 21 á kvöldin.

Í Frakklandi er bannað að kyssast á járnbrautastöðvum og þarlendir svínabændur mega ekki undir neinum kringumstæðum kalla svínið sitt Napóleon.

Í Indónesíu liggur dauðarefsing við sjálfsfróun.
Ítalskir karlmenn mega ekki ganga um í kjólum. Ef þeir gera það eiga þeir á hættu að verða handteknir. Það er líka bannað að blóta opinberlega og í vissum héröðum mega konur sem heita María ekki stunda vændi.
Í Líbanon mega menn stunda kynlíf með dýrum svo framarlega sem dýrið er kvenkyns. Ef það er karlkyns liggur dauðarefsing við brotinu.

Í Sádí-Arabíu mega karlkyns læknar ekki meðhöndla konur. Lögin segja jafnframt að konur megi ekki gerast læknar. (eiga konurnar þá bara að drepast eða hvað?)

Sviss mega menn ekki pissa standandi eftir kl. 22 og heldur ekki hengja upp þvott utandyra, þvo bíla eða slá gras á sunnudögum. Þá liggja sektir við því að gleyma lyklum í ólæstum bílum.
Í Singapore eru munnmök með öllu ólögleg auk þess sem samkynhneigð er alls ekki leyfð. Ennfremur er allt klám bannað og fólk má ekki ganga um nakið heima hjá sér þar sem það er talið til kláms.

Í Skotlandi segja lögin að ef einhver bankar upp á og biður um að fá að nota klósett þá skal hann fá að gera það ella hljóti húsráðandi sektir.

Í Tælandi er ólöglegt að fara út úr húsi án þess að vera í nærfötum.

Í Alabama er bannað að keyra með bundið fyrir augun og það má heldur ekki sigla bátum á götunum. Það furðulegasta er samt að fólk má ekki vera með vöffluís í rassvasanum!

Íbúum Alaska er mjög umhugað um elgina sína og þar af leiðandi stendur það í lögum að ekki megi láta þá hanga úr flugvél. Það má heldur ekki henda þeim út úr flugvélum eða gefa þeim áfengi.

Asnar mega ekki sofa í baðkörum í Arizona og þar að auki er ólöglegt að hafa fleiri en tvö kynlífshjálpartæki á einu og sama heimilinu.

Í Maricoba County mega svo ekki fleiri en 6 stúlkur búa í sama húsinu.

Í Arkansas eru munnmök bönnuð og ekki má geyma krókódíla í baðkörum. Þar að auki er ólöglegt að bera nafn ríkisins vitlaust fram.

Til að setja upp músagildrur þurfa menn að hafa veiðileyfi í Kaliforníu. Þar hafa páfuglar líka forgang í umferðinni, nema þeir séu á vappi í innkeyrslum fólks.

Í Baldwin Park er bannað að hjóla í sundfötum og sums staðar verða menn að eiga minnst tvær kýr ef þeir ætla að ganga um í kúrekastígvélum.

Þá liggur allt að 500$ sekt við því að nota kjarnorkuvopn innan bæjarmarka Chico og í Los Angeles er bannað að þvo tvö ungbörn í sama baðkarinu. Einnig er bannað að eiga flóðhesta en ef menn ætla út að labba með fílinn sinn verður hann að vera í bandi. Að lokum er bannað að þvo bílinn sinn með nærfötum.

Florida íbúar mega ekki stunda kynlíf með broddgöltum og alls ekki reka við opinberlega eftir kl. 18 á kvöldin. Þá mega ógiftar konur ekki stunda fallhlífarstökk á sunnudögum og það er bannað að fara í sturtu nakinn. Eiginmenn mega heldur ekki kyssa brjóst konu sinnar og þar er líka bannað að syngja á meðan maður er í sundfötum.

Lögreglumenn í connecticut hafa leyfi til að stöðva hjólreiðamenn ef þeir fara yfir 100 km hraða og í bænum Devon er bannað að labba aftur á bak eftir myrkur.

Þegar fólk fer í messu á sunnudögum í Georgiu skal bera hlaðinn rifill á sér og allir íbúar þar skulu minnst eiga eina grashrífu á mann. Þar má heldur ekki binda gíraffann sinn við ljósastaur.

Í bænum Marietta var bannað að hrækja út úr fólksbílum og strætó en það má hrækja ef maður er á vörubíl.

Enn eru lög í gildi í Illinois sem banna fólki að tala ensku og þar liggja líka sektir við að pissa upp í munn nágranna síns.

Chicagobúar hafa heldur ekki leyfi til að veiða í náttfötunum eða gefa hundinum sínum viskí. Hins vegar má fólk undir 17 ára aldri mótmæla nakið fyrir framan ráðhúsið, svo framarlega sem það hefur leyfi foreldra sinna, og dýr geta fengið fangelsisvist eins og fólk. T.d. var api dæmdur í 5 daga fangelsi fyrir búðarhnupl.

Í bænum Oblong er svo stranglega bannað að stunda kynlíf á meðan maður er að veiða á brúðkaupsdaginn sinn og þar eru skrímsli heldur ekki leyfð innan bæjarmarkanna.

Talan Pí er venjulega um 3,14 nema í Indianaríki þar sem hún er skv. lögum 4. Þar er öpum líka bannað að reykja og svörtum köttum er skylt að vera með klukku um hálsinn ef það er föstudagurinn 13.

Í Lowa mega kossar ekki vara lengur en 5 mínútur í senn og einhentir píanóleikarar mega ekki krefjast greiðslu fyrir vinnu sína. Jafnframt er slökkviliðsmönnum skylt að æfa sig í minnst 15 mínútur áður en þeir leggja af stað í brunaútkall og að auki mega hestar ekki borða brunahana.

Hænsnaþjþofar mega ekki stunda ,,vinnu" sína á nóttunni í Kansas en þar er líka bannað að veiða fisk með berum höndum.

Lög í Kentucky segja að maður teljist edrú uns hann stendur ekki lengur í lappirnar og þar er líka skylda að fara í bað einu sinni á ári. Konur mega heldur ekki kaupa hatta án samþykkis eiginmanns síns og ólöglegt er að þiggja endaþarmssamfarir. Þar má heldur ekki binda krókódíla við brunahana.

Í Massachusetts er bannað að borða meira en 3 samlokur í jarðarför og ljón mega ekki fara með eigendum sínum í bíó. Górillur mega heldur ekki sitja í aftursæti bíla.

Hvað dettur þeim í hug næst=)
kramiz
Anna Dóra

Komin heim, Íslandsferðin var alveg meiriháttar skemmtileg og við hefðum barasta ekki getað verið heppnari eins og með veður, rigndi bara síðustu 2 dagana þannig að það eina sem klikkaði var Vestmannaeyja ferðin því það var ekki flogið vegna veðurs. Fórum beint eftir að við lentum í Bláa lónið í þessari líka bongóblíðu og nutum þess að vera til. Kíktum auðvitað út á lífið bæði föstudag og laugardag og stelpurnar sáu fljótt að ég er ósköp eðlileg svona í mínu "rétta" umhverfi þ.e. innan um aðra brjálaða Íslendinga. Ég ætla nú ekki að telja upp allt sem við gerðum en það helsta var ókum hringinn og fórum á hina og þessa staði, ætli við höfum ekki séð meira af landinu á þessum tíma heldur en margur Íslendingurinn hefur gert um ævina. Það sem stendur mest uppúr er fæðing og skírn litla prinsins Hermanns Inga, Snjósleðaferðin upp á Snæfellsjökul, siglingin niður Hvítá, jökulsárlónið er náttúrulega alltaf fallegt og svo auðvitað þegar Charlie's Angels (okkur) var boðið á skotæfingu af ofurlöggunni sjálfri. Þar sem við vorum svo mikið á ferðinni gafst ekki svo mikill tími til þess að hitta vini og ættingja þannig að þið sem ég hitti, gaman að hitta ykkur og þið sem ég náði ekki að hitta, jæja vona að ég hitti ykkur næst.

Þar til næst
Anna Dóra
P.s. að sjálfsögðu gengum við bakvið Seljalandsfoss fyrir Eyjafjallaskvísuna hana Jóu mína.

Tæpur sólarhringur í innrásina frá Karlskrona.....

Ótrúlegt en satt þá er ferðin að bresta á, við erum búnar að tala um þessa ferð frá því í janúar og á morgun er hún orðin að raunveruleika. Það verður svo gaman, er að hugsa um að gefa ykkur forskot á sæluna með smá preview af því sem við ætlum að gera

• Bláa lónið
• Djamm í Reykjavík
• Hvalaskoðun, líklegast frá Reykjavíkurhöfn
• Snjósleðaferð á Snæfellsjökli
• Riverrafting niður Hvítá

Keyra hringinn í kringum landið og ég ætla að reyna að standa mig sem leiðsögumaður að sjálfsögðu með góðri hjálp frá vegahandbókinni. Ef þið eruð með einhverjar hugmyndir ekki vera feimin að fleygja þeim fram.
Sjáumst á morgun
Anna Dóra

Eurovision lokið og Grikkir stóðu uppi sem sigurvegarar með hinni sænsku Helenu í fararbroddi. Sem þýðir að ég hafði rétt fyrir mér, ég spáði henni sigri =) Við hittumst nokkrar skvísur hjá Jessicu í gær og horfðum á keppnina saman og OMG nágranni hennar er í bókstaflegri merkingu UGLY NAKED DUDE nákvæmlega eins og í vinum, einni okkar varð litið út um gluggann og sér þá beint í botninn á eldri kalli sem bara gekk um nakinn og liggur við pósaði fyrir opnum tjöldum ekki fögur sjón.
Viljiði svarið við gátunni? Í raun er ekkert svar til, þetta er spurning sem meðal annars FBI leggur þegar þeir eru að yfirheyra geðsjúka einstaklinga grunaða um morð eða jafnvel fjöldamorð til að sjá hversu sjúkir þeir eru í höfðinu. Þeir sem svara eins og Maggi að fyrst maðurinn kom í jarðaför móðurinnar hljóti að vera einhver tengsl og því allar líkur á að hún hitti hann aftur í jarðaför systur sinnar lenda mjög hátt á lista yfir grunaða.
Maggi minn heldurðu að það sé loksins kominn tími til að leita sér aðstoðar?
4 dagar í innrásina
Anna Dóra

Eurovision á næstu grösum og við ekki með :( Selma stóð sig reyndar mjög vel, það er eins og hún segir landslagið í þessarri keppni er að breytast, hverjum hefði til dæmis dottið í hug að Moldavía hefði komist áfram á ömmu gömlu? Annars horfði ég á keppnina í gær með Jessicu og við höfðum rétt fyrir okkur um 6 af lögunum sem komust áfram, ekki svo slæmt. Nú er bara Heja Sverige á morgun, annars er ég nú barasta frekar hrifin af gríska laginu Number one mikið spilað á útvarpsbylgjunum hér.
Hér er smá gáta!!
Ung kona er við jarðarför móðir sinnar og sér þar myndarlegan mann, augu þeirra mætast og hún finnur fyrir einhverjum straumum. Áður en hún fær tækifæri til þess að gefa sig á tal við manninn er hann horfinn. 2 dögum síðar myrðir þessi sama kona systir sína. Hver var ástæða morðsins?
Jæja skellið nú fram morðástæðu ég skal svo segja ykkur svarið í næstu færslu.
Heja Sverige
Anna Dóra

Á þessum degi fyrir 2 árum hélt ung Reykjavíkurmær út í óvissuna með móðir sinni. Förinni var heitið í skútustaðinn Karlskrona þar sem snótin huggðist vinna í hálft ár. Núna 2 árum síðar er sama Reykjavíkurmær ennþá stödd í Karlskrona og ekkert á leiðinni heim. Einmitt búin að eyða deginum í bænum með Jessicu og svo ætlum við að kíkja út á lífið í kvöld, aðeins að hita upp fyrir Eurovision næstu helgi.
Hérna kemur smá hugleiðing.
Hvað er þetta með óléttar konur og vorin? Þær virðast barasta springa út eins og blómin. Alveg sama hvert ég lít mér finnst ég ofsótt af óléttum konum. Eða eru þær bara sýnilegri á sumrin?
Hvað haldið þið?
Kveðja
Anna Dóra, sem ætlar að hafa það blixterkul í kvöld

Njóli eða......

Varð fyrir því "skemmtilega" óhappi í morgun að sofa yfir mig, vaknaði 10 mín í sjö í morgun og á að vera mætt í vinnunna kl 7:30. Í stresskasti henti ég mér inn í sturtuna, og svo í föt og út. Þar sem ég var nú á frekar mikilli hraðferð greip ég veskið mitt og svo út á hjólið. Hugsaði svo þegar ég hjólaði á milljón í vinnuna hvað ég hlyti að líta skemmtilega út svona á fjallahjóli með handveski!!! Þegar kom svo að hádegismatnum uppgötvaði ég að peningaveskið varð eftir heima á stofuborðinu, en ég var nú svo heppin að Caroline var að vinna og gat bjargað mér um aur fyrir hádegismat.
Jæja er að fara í endurlífgun barna á morgun þannig að best að fara að kíkja aðeins í bók.

Kveðja
Anna Dóra
P.s. Til hamingju með daginn Ásdís

3 vikur í heimkomu!!!
Styttist óðfluga í að við komum og gerum innrás á Íslandi, erum farnar að hlakka ekkert smá mikið til og varla talað um annað en djamm í Reykjavík og hversu ótrúlega skemmtileg þessi ferð eigi eftir að vera.
Fór að hugsa í gær hvort við gætum ekki grætt á túristum eins og Svíarnir gera, ekki það að við græðum ekki á þeim eins og er. Var að frétta af því að Þjóðverjar eru vitlausir í skartgripi unna úr elghægðum jú góðir vinir þið lásuð rétt elghægðum. Spurning um að fara að nýta aðrar afurðir íslenska hestsins sem allir eru svo hrifnir af =) Nei takk ojbjakk, ég hélt það væri verið að gera grín að mér en raunin er að þetta er staðreynd, getiði ímyndað ykkur að vera með hálsmen unnið úr hægðum flaksandi um hálsinn.......
Er annars bara að njóta þess að vera í fríi, 4 daga lúxuslíf á minni.
Bið að heilsa í bili
Anna Dóra

Jæja er fólk búið að skella sér í kröfugöngu?
Í gær var komu vorsins fagnað að sænskum sið. Á Valborgarmessu hittast Svíar, grilla og fara síðan á brennu. Ég grillaði með Huldu, Steina, Guðrúnu og gormunun þeirra í gær og svo löbbuðum við á brennu og hittum Hrafnhildi með sína gorma. Mér finnst þetta svolítið skemmtilegur siður að fagna vorinu. Við "misstum" reyndar af ræðunni og kórnum en bálið var fínt engu að síður. Kíktum svo aðeins til Hrafnhildar á eftir.
Vann í dag fyrstu helgarvaktina mína á svæfingunni og það var barasta ekkert að gera og tíminn þar með frekar lengi að líða en það leið nú samt.
Ætla að fara og kíkja á ræmu, framlag Svía til Óskarsverðlaunanna í fyrra
Síðar
Anna Dóra

Til hamingju með daginn Óli og Snorri, 5 ára hetjur. Þeir eru nú svo æðislegir bræðurnir að þegar þeir voru búnir að opna pakkann frá henni Önnu Dóru vinkonu sinni sögðu þeir "hvernig vissiruðu að það voru svona kallar sem okkur vantaði og langaði í?" Anna Dóra hafði nefnilega keypt legóriddara eftir vísbendingum úr vinnunni hvað væri vinsælt hjá svona gaurum.

Var reyndar helt slut í höfðinu -eins og Svíinn segir- eftir vinnuna í dag af hverju, jú ég var með ofur metnaðarfullan nema sem spurði og spurði og spurði þannig að ég fékk að hugsa extra mikið í dag, reyndar gaman að sjá að maður kann eitthvað. Ég hugsaði reyndar OMG ætli ég hafi líka verið svona nemi því ég veit að ég spurði alveg rosalega mikið. En eins og ég segi líka alltaf maður kemst ekki að neinu án þess að spyrja.

Jæja er að hugsa um að borga reikninga fyrst ég er komin í tölvuna við heyrumst

Anna Dóra

P.s mánuður í heimkomu, auglýsi hér með eftir eiturhressum djömmurum sem væru til í að skella sér í partý og jafn vel út á lífið með mér og Svíunum mínum 27. eða 28. maí

Forvitnin drap köttinn en ekki Önnu Dóru.... alla vega ekki ennþá!

Eins og þið vitið er ég með einsdæmum forvitin og finnst einstaklega gaman að renna yfir einkamáladálkinn í helgarblaðinu, ekki það að ég sé að leita bara að lesa. Það er svo fyndið sem mikið af fólki skrifar. Hvaða konu með einhvern snefil af sjálfsvirðingu myndi til dæmis detta í hug að svara svohljóðandi auglýsingu: Notuð kona óskast, opin, lítur vel út fyrir minn aldur, átt börn og dýr.... Halló hvað er að fólki?
Ef ykkur fannst þessi slæmur hvað finnst ykkur þá um Þennan
Er annars á leiðinni til Uppsala um helgina í afmæli til Óla og Snorra þeir verða 5 ára á mánudaginn, það verður ekkert smá gaman.

Jæja bið að heilsa í bili, best að fara snemma í háttinn svona einu sinni til tilbreytingar safna kröftum fyrir helgina.
Góða nótt
Anna Dóra

Vorið er komið og grundirnar gróa.........

Held það sé kominn tími til að sinna hinum ýmsu vorverkum eins og að fara að taka út hjólið, smyrja á því keðjuna og dæla lofti í dekkin á því og fara að spænast um stræti og torg á ofurfarti, notast ennþá við fótaflið þar til hestöflin koma til sögunnar, er nefnilega að leita mér að bíl ekki vegna minnar þekktu ofurleti heldur þægindanna vegna.
Hvar annars staðar en hér eru dýraverndunarsamtökin ofvirk? Frétt á textavarpinu í morgun um að dýr í búðum sem eru ekki til sölu heldur bara til sýnis eins og gullfiskur einn sem syndir um í skál í gleraugnabúð í Borås eigi að hafa minnst 40 lítra af vatni til að svamla í, einn dökkann vegg á búrinu svo enginn geti horft yfir öxlina á honum og stað til að geta falið sig á. Eigandi viðkomandi búðar var að vonum frekar mikið hissa og sagði að það væri verið að bera búðina hans saman við dýragarð. Halló who cares, grey kallinn sem hefur vorkennt gullfisknum sínum að vera einn heima á daginn og tekið hann með sér í vinnuna og er barasta kenndur við dýragarð í staðinn =) nei ég veit svo sem ekki hvað liggur þarna á bakvið, finnst þetta bara fáránlegt. Hvað finnst ykkur annars?
kramiz
Anna Dóra

Ef það hefur einhvern tíma verið ástæða til þess að leggja bílnum og taka strætó eða hjóla í vinnuna er það núna, af hverju jú Helga Dís er komin með bílpróf GARG............. sem er svosem auðvelt fyrir mig að segja sem hef ekki séð til hennar undir stýri en þið sem þekkið hana og vitið hvernig hún er skiljið mig!!!

Til hamingju með daginn Helga Dís og farðu nú varlega í umferðinni.
Annars á Gísli líka afmæli í dag, til hamingju með kallinn Jóa mín og Kosta átti afmæli síðastliðinn sunnudag, til hamingju með kallinn Ágústa.

Afmæliskveðjur frá Karlskrona
Anna Dóra

Svíi eða................

Skellti mér aðeins út á lífið með Huldu í gær, við kíktum nema hvað á Schlagerbaren og ég komst að því að ég er engu skárri en Svíarnir þegar kemur að Eurovision, ég alveg tryllist þegar Carola verður Fångad av en storvind eða þegar Herreys byrja með sitt diggiloo diggiley ég verð víst bara að horfast í augu við það að ég er Eurovisionfan best að ræða þetta við stelpurnar á eftir og heyra hvernig þeim lítist á eins og eitt stykki Eurovisionpartý þann 21. maí og hvetja hinn sykursæta Martin Stenmark (held hann sé ekki tengdur skíðakappanum þannig að ekkert ojojojojojojoj þegar hann stígur á svið í Kænugarði).
Er með lamb í ofninum og lyktin er að gera mig brjálaða, ég get ekki beðið eftir að fá að borða á eftir, vona bara að stelpunum finnist þetta gott.
Jæja er að hugsa um að búa til súkkulaðimús handa þeim í eftirrétt, þá verður alla vega eitthvað smáræði sem þær geta borðað ef þær falla ekki fyrir lambinu. =)
Hej då
Anna Dóra ofurkokkur c",)

Blogglægð!!!

Jú búin að vera svo þreytt þegar ég kem úr vinnunni að ég hef rétt meikað það á sófann og varla uppúr honum aftur fyrr en það er kominn háttatími. Annars er allt gott af frétta, gengur vel í vinnunni. Ætlum að hittast íslensku stelpurnar í brunch á morgun heima hjá Guðrúnu og svo ætla ég að bjóða Caroline og Jessicu í íslenskan sunnudagsmat, íslenskt lambalæri með tilheyrandi og við ætlum að skipuleggja aðeins fyrir Íslandsferðina sem er farið að styttast í.

Bið að heilsa í bili
Anna Dóra

Maggi vaxdúkka!!!
Þannig var það að Magnús sem var eins og svo oft áður að bíða eftir okkur hinum sem vorum að skoða stjörnurnar á Madam tussaud og stendur alveg grafkyrr (þið sem þekkið hann kannist örugglega við þetta) og svo þegar hann lítur skyndilega til hliðar standa þar tveir menn sem höfðu verið að dást að honum og greinilega að spá í hver hann væri. Nú það þarf nú varla að segja frá því að þegar Maggi leit á þá misstu þeir sig og voru fljótir að láta sig hverfa, ætluðu ekki að láta alla sjá að þeir hefðu ruglast á vaxdúkku og lifandi manni. Ef ég hefði tekið eftir þessum mönnum starandi á bróðir minn hefði ég líklegast stillt mér upp við hliðina á honum og látið taka mynd af okkur saman aldrei að vita nema maður hefði soðið saman einhverja lygasögu um að hann væri frækinn fótboltakappi eða eitthvað þaðan af betra :-)
Þið báðuð um skýringu og hér fenguð þið hana, persónulega fannst mér þetta eitt af því besta sem gerðist í London ég er þvílíkt búin að hlæja að þessu.
Heilsur
Anna Dóra

Jæja þá er maður kominn heim aftur- þið vitið hvað þeir segja fínt að fara í burtu en heima er best.
Londonarferðin var æðisleg gott veður, yndislegt bara að vera léttklæddur úti og ekkert stress. Hér fáiði smá innsýn í það sem við gerðum
* Skoðuðum Kensington höllina þar sem Díana bjó
* Löbbuðum að Stanford Bridge heimavelli Chelsa
* Fórum í rútuferð með leiðsögumanni um London- mæli með því
* Fórum í smá siglingu á Thames ánni, ekkert nema frábært
*Fórum í London eye- risa parísarhjól á bökkum Thamesárannir og sáum yfir stóran hluta borgarinnar, var reyndar að spá hvort Bretar væru making mockery af Frökkum með því að vera með svona risaparísarhjól í London?
* Fórum á markað í Campden sem mér fannst gaman en Maggi og pabbi voru á því að ég væri að draga þá inn á sögusvið Olivers Tvist þ.e. vasaþjófar útum allt.
* Fórum á Lion King söngleikinn sem var barasta æðislegur
* Fórum á Madam Tussaud og þar var Maggi tekinn í misgripum fyrir vaxdúkku, annaðhvort er hann svona gervilegur eða dúkkurnar svona raunverulegar

Annars hefðuð þið átt sjá hótelherbergið mitt, eina herbergið á hæðinni, inngangurinn að hurðinni var eins og frímerki þannig að ég þakkaði nú fyrir að vera ekki mikið stærri en ég er!!!
Þannig að ég skildi betur af hverju galdraskólinn í Harry Potter er svona skrýtinn eins og hann er.
Annars er Maggi hetja ferðarinnar, við fórum á Pakistanskan veitingastað og Maggi sem aldrei þessu vant var ekki mjög svangur pantaði sér þessa líka girnilegu grænmetissúpu sem var hrikalega græn og full af baunum og vitiði hvað hann kláraði hana- vel upp alinn drengur þar á ferð.
Jæja vona að ég hafi ekki gleymt miklu bið að heilsa í bili
Desperate housewifes að byrja
Anna Dóra

Ég held að það sé eins gott að það séu að koma páskar og ég fái smá frí. Var eitthvað svo þreytt og utanvið mig þegar ég kom heim úr vinnunni að í staðinn fyrir að slá inn 4 stafa kódann fyrir hurðina sló ég inn pin-númerið á debetkortinu mínu og skildi ekkert af hverju hurðin opnaðist ekki ;-)
Annars er allt gott að frétta af mér, ég held að vorið sé að reyna að brjótast fram, snjórinn er byrjaður að bráðna, íkornarnir að skoppa og svo er sól og ágætisveður á daginn, reyndar morgunfrost ennþá en það fer hlýnandi.
Bið að heilsa í bili
Anna Dóra

Ef maður ætlar að keyra fullur er alveg eins gott að gera það almennilega!!
Á forsíðu BLT í morgun var skrifað um konu sem var að keyra drukkin, ekki nóg með að hún var með 3,11 prómill í blóði þá var hún með eina svona 3ja lítra belju milli fótanna og drakk meðan hún keyrði. Lögreglan þurfti víst að styðja konugreyið út úr bílnum sem ber við minnisleysi um atburðinn.

Þetta er ekki brandari heldur satt, ég hélt ég yrði ekki eldri en þetta gerðist víst.
Annars allt í góðu, sófinn ekkert smá þægilegur og ég er svo ánægð.
Kramiz
Anna Dóra

Nýji fíni sófinn minn 

Jæja finnst ykkur ekki nýji sófinn minn glæsilegur? Elsku Sigrún til hamingju með afmælið þitt í gær og bílprófið. Ætlaði bara aðeins að monta mig kramiz Anna Dóra

Til hamingju með daginn strákar!!!

Jú 2 frændur mínir voru að komast í fullorðinna manna tölu eins og það var nú kallað og er kannski enn, þeir voru fermdir í morgun. Ég bakaði meira að segja köku í tilefni dagsins. Guðrún og Eiríkur komu og sóttu nýju svefnsófana sína í dag og ég bauð þeim svo í kaffi á eftir. Það bergmálar aðeins í stofunni minni núna en nýji sófinn kemur á morgun JIBBÝ vona bara að ég fái að fara aðeins fyrr heim úr vinnunni til þess að geta tekið á móti honum en annars ætlar hún Carro vinkona mín að hleypa mönnunum inn þannig að sófann fæ ég hvort sem það er ég eða hún sem tekur á móti honum.

Bið að heilsa í bili
Anna Dóra

Ég enn á lífi þrátt fyrir mikið stress!!!

Skrýtið þetta með stress. Þó svo að hafi unnið sjálfstætt síðustu 7 vikur þá vissi ég alltaf að það var einhver vanur sem stóð á bakvið mig. Núna er einhvern veginn bara að hringja á svæfingalækninn ef það er eitthvað vesen og treysta á sjálfan sig. Get sagt ykkur það svona í trúnaði að aðfaranótt mánudags svaf ég frekar illa og var alltaf að vakna upp gæti verið að ég hafi verið farin að kvíða fyrir mánudeginum?

Að öðru leyti er allt gott að frétta, ég er farin að hlakka til páskanna, helgarferð til London ekki bagalegt, mér finnst ég þurfa á smá tilbreytingu að halda þessa dagana.

Bið að heilsa í bili
kramiz
Anna Dóra

Jeminn haldiði ekki að maður sé orðinn semi-þekktur ekki bara í Karlskrona heldur í öllu Blekinge :-)

Þegar ég var í verknáminu fyrir jól kom mogginn og var að fylgjast með aðgerð þar sem ég var að aðstoða við að svæfa og í morgun birtist þessi hérna í mogganum.


Svo maður vitni nú aðeins í félaga sína Stuðmenn:
Já hún er engin venjuleg kona og hún býr í litla Karlskrona og hún er alveg ofboðslega frægur hún fékk myndina af sér í BLT ...........

Þessi hálf-þekkta í Karlskrona
Anna Dóra semi-kändis

Stelpan á leiðinni til London!!!

Jú þið lásuð rétt, stelpan er á leiðinni til London og ætlar að vera flott á því. Fer á skírdag eftir vinnu niður til Köben og gisti eina nótt og tek svo flugið snemma á föstudagsmorgninum til London þar sem ég ætla að hitta mömmu, pabba, Magga og Helgu Dís og vera með þeim yfir helgina og fljúga svo heim á annan í páskum. Ekki bagalegir páskar þetta eller hur.
Í dag var síðasti dagurinn í aðlögun í vinnunni þannig að á mánudaginn er það Anna Dóra sem ræður, handleiðarinn minn var nú svo sæt og hringdi í mig áðan (hún var úti með sjúkrabílnum þegar ég fór heim) og var bara að spá hvernig þetta legðist nú í mig og aðeins að gefa mér góð ráð- það væri ég sem stjórnaði ekki sjúkraliðarnir en hún sagðist hafa verið svipuð þegar hún byrjaði að þegar svæfingalæknirinn sér um að svæfa þá eigi ég ekki að bakka og hleypa sjúkraliðunum framfyrir mig en vissar hafa þann leiða óvana að halda að þær séu barasta svæfingalæknar held ég því þær hafa unnið í 30 ár á svæfingunni. Nei nú er bara að standa föst fyrir og sýna þeim að núna er það víkingurinn sem ræður.

kram, kram
Anna Dóra

Þetta vekur mann til umhugsunar

• Ef að ristað brauð með smjöri lendir alltaf með smjörhliðina niður og kettir lenda alltaf á fótunum, hvað ætli myndi gerast ef maður festir ristað brauð með smjöri á bakið á ketti og sleppir honum svo?
• Nonni litli fékk sögubók í gjöf frá ömmu sinni. Þakka þér kærlega fyrir amma mín, segir hann og er svakalega kurteis. O það var ekkert svarar amma. Þá snéri Nonni sér að mömmu sinni og sagði, hvað var það sem ég sagði, maður þarf ekki að þakka fyrir svona drasl.........

Annars allt í góðu

Anna Dóra

Halló halló

Hvað er það besta við að fá útborgað- jú mikið rétt að eyða peningunum. Fór í dag með Huldu og Guðrúnu í MIO sem er húsgagnaverslun hérna rétt hjá og viti menn mér tókst að eyða nokkrum þúsundköllum, keypti mér nýjan sófa, svaðalega fínan hornsófa sem er blásvartur, set kannski mynd af honum hérna þegar ég verð búin að fá hann.
Annars er allt það besta að frétta héðan úr snjónum í Karlskrona, Svíarnir eru nú reyndar alveg að gefast upp á snjónum og farnir að lengja eftir vorinu- eins og við öll held ég barasta. Annars eru bókaútsölur í fullum gangi núna og ég keypti 2 bækur sem heita því skemmtilega nafni dassboken, salernisbókin á góðri íslensku, þetta eru svona litlar bækur með stuttum skemmtisögum gerðar til að hafa á salerninu svo fólk geti stytt sér stundir við að gera stykkin sín =) Maggi minn ég er semsagt búin að kaupa lestrarefni svo þú getir æft þig í sænskunni næst þegar þú kemur í heimsókn c",)
Jæja best að fara og elda mér mat svo ég verði búin að borða þegar melodifestivalen byrjar í kvöld, 3ja undankeppni fyrir evróvisíón
Det gör ont .........
Anna Dóra

Risin úr rekkju og farin að vinna

Jú jú tók ekki nema viku að hrista af sér flensuna, mætti tvíefld í vinnuna í morgun þ.e. ef þið kallið löðursveitt eftir 10 mín göngu tvíefld. Nei nei annars gekk dagurinn barasta mjög vel, bara 2 sjúklingar og svo námskeið eftir hádegið er hægt að biðja um betri fyrsta dag eftir flensu, nei ég held barasta ekki.
Annars er allt á kafi í snjó hérna hjá okkur, ótrúlegt en satt þá er snjórinn búinn að sitja í rúmar 2 vikur, gerist ekki oft hérna enda Svíarnir alveg í vandræðum með að keyra bílana sína í svona ófærð =)
Á í vandræðum með msn-ið hjá mér, þeir barasta vilja ekki skrá mig inn þannig að ég hef ekki verið online síðan ég veit ekki hvenær, vona að mér verði fyrirgefið, smá tæknileg vandræði sem ég er að reyna að yfirstíga.
Gerði annars hrikalega uppgötvun í dag, hef bara næstu viku með handleiðaranum mínum og svo er barasta vesgú og spís að standa á eigin fótum engar hækjur eða hjálpargögn nei nei auðvitað er maður aldrei einn það er bara eitt stórt skref sem skilur mig frá hinum svæfingahjúkkunum.
Kramiz
Anna Dóra

Hiti, hor og hósti!!

Glæsilegur titill en um þetta hefur líf mitt snúist frá því á föstudag, jú flensan hefur slegið fæti sínum niður á Snapphaneväg og fyrst að Anna Dóra hefur ekki fengið flensuna síðan hún man ekki hvenær ákvað flensan að gera sig heimakæra. Ef ég er ekki að deyja úr hita eða svita þá eru það kölduköst sem ráðast á mig, þetta er skelfilegt ástand. Ennþá verra fannst mér þegar ég kláraði panodilið mitt að þurfa að hringja í Caroline í vinnuna og biðja hana að koma við í apótekinu á leiðinni heim =( En svo fór ég að hugsa hversu gott það er að eiga góða vini sem hugsa um mann þegar maður er lasinn, það er til fullt af fólki sem á engan að. Reyndar sakna ég þess að hafa ekki mömmu til að stjana í kringum mig, það svona einhvern veginn tilheyrir í veikindum.

Jæja kveð í bili úr flensubælinu
Anna Dóra

HINIR UMHVERFISVÆNU SVÍAR = DREPFYNDIÐ

Jú öll vitum við hversu umhverfisvænir (miljövänliga) frændur okkar Svíarnir eru en það sem ég las í blöðunum um helgina slær eiginlega botninn úr tunnunni. Það er ólöglegt að þrífa bílinn sinn heima á planinu, þetta er einhver ný umhverfisstefna þar sem hætta er á að eiturefnin í sápunni og tjöruhreinsinum blandist grunnvatninu besta er að þrífa bílinn á þesstilgerðum þvottaplönum (sem hafa væntanlega eigið afrennsli) eða á bílaþvottastöð. Ef þú endilega vilt þrífa bílinn heima skal það gerast á malar- eða grasbletti þar sem er minni hætta á að óhreina sápublandaða vatnið blandist grunnvatninu!!! Sektir við umhverfisbrotum geta verið frá nokkrum mánuðum til 2 árum í fangelsi. Þeir pólitíkusar sem stóðu á bak við þessa frétt viðurkenndu nú að það væri mjög erfitt að fylgja þessu eftir þar sem það væri nú ekki hægt að fylgjast með öllum í einu (döööö) =)
Jæja bið að heilsa frá þessu umhverfisvæna landi
Anna Dóra, laus við þessar áhyggjur í bili

Mikið svaðalega finnst mér ég hafa verið dugleg að púsla takið eftir að það er ekki bein umgjörð. Versta var eiginlega að miðað við hvað það tók langan tíma að koma þessu saman þá tók það 2 mínútur að setja það ofaní kassa aftur =( Annars allt í góðu, bauð Guðrúnu og Eiríki í bollukaffi áðan (betra seint en aldrei) þar sem mánudagurinn fór í stórþvott og þetta er alltaf jafn gott get ég sagt ykkur. Jæja bið að heilsa í bili Anna Dóra

Sjáið hvað ég var dugleg!!!

Halló halló hvað segist þá?

Með hjálp Jóhönnu vinkonu minnar er komið nafn á svona gleymið fólk eins og okkur tvær og hvað er það annað en Doris (skemmtilegi fiskurinn úr Nemó sem skortir skammtímaminni!!) Jú Jóa er algjör Doris en mér finnst eiginlega betra að það sé til nafn yfir okkur. Ef ég deili með ykkur því helsta sem Doris hefur gert síðustu daga:

- Gleymdi húslyklunum hangandi í skáphurðinni í vinnunni og uppgötvaði það þegar hún kom heim 3 klst síðar
- Gleymdi að panta leigubíl á flugvöllinn síðasta föstudag og rétt náði flugrútunni
- Gleymdi dagbókinni sinni hjá hinni Doris
- Gleymdi að panta þvottahúsið og bauð sér því í heimsókn til Guðrúnar og Eiríks í gær með óhreina þvottinn sinn
- Gleymdi næstum því öllu sem hún þurfti að hafa með sér inni á skurðstofunni í dag þannig að greyið sem stóð á bak við hana fékk að stjana aðeins í kringum hana!!

Annars var æðislega gaman hjá mér um helgina þið getið rétt ímyndað ykkur það Doris og Doris saman, getur ekki annað en verið bara frábært.
Núna er svo ný vinnuvika tekin við sem endar á föstudaginn með því að SVÆFINGAMAFÍAN (dídídí dumm) ætlar að skella sér í Laser tag og aldrei að vita hvað áframhaldið verður
Verði ykkur saltkjötið að góðu
Kabúmm frá Karlskrona
Anna Dóra ekki sprengsödd af saltkjöti heldur pasta

Halló halló jæja ég er loksins búin að koma upp myndaalbúminu frá óvæntu heimsókninni sem ég fékk og það heitir jú Surprise!!!
Annars er allt gott að frétta ekki mikið um að ske þessa dagana vinna, borða, sofa.... þið kannist við þetta. Ætla að skella mér til Jóhönnu, Gísla og gormanna næstu helgi og hlakka ekkert smá til að hitta þau, orðið alltof langt síðan síðast. Við keyptum líka ferð heim í sumar í vikunni, núna er þetta ákveðið, ég Caroline og Jessica komum 26. maí til 9. júní og ég ætla að byrja á að sýna þeim íslenskt næturlíf í Reykjavík og svo ætlum við að ferðast hringinn í kringum landið þetta verður ekkert smá skemmtilegt.
Smá afmæliskveðjur í lokin: Harpa og Unnur urðu 6 ára síðasta miðvikudag og á morgun verður Guðfinna Ósk 3ja ára til hamingju skottur
Bið að heilsa í bili
Anna Dóra

Jú ég er enn á lífi en varla mikið meira en það.....

Lifði fyrstu vinnuvikuna af og þurfti satt að segja bæði laugardag og sunnudag til þess að jafna mig, ótrúlegt hvað maður er þreyttur þegar maður byrjar að vinna á nýjum stað því það er svo mikið um að ske og að sjálfsögðu tímir maður ekki að missa af neinu!!! En það gengur vel í vinnunni, ég hef reyndar fengið illkvittnisaugnaráð frá barnafólki þegar ég segist vakna hálfsjö en er samt mætt hálfátta, en svona er það þegar maður hefur bara sjálfan sig að hugsa um og ég nýt þess í ræmur =)
Er byrjuð að setja inn myndir frá óvæntu heimsókninni sem ég fékk og hugsa að það taki smá tíma sökum þreytu hjá undirritaðri.
Jæja bið að heilsa í bili
Anna Dóra

Ótrúlegt heil vika er liðin!!!
Þið kannist við orðatiltækið þröngt mega sáttir sitja jæja það átti nú ansi vel við síðastliðna viku, sem betur fer semur fjölskyldunni mjög vel saman því annars hugsa ég að það hefði legið við stórslysi. Mamma, pabbi og Halldór Óskar yfirtóku svefnherbergið mitt og ég, Rúna og Maggi sváfum í stofunni (það hefur nú barasta ekki gerst að við systkinin höfum sofið svona saman síðan við vorum lítil í sumarbústað í Svartagili hjá ömmu og afa). Alla vega gekk þetta hrikalega vel, svo er líka svo gott að fá svona laghentan pabba í heimsókn, pabbi setti upp fyrir mig gardínur, hann og Maggi hjálpuðust svo að við að setja upp nýtt ljós í stofuna hjá mér og Maggi skrúfaði saman hægindastólinn sem ég fékk í útskriftargjöf frá fjölskyldunni.
Ég segi barasta takk fyrir komuna
Anna Dóra, að reyna að venjast þögninni sem varð allt í einu ríkjandi á Snapphaneväg

Já Maggi kom mér aldeilis á óvart í dag. Hringir í mig og biður mig að koma á móti sér úr lestinni sem ég geri. Svo komum við heim og erum barasta að spjalla þegar dyrabjallan hringir og ég sem gerði eiginlega ráð fyrir nágrannanum fékk fyrir hjartað þegar í stigaganginum standa MAMMA, PABBI, RÚNA OG HALLDÓR ÓSKAR. Þetta voru samantekin ráð hjá þeim að koma mér á óvart á útskriftardeginum og ég get sagt ykkur að það tókst núna 4 klst síðar er ég enn að átta mig á þessu.

Ein í sjokki

Það var aldrei að stjörnuspáin mín átti vel við:
"Getur verið að þú gerir skrýtin innkaup fyrir heimilið. Fjölskyldumeðlimur kemur þér kannski á óvart á einhvern hátt" Ok scary Maggi bróðir kemur í dag í þessum skrifuðu orðum situr hann í flugvélinni. Hann er búinn að vera að tala um útskriftargjöf sem enginn annar veit hvað er hmmmmm hvað finnst ykkur er þetta tilviljun eða hvað?

Kveðja
Anna Dóra stjörnuspekingur

Á morgun gerist það.......
Síðasti skóladagurinn og ég get farið að kalla sjálfa mig svæfingahjúkku ótrúlegt en satt þá er árið liðið og ég er nýkomin heim frá síðasta skóladeginum mínum vonandi það sem eftir er!!!
Á morgun förum við svo saman úr að borða hópurinn, mér finnst nú reyndar svolítið sorglegt að hætta í skólanum því við erum öll að fara hvert í sína áttina og ég og Guðrún erum þær einu sem verðum að vinna hér í Karlskrona en svona er víst lífið. Eftir að ég hef kvatt fólkið á morgun kemur Maggi bróðir og við ætlum að slaka á í viku áður en alvara lífsins tekur við, jú ég þarf víst að byrja að vinna fyrir mér eins og svo margur annar. 19. janúar verður fyrsti vinnudagurinn (af mörgum) og ég er bæði spennt að takast á við þennan nýja kafla í lífi mínu sem svæfingahjúkka en einnig liggur pínu ótti þarna á bakvið- nú er að duga eða dr......
Einu langar mig að deila með ykkur; ég var skotin niður í skólanum í dag, ég var nefnilega ósammála kennaranum í umræðum sem við áttum og sagðist vera Egóisti því mér finnst ég svolítið sjálfsmiðuð en þá var bara baulað úr öllum hornum að ég væri nú ein af þeim minnst sjálfsmiðuðu manneskjum sem þau hefðu hitt og öll mín framkoma benti á allt annað en egóista, það er þó eitthvað jákvætt við mig!!!
kveðja
Anna Dóra svæfingarhjúkrunarfræðingur (þvílíkur tungubrjótur)

5 dagar bæði í að Maggi komi og að skólinn klári =)
Var að klára að setja inn myndir frá jólafríinu mínu þannig að ef þið hafið áhuga þá er þar brot af því besta=)
Er boðin í mat til Guðrúnar og Eiríks í kvöld, ætlum að kveðja jólin saman þó svo að það sé einum degi of seint en eins og spekingurinn sagði: "Betra er seint en aldrei"
Annars á Helga frænka mín afmæli í dag, látum aldur liggja milli línanna og jólaboð fjölskyldunnar verður í kvöld, góða skemmtun gott fólk ég hugsa til ykkar.

Jæja ætla að skella saman nokkrum glærum svo ég geti haldið kynningu á verkefninu mínu næsta mánudag
Anna Dóra

Ótrúlegt en satt þá á ég bara 3 daga eftir í skólanum og síðasta daginn ætlum við bara út að borða saman, ekkert smá spennandi.
Annars er allt við það sama hér, allt í góðu gengi, á bara eftir að kynna eitt verkefni búin að ná öllu öðru.
En svo styttist í að Maggi bróðir komi bara vika í kappann. Hann ætlar að vera í viku hjá mér og ég get sagt ykkur það strax að lífinu verður tekið létt, ætlum reyndar að kíkja út á lífið í tilefni skólaslita minna að sjálfsögðu setjum við það mikinn svip á bæinn að um annað verður ekki rætt næstu árin =)
Annars eignaðust Íris og Kalli strák á gamlársdag, innilega til hamingju
Kveðja í bili
Anna Dóra
P.s ætla að setja inn myndir úr jólafríinu mínu við tækifæri, kannski í kvöld, kannski á morgun

Nú er enn eitt árið að verða liðið- ótrúlegt hvað þetta líður hratt.
Ætla að deila með ykkur stjörnuspánni minni fyrir árið 2005, það verður gaman að sjá hversu mikið er til í því sem stjörnuspekingarnir segja
Það var stundum eins og þú værir í rússíbanaferð á árinu sem er að líða. Stundum var eins og verið væri að sjóða þig í olíu en einnig eins og hunangi væri dreypt yfir þig. Tilgangurinn hefur örugglega verið sá að láta þig komast að því að enginn verður óbarinn biskup. Reiknaðu með að upphaf komandi árs verði í svipuðum dúr. Heilsan mun batna verulega á árinu sem er að ganga í garð og efnahagurinn mun verða góður eins og áður. Ástarmálin voru í nokkurri kyrrstöðu á árinu en nú virðast mikilvægar breytingar vera í aðsigi. Þú munt verða látin axla meiri ábyrgð í vinnunni. En þótt þú verðir metnaðarfull mestan hluta ársins meturðu tillfinningajafnvægið meira en árangur í starfi.
Þar hef ég það, vona nú að þetta með ástarmálin rætist einnig að efnahagurinn verði góður en er hægt annað þegar maður hefur verið í námi og er að byrja að vinna aftur=)
Gleðilegt ár
Anna Dóra

Tíminn líður hratt á gervihnattaöld......................
Alveg er þetta ótrúlegt ég er búin að vera heima í næstum því viku og finnst það bara vera eins og 2 dagar það er eins og Icy söng hér forðum tíminn líður hratt á gervihnattaöld.
Garg garg og aftur garg, eins og ég hef sagt ykkur áður er ekkert ákveðið í þessum blessaða skóla mínum allt bara undir skipulagi. Var búin að fá stundaskrá fyrir síðustu 2 vikurnar og hvað og hvað fæ tölvupóst í morgun þar sem er búið að breyta stundaskránni og verkefnið sem við áttum að kynna 4-5. jan eigum við að kynna 3. jan og ég sem kem heim 2. jan. Ég og Guðrún erum semsagt í fjarsambandi að vinna þetta blessaða verkefni til að geta skilað því. Við erum þó duglegri en flestir (nema hvað) því við vorum langt komnar með verkefnið, fæstir voru byrjaðir fyrir jól.
Jæja best að hætta þessu bulli, Guðrún bíður á msn-inu óþreyjufull að geta hafið verkefnavinnuna =)
Kveðja í bili
Anna Dóra

Gleðileg Jól allir saman.
Takk fyrir allar jólakveðjurnar og gjafirnar ég ætla nú ekki að fara að telja upp það sem ég fékk en það kom sér allt mjög vel. Ég komst að lokum heim, var frekar smeyk við veðurspána en það var búist við óveðri í suður-Svíþjóð sem varð ekki svo mikið úr. Svo þegar ég var sest upp í vélina ánægð með lífið bara 3 klst í heimkomuna fékk ég blauta tusku í andlitið, áætlaður flugtími 3 klst og 45 mín vegna gífurlegs mótvinds, þetta voru með lengri 45 mín sem ég hef upplifað. En ég var nú reyndar fljót að gleyma þeim þegar ég sá hver kom og sótti mig, haldiði ekki að Rúna og Halldór Óskar hafi komið með Magga að sækja mig. Á Þorláksmessu vék drengurinn ekki frá mér, hann var svo glaður að besta frænkan væri komin heim.
Jólakveðja úr frostinu á Íslandi, ekki nema -12 þegar ég kom en hlýnandi bara -4 í dag.
Anna Dóra

Jólafrí ó jólafrí tralalalalalalala

Jæja þá er maður kominn í langþráð jólafrí og í fyrsta skipti ætla ég bara að slaka á, engin vinna bara að njóta þess að vera til og hitta vini og ættingja. Prófið í morgun gekk held ég barasta ágætlega, við vorum 4 í hóp sem ræddum 2 tilfelli sem geta komið upp við svæfingar og skiluðum inn sameiginlegu svari.
En á morgun gerist það, tek lestina héðan klukkan 13:30 og svo á ég flug klukkan 20 frá kastrup og verð lent heima um 22 hrikalega hlakka ég til. Ef einhver vill ná sambandi við mig er annaðhvort að hringja heim til mömmu og pabba eða gsm-inn minn +46(0)708319753 =)

Hlakka til að sjá alla

Jólakveðja

Anna Dóra

Nú styttist í það bara 1,5 klst í fyrra prófið og ég er orðin mettuð, núna ætla ég bara að reyna að slaka aðeins á og einbeita mér að öndunaræfingum =) Annars gleðifréttir það er snjór úti, fyrsti snjórinn í Karlskrona á þessum vetri, ég er búin að bíða svo lengi eftir að fá smá snjó að þetta hlýtur að vera gott merki fyrir mig að hann komi þegar ég er að fara í próf=) Jæja anda svo rólega inn um nefið og út um munninn og hugsa jákvætt ÞÚ GETUR ÞETTA 2ja daga heimkomukveðja Anna Dóra prófkvíðakerling

Á til með að deila með ykkur smá jólasveinabröndurum sem ég heyrði í gær bara svona í tilefni þess að það eru að koma jól. Vitiði af hverju jólasveinninn á engin börn.............. jú hann kemur bara einu sinni á ári Vitiði af hverju jólasveininn á engin börn................. jú hann kemur bara í skorsteininn Thí hí hí 5 daga heimkomukveðja Anna Dóra að komast í jólaskap en verður fyrst að klára próflestur

Fallinn með 4,9 Nei nei að sjálfsögðu ekki, nema hvað þá stóðst ég verknámshluta námsins með sóma. Það sem handleiðararnir sögðu að ég þyrfti að bæta en það væri eitthvað sem kæmi að vera aðeins ákveðnari og svo þyrfti ég að byggja upp þykkari skráp gagnvart sjúkraliðunum því margar þeirra hafa unnið þarna í 30 ár og reyna að stjórna nýju starfsfólki eins og þær mögulega geta. En að öðru leiti var allt hið besta. Þá er bara að einbeita sér að næsta hluta þ.e. prófunum. Jæja 7 daga heimkomukveðja Anna Dóra

Þið sem eruð eins og ég í stöðugri baráttu við aukakílóin eins og ég þá vil ég meina að aukakílóin fara ekki að verða vandamál fyrr en við verðum SVONA eða hvað finnst ykkur.

Kramiz

Anna Dóra

Vika í próf og ég held ég sé að verða búin að læra yfir mig. Nei nei en greinilegt merki um það sem er efst í mínum huga þessa dagana er að í nótt dreymdi mig að ég var að svæfa kennarann minn og þar sem hlutirnir gengu ekki nógu vel þá bara gerði hann sér lítið fyrir og vaknaði til að leiðbeina mér =) Annars gengur allt vel og ég er að undirstinga handleiðarana mína fyrir góða einkunn. Jæja best að snúa sér að skólabókunum 9 daga heimkomukveðja Anna Dóra

Hvað er að okkur konum? Fór í gær í bíó að sjá vinkonu okkar allra Bridget Jones sem var hin ágætasta skemmtun. Á leiðinni heim vorum við einmitt að tala um að það sorglega við þessa mynd er að það leynist lítil Bridget í öllu kvenfólki, eitt á ég til dæmis sameiginlegt með Bridget og það er "very bad hairday" allt árið =) Annað sem við vorum að velta okkur uppúr er af hverju föllum við alltaf fyrir Daniel Cleaver týpunum þegar við þráum að hitta Mr. Darcy. Smá vangaveltur um lífið og tilveruna hér í Karlskrona. Annars er bara rúm vika í prófin =( og lokadómur um frammistöðu mína í verknáminu fellur næsta miðvikudag=S þannig að það er eins gott að fara að snúa sér að bókunum og hugsa fallega til handleiðaranna. Þetta er Anna Jones á barmi örvæntingar

Rakst á þetta á vefnum!! Fyndið að það sé að sé hægt að meta hver maður er á nafninu manns. Endilega prófið:) og látið mig vita hvernig þið eruð!!!:)

Whats does your personality rate from 1-10? by morning_prayer
Your first full name
Your personality rates a	nine =)
your best quality is	people envy you
your worst quality is	youre too sweet
this is because	you were always this way
Quiz created with MemeGen!

Haldiiði ekki að ég hafi "eignast" barn í dag. Lilja vinkona eignaðist dóttir í morgun og gekk bara mjög vel. Núna get ég loksins andað rólega, er nefnilega búin að hugsa mikið til hennar síðustu daga. Vildi bara deila þessu með ykkur. Anna Dóra skáfrænka í 5ta lið

Það versta við að vera í skóla er að þurfa að fara í próf!! Nú styttist óðum í prófin bara 2 vikur og Anna Dóra er farin að finna fyrir spennu og kvíða eins og vanalega. Versta er að allir í vinnunni eru svo rólegir segja mér að reyna að slaka á því prófin gangi oftast vel. Ég hef náttúrulega ofurtrú á sjálfri mér og veit að ég næ prófunum en engu að síður læðist stressið aftanað manni eins og lúmskur draugur. Annars var ferðin upp til Växjö æðisleg þið vitið ekki hvað það er gaman að fara í svona stórar dótabúðir, ég yngist um 25 ár og langar í allt sem í boði er (þið getið rétt ímyndað ykkur hvað púkinn minn á eftir að græða á þessarri ferð) ég gjörsamlega gleymi stað og stund. Svo áttu þeir líka smá snjóleifar þarna uppi sem ég prófaði aðeins að trampa í, hér hefur bara verið smá slydda enginn snjór :-( 16 dagar í heimkomu, Anna Dóra

Ég er ekkert smá heppin Var í dag á brjóstholsskurðdeildinni, var aðeins að fá að fylgjast með hvernig svæfingin er hjá þeim því þau vinna öðruvísi en við og ég fékk barasta að sjá meirihlutann af því sem þau gera. Ég sá þá skipta um hjartaloku, gera hjáveituaðerð á hjarta og leggja inn gangráð. Enda átti starfsfólkið ekki til orð yfir hvað ég hefði verið heppin. Á morgun fer ég svo með Guðrúnu og Eiríki upp til Växjö þar sem við ætlum að gleyma okkur í dótabúð kannski að við kaupum einhverjar jólagjafir ef við munum eftir því (ég er ansi hrædd um að mig eigi eftir að langa að kaupa allt sem ég sé eða að minnsta kosti prófa það) :Þ Svo verður lokadjamm fyrir próf um kvöldið, jólapartý lyfjasviðs ég efast nú um að ég endurtaki leikinn frá því í fyrra og syngi fyrir þau á íslensku en aldrei að vita hvað verður!!! Jæja er að hugsa um að læra smávegis eða á ég bara að slaka aðeins á hmmmm Anna Dóra

1. des = oppna fyrsta gluggann á súkkulaðidagatalinu Allt í góðu gengi hér aðventan gengin í garð þannig að ég er byrjuð að skreyta. Setti í dag upp jólastjörnu í eldhúsgluggann og jólaseríu í stofugluggann er nefnilega að reyna að lauma jólaskapinu inn með próflestrinum. Annars finn ég að ég er að byrja að verða stressuð fyrir prófin og nettur hnútur kominn í magann sem ég efast um að hverfi fyrr en klukkan 2 þann 21. des þegar prófin eru formlega búin. Annars er afmælistíminn genginn í garð. Afi minn á afmæli í dag, Jóhanna skvísa á afmæli á föstudag, Edda frænka á laugardag og Binni sonur hennar á sunnudag þannig að til hamingju með það öllsaman. Ég hugsa til ykkar. Afmæliskveðjur frá Karlskrona Anna Dóra

Eini gallinn við það að hafa ekki þvottavél í íbúðinni hjá sér eru hinir sem virðast líka þurfa að þvo. Átti þvottahúsið um síðustu helgi en var barasta alltof slöpp til að nenna að druslast niður með allan þvottinn minn. Svo þegar ég ætlaði að panta nýjan tíma var ekkert laust nema í morgun þannig að ég er búin að standa á haus frá því klukkan 8 í morgun og þvo 2ja vikna uppsafnaðan þvott og ég get sagt ykkur það að skáparnir mínir eru því sem næst tómir. Annars er allt gott að frétta, djamm síðasta föstudag og annað næsta föstudag. Ætla reyndar næsta föstudag með Guðrúnu og Eiríki upp til Växjö og við ætlum í dótabúðaleiðangur í Toys'r'us ég hlakka svo til að það er ekki venjulegt. Bið að heilsa í bili, þvotturinn kallar Anna Dóra

Ímyndið ykkur þetta og hugsið hvað er að? Hversu langt eigum við eiginlega eftir að ganga með þessu svokallaða raunveruleikasjónvarpi? Piparsveinninn, piparjúnkan, ást eða peningar, survivor, robinson, farmen, hver vill giftast pabba mínum og ég veit ekki hvað. Núna það nýjasta gay or straight. Ung og hugguleg (nema hvað) dama ein með 14 karlmönnum, helmingur þeirra er samkynhneigður, allir eru þeir að keppa um ástir hennar, ef hún velur homma fær hann miljón dollara ef hún velur "rétt" fær hún peninginn HJÁLP hvað er að!!! Mér finnst reyndar ágætis framtak hjá einni sjónvarpsstöðinni hérna sem er að gera grín að þessum þáttum í formi jóladagatals. Í fyrra var það jólasveinninn á loftinu, 24 einstaklingar sem lifðu á möndlugraut og sælgæti og einn kosinn út á hverjum degi. Núna hver verður frú Sveinki 24 stúlkukindur að keppa um ástir Sveinka og byrjar 1.des ég er svo þreytt á þessu raunveruleika sjónvarpi að ég hugsa að ég bara kveðji að sinni. Anna Dóra ekki næsta frú Sveinki :-)

Þetta kalla ég þjónustu í lagi. Var semsagt að panta mér linsur í vikunni og hérna fær maður alltaf augnskoðun með hverri linsupakkningu bara til að þeir séu vissir um að maður sé ekki að fá linsur sem eru annaðhvort of daufar eða sterkar. Annars er ég frekar slappur núna, með verki um allan líkamann, reyndar hitalaus en mér virðist ekki ætla að hlýna þannig að öllum djammplönum kvöldsins verður frestað þar til um næstu helgi þar sem ég hef ekki tíma til að verða veik. Ég og Guðrún erum búnar að vera hrikalega duglegar að læra og komnar ágætlega af stað með síðasta verkefnið okkar, gengur hrikalega vel í vinnunni og höldum barasta að við séum bestar þó svo við segjum sjálfar frá. Jæja ætla að hugsa vel um mig í kvöld, á víst að mæta í vinnuna annaðkvöld. Kveðja Lasarusinn í Karlskrona

Þvílíkur dagur sem ég hef átt í dag. Í morgun í vinnunni var kvartað um að það væri of mikil ilmvatnslykt af mér og ég var send niður í sturtu........ það er nú oftast á hinn veginn að fólk kvarti frekar undan svitalykt heldur en góðri lykt c",). Fór svo á fyrirlestur og þegar ég kom tilbaka kallaði deildarstjórinn í mig, great hugsaði ég fæ ég fyrirlestur um ilmvatnsnotkun núna en nei hvað haldiði hún bauð mér VINNU þið eruð semsagt að lesa dagbókarfærlsu eftir nýjasta starfsmann svæfingadeildarinnar hér í Karlskrona JIBBÝ JIBBÝ endalaus gleði, ég er semsagt búin að fá afleysingastöðu á svæfingunni fram til ágústloka 2005 og þá er bara að sjá hvað gerist. Bið að heilsa frá gleðigeiminu á Snapphaneväg Anna Dóra sem er í þvílíka dúndurgleðiskapinu :-)

Laufabrauð

Hittumst í dag Íslendingarnir og gerðum saman laufabrauð og hlustuðum á jólatónlist, ekkert smá skemmtilegt- hávaðasamt en gaman.
Hitti líka starfsmannastjórann og deildarstjórann á bráðamóttökunni og fæ svo að vita meira í næstu viku hvernig þetta verður allt saman og Maggi, ég byrja ekki að vinna fyrr en eftir að þú verður farinn heim þannig að þú þarft ekkert að væflast um einn meðan ég er að vinna.
Setti inn smá myndir frá laufabrauðsgerðinni.
Verðum í bandi
Kveðja
Anna Dóra

Tatatatdammmmmmmmmm...............

Jæja þá er komið að því, ég hitti semsagt starfsmannastjórann hann Mats í dag og eins og staðan er í dag get ég því miður ekki fengið vinnu á svæfingunni fyrr en í haust en hann bauð mér stöðu á bráðamóttökunni hérna þangað til, sagði að þar væri ég vel geymd en ekki gleymd því þau hefðu mikinn áhuga á að fá mig síðan til starfa þau geta bara ekki ráðið mig í janúar. Ég var því bara mjög sátt, bráðamóttakan er mun betra en ekki neitt og svo verð ég dugleg að minna hann á mig. En svo er líka eins og hann sagði að ástandið getur breyst eins og hendi sé veifað og aldrei að vita nema hann þurfi fyrr á mér að halda inn á svæfinguna, ég bara vona hið besta. Á semsagt að hitta hann og deildarstjórann á bráðamóttökunni á föstudaginn kl 10, ætli það sé ekki til þess að semja um laun og annað.
Jæja ætla að fara og kíkja á Fab Five gaurana
Anna Dóra

Sat í dag að spjalla við Rúnu í símann þegar gemsinn minn byrjar að hringja, ég sé að það er hringt úr leyninúmeri þannig að ég segi við Rúnu, æj þetta er vinnan leyfum þeim að tala inn á talhólfið. Hringdi svo í talhólfið, þá var þetta ekki vinnan, heldur starfsmannastjóri eða hvað ég á að kalla hann af svæfingunni og hann ætlar að hitta mig á morgun um eittleytið og við ætlum að ræða um framtíð mína innan sjúkrahússins!!!!!! Vona að það sé jákvætt en I'll keep you posted.
Þannig að ég ætla að biðja ykkur að hugsa fallega til mín í hádeginu á morgun og það væri ekki verra að þið mynduð krossleggja fingurna c",)
Bjartsýniskveðja
Anna Dóra

Veit ekki hvort ég var búin að segja ykkur frá því en ég þekki hinn sænska Martein Mosdal. Aðalkennarinn í skólanum hann Sten aka Marteinn er svolítið einráður og það er hans leið eða engin leið sem er málið. Svo ég fái útrás á ykkur hinum líka þá stóð í stundaskránni að á planinu væri frí í viku 52 og svo setur hann prófin í byrjun viku 52 (20. og 21. des) ég benti nú kurteislega á að skv stundaskrá væri nú frí en fékk þá bara tilbaka að það væri bara á planinu það væri ekkert ákveðið og svo hlustaði hann ekki einu sinni þegar ég sagði að ég hefði pantað flugmiða heim um jólin eftir að ég hefði talað við hann og sem betur fer væri það 22. des þá bara hlær fíflið og segir mér að fara heim og leika við jólasveina og baða í heitu hverunum :-S þá gekk ég í burtu því annars hefði ég bæði sagt og gert eitthvað sem ég hefði séð eftir síðar. Það sem var verst við þessa prófdaga var að Maggi ætlaði að koma til mín þann 17. des, við ætluðum að jólaskapast hér í Karlskrona og Köben og fljúga svo saman heim, þannig að Maggi ákvað að breyta sínum miða og kemur til mín í janúar, líklegast þegar ég útskrifast og verður stuðningsfulltrúi frá fjölskyldunni á þessum "stóra gleðidegi", besta að losna við kennarann og óskipulagið sem virðist fylgja honum og þar af leiðandi náminu!!!
Jæja best að byrja á næsta verkefni
Anna Dora föst á Stensleið hinni "einu réttu"

Víkingarnir rúla............

Skellti mér á djammið með Carro og Jessicu í gær, smá hrekkjavökustemmari í gangi, var svo ásökuð um að hafa ofurfyllt stelpurnar (dettur ykkur slík fásinna í hug um mig) og þegar ég minnti þær nú á að við hefðum allar drukkið það sama þá flugu þau fleygu orð "Þú ert víkingur og þolir meira en við hin" hafiði heyrt það betra. Það var allavega hrikalega gaman þó svo að við höfum farið heim í fyrra lagi vegna ölvunarástands sumra. Í nótt breyttum við svo yfir í vetrartíma, frekar skrýtið að vakna klukkan 9 og þá var klukkan í raun bara 8, reyndar lítið getað sofið í dag, nágrannarnir fyrir ofan mig eru að flytja og búið að vera frekar mikið um brölt og læti af efri hæðinni í dag, slæmt mál fyrir mig sem á að vinna í nótt=þ

Jæja er að spá í að athuga hvort Caroline sé á lífi og hafi komist í vinnuna

Víkingakveðja

Anna Dóra

Góðan og blessaðan daginn og sælt veri fólkið, allt gott að frétta síðan síðast, orðin árinu eldri, veit nú ekki með vitrari en það á allt eftir að koma í ljós á komandi mánuðum.

Skellti mér í ræktina í morgun til að losa um helgarsamviskubitið og gerði mér lítið fyrir og pantaði mér tíma hjá sjúkraþjálfaranum til þess að hjálpa mér að setja saman æfingaprógram sem ég get þá farið eftir. Þó svo að ég kunni á flest þessarra tækja þá getur nú verið ágætt að fá smá sérfræðiálit á þessu öllu saman og ég held að ég fái svo meira út úr æfingunum ef ég fer að gera allt rétt eller hur. En lífið heldur áfram að ganga sinn vanagang hér á Snapphanevägen, ég mæti í skólann, læri (þykist alla vega gera það) og tek einstaka aukavaktir- maður getur nú ekki alveg sleppt kontaktinum við deildina, það var einmitt hringt í mig áðan og hvað haldiði mér voru boðnar kvöldvaktir sem ég þakkaði kærlega fyrir, skemmtileg tilbreyting frá næturröltinu.

Ætla að skella mér út að borða á miðvikudaginn með deildinni, erum að halda uppá 4 stórafmæli, það verður farið á gríska uppáhaldsveitingahúsið mitt hér í bænum, hlakka til.

Þar til næst, verið dugleg að hreyfa ykkur

Anna Dóra

Fiskinn minn, nammi nammi namm
Keyrði í dag samtals 400 km, 200 hvora leið til þess að kaupa íslenskan fisk. Ég og Guðrún pöntuðum semsagt íslenskan fisk sem ég sótti niður í Lund í dag og svo buðu Guðrún og Eiríkur uppá fiskinn þegar ég kom tilbaka og ég get sagt ykkur það að hann var hvers kílómeters virði og eiginlega meira en það, þannig að núna á ég 4,5 kg af fiski í frystinum þvílíkur lúxus.
Annars allt gott að frétta, dómur féll í gær á því hvernig ég hef staðið mig í verknáminu og að sjálfsögðu var ekkert nema gott sagt um mig c",) og ég stóðst fyrri hluta verknámsins.
Sé fram á hrikalega spennandi og skemmtilegan afmælisdag á morgun, umræðufundur frá 9-15 en hei það gæti verið verra (alltaf að leika pollýÖNNU). Fékk reyndar pakka í gær svona fyrirfram frá Caroline svakalega flott veggskraut sem má bæði nota sem kertastjaka eða fyrir smáblóm.
Smá kveðjur, Mæja pæja til hamingju með gærdaginn og Rúna til hamingju með morgundaginn
kram
Anna Dóra orðin afmælisbarn eftir 2 klst

Þó svo að ég sé að verða búin að búa hérna í 1 1/2 ár hættir þetta ofurupplýsingaeðli Svíanna ekki að koma mér á óvart. Á hverjum laugardegi er lítill pistill í blaðinu um það hvar lögreglan verði að hraðamæla komandi vikuna (enginn feluleikur hér, við viljum nefnilega ekki ná í rass...... á þeim sem eru að keyra of hratt) og svo er annar með matseðlum fyrir skólana og elliheimilin, like I care, kemur skólamatseðillinn fyrir foreldrana svo þeir geti þá sent nesti með barninu ef þeir vita að barnið eigi ekki eftir að borða þann daginn :-) ég á ábyggilega aldrei eftir að skilja Svíana til fullnustu, en ef einhver gerir það kalla ég þann sama mjög góðan.
Jæja þá er að snúa sér að lærdómnum,
Anna Dóra nývöknuð eftir næturvaktina
P.s Raggi til hamingju með daginn í gær

Púff ef ykkur fannst Íslendingarnir fá rassskell í gær hefðuði átt að mæta með mér í vinnuna í morgun. Heyrði ýmist "ykkur gekk ekki alltof vel í gær" eða "4-1" en diplómatinn Anna Dóra var fljót að segja "nei en Svíarnir spiluðu mjög vel" og þá urðu allir mjög ánægðir.
Annars allt gott að frétta, fæ að vita í næstu viku hvað handleiðurunum finnst um mig, hvort ég sé algjör njóli úti á hóli eða hvort ég viti eitthvað í minn haus, við eigum nefnilega að hittast með kennaranum og fara í gegnum það hvernig ég hef staðið mig- hjálp fæ ég allt bullið í hausinn-
en má ekki vera að þessu blaðri núna
verðum í bandi- þar til næst....................................
Anna Dóra
P.s til hamingju með daginn Ninna Rós

ZZZZzzzzzzzzzzzzzzzzzzzzzzz
Dagurinn í dag, byrjaði á því að ég svaf yfir mig, vaknaði kl. 9 og átti að vera mætt 8:30, hrökk upp, hringdi til að láta vita af mér, henti mér í sturtuna og svo beint út, fór reyndar í föt þar á milli ;-). Þegar ég svo kom í vinnuna var handleiðarinn minn í besta skapi og fannst þetta nú ekki mikið mál við myndum bara byrja á því að fá okkur kaffi í rólegheitunum, hitti svo Guðrúnu sem sagði að við ættum að mæta í skólann á umræðufund kl 13 sem ég var búin að afskrifa og var þar af leiðandi ekki nógu vel undirbúin en það gekk vel engu að síður- vona ég alla vega.
Helgin var reyndar mjög fín, skellti mér með stelpunum á hinn eina sanna schlagerbar, dró Huldu og Guðrúnu með, og svo var matarboð hjá Huldu og Steina í gær ekkert smá gott.
Jæja bið að heilsa í bili, lofaði Maríu handleiðaranum mínum að lesa heima fyrir það sem við ætlum að gera á morgun.
Kveðja
Ein sem hafði stór orð um það í gær að hún ætlaði að fara að taka sig á, að vera ekki alltaf á síðustu stundu=)

Rólegheit, rólegheit = Anna Dóra kannist þið við það
Í morgun þegar ég var að ganga í vinnuna var ég það heppin að ein bekkjasystir mín keyrði framhjá mér og pikkaði mig upp, hún þekkti mig nefnilega á rólega göngufasinu, hún sagði ég vissi að þetta væri þú því þú ert aldrei á hraðferð c",)
Annars allt gott að frétta, gengur vel í skólanum- nema hvað.
Jæja bið að heilsa í bili úr rólegheitunum
Anna Dóra
P.s til hamingju með daginn Eiríkur

Það er greinilegt að það er að styttast í afmælið mitt, átti í þvílíkri tilvistarkreppu í gær allt var ómögulegt og ég að verða hrikalega gömul, ef ég á að vera hreinskilin þá var þetta svolítið svona Bridget Jones meets sex and the city dæmi. En I slept it off og líður mikið betur núna, það skrýtnasta við þetta allt saman er að ég hef ekki upplifað svona aldurstengda krísu áður- nóg um það.
Merkisdagur í dag, Lilja vinkona og Villi frændi minn eiga afmæli í dag, og svo er Sigrún frænka mín að skíra litlu prinsessuna sína.
Kveðja
Anna Dóra

Sæl og blessuð öll saman. Skipulagið sem ég minntist á við ykkur síðast gengur barasta mjög vel, reyndar er ég best (eins og þið kannski þegar vitið) í því að njóta lífsins en það þarf líka. Núna er ég í heilsuátaki, búin að bóka deit í ræktina í fyrramálið. En síðan síðast er ég búin að svæfa fyrsta barnið mitt og gekk bara vel, svæfingalæknirinn reyndar ekkert svona hrikalega uppörvandi, hann var að fræða mig um hve auðvelt væri að halda opnum loftvegum hjá börnum, þau gerðu það að mestu leiti sjálf, ef barnið fengi ekki loft þá væri það vegna þess að ég hefði kyrkt það- einmitt það sem ég vildi heyra þar sem ég stóð og hélt maska yfir barnsandliti :-S
Í vikunni þreytti ég líka frumraun mína í sultugerð, gerði chilipaprikusultu og tókst svona hrikalega vel, hún bragðast allavega vel og það er fyrir mestu ekki satt.
Bið að heilsa ykkur í bili þar til næst...............
Anna Dóra

Síðan síðast er ég búin að
............ fá aðra kveðjugjöf frá deildinni, það var víst staðið fyrir söfnun og fékk ég 2 rosalega flotta trékertjastjaka og 2 myndir, önnur með fílum og hin með zebrahestum (þau þekkja Afríkustílinn minn)
........... vita ekki hvernig ég átti að vera þegar mér var færð kveðjugjöfin í fordrykknum heima hjá Lindu
.......... mæta í kveðjupartýið sem endaði heima hjá lækninum, hann er að reyna að selja íbúðina sína og vildi hávaða og læti svo nágrannarnir myndu borga með íbúðinni NB!! engan misskilning hér, ég fór ekki ein í eftirpartýið
......... vera í partýinu til 04 sem ég held að sé met hjá Svíum !!!
......... reyna að setja saman ritgerð í stjórnun

Þar til næst ætla ég að
............ vera langt komin með þessa blessuðu ritgerð
........... vera dugleg að læra þar sem ég á von á yfirheyrslu um skammtastærðir og ýmislegt fleira í næstu viku
.......... byrjuð að æfa á fullu a.m.k fara út að labba x 3 í viku
.......... halda áfram að njóta þess að vera til og láta mér líða vel
hej då så länge
Anna Dóra

Hæ hæ ætlaði bara að segja ykkur að ég var að setja inn myndir frá Búlgaríu.
Annars allt gott að frétta, gengur vel í verknáminu, verst að geta ekki notið þess, alltaf einhver verkefni sem bíða.
Stefnan tekin á deildarpartý annaðkvöld og hefst fordrykkur heima hjá Lindu kl 16,
Party on Wayne
c",)

Hverjar eru líkurnar á þessu!!!
Annar handleiðarinn minn hún Cecilia er líka eineggja tvíburi og 5 mínútum yngri en systir hennar, nákvæmlega eins og ég og Rúna.
Hérna kemur smá skoðanakönnun:
Hef undanfarna viku bæði á leiðinni í vinnuna og heim gengið framhjá fugli (veit svo sem ekki hvort þetta sé alltaf sami fuglinn) sem gengur út á götuna og hoppar svo í burtu áður en bílarnir koma. Nú er spurningin
a) Hann er leiður á lífinu og er í sjálfsvígshugleiðingum, á bara erfitt með þessa ákvörðun
b) Hann er með gráa fiðringinn og þetta er hans leið til að sýna dömunum hversu kúl hann er þar sem hann hefur ekki efni á blæjubíl
Hvað haldið þið, orðið er frítt!!!
Kveðja
Anna Dóra

Mental note to self: Ekki bera á mig vellyktandi kókoskremið mitt áður en ég fer í vinnuna
Þar sem ég er frekar þurra húð eftir vikuna í sólinni og sjónum er ég búin að vera bera á mig hrikalega gott og feitt krem frá body shop, gerði ekki alveg ráð fyrir því að lyktin myndi halda jafn lengi og hún gerir og varð því frekar hverft við þegar einn svæfingalæknirinn kom inn á stofuna þar sem ég var að svæfa sjúkling og sagði "er ég að verða vitlaus eða er kókoslykt hér inni" ég vissi uppá mig sökina og varð því að gefa mig fram sem eiganda lyktarinnar, svona var þetta allan daginn sama hvar ég fór alls staðar heyrði ég "finniði kókoslyktina" ekki slæmt að það sé svona góð lykt af manni en þetta var kannski ekki alveg rétti staðurinn fyrir það.
kveðja
Anna Dóra Kókosgella

Þá er ég komin aftur heim eftir alveg hrikalega skemmtilega ferð. Ætla að gefa ykkur smá ferðasögu. Best að segja samt að Albena þar sem við vorum er alger ferðamannastaður, allir kunnu einhverja frasa á þýsku og sænsku, ég hef aldrei talað jafn litla ensku og í þessarri ferð!! Þjónarnir læra spes sænsku og þýsku til að geta gert sig betur skiljanlega við eldra fólk, sniðugt en samt skrýtið.
Dagur 1
Lentum á flugvellinum í Varna um 13 og allt gengið mjög vel, ég ætlaði reyndar aldrei að komast í gegnum vegabréfsskoðunina, hann rýndi og rýndi í vegabréfið mitt, snéri því á alla kanta og ég veit ekki hvað, spurði svo loksins hvaða stafur þetta væri og benti á LL í Halldóra hvort þetta væri W ég gat nú sagt honum að þetta væru 2 L og hann stimplaði vegabréfið mitt og hleypti mér í gegn. Við komust svo heilar á höldnu á hótelið í Albena, ekkert smá fallegt en þurrt landslag, heilu akrarnir af sólblómum sem hefðu verið meiriháttar ef þau hefðu verið enn í blóma. Hótelið var mun betra en við áttum von á, búið að lýsa því fyrir okkur sem mjög gömlu og slitnu sem það var en samt betra. Ég var í herbergi með Carro og Jessicu og við skiptumst á að sofa á aukabeddanum því það var gamall tréhægindastóll sem var útdreginn, u.þ.b. 20 cm bil þar sem hnén komu og það var um að gera að snúa sér reglulega til að forðast legusár svo harður var hann, en við lifðum þetta af eins og allt annað. Kíktum svo aðeins á ströndina til að kanna aðstæður og fengum okkur svo að borða og þá kom líka þessi hrikalegasta rigning sem við höfum séð en þetta var bara "skúr" sem gekk yfir á klst. Saddar og þreyttar eftir langan dag fórum við uppá hótel að sofa.
Dagur 2
Eftir morgunmat var slappað af á ströndinni og ákveðið að kíkja svo á lífið í bænum um kvöldið. Við komum við í næstu búð og keyptum okkur vínflösku og hittumst svo inni á herbergi, kíktum svo á hótelbarinn, þetta dróst svo hrikalega hjá okkur að um miðnættið þegar við kíktum út, var allt að loka og við fengum náðarsamlegast að kaupa samlokur á einhverjum barnum sem við löbbuðum framhjá, fengum svo að vita daginn eftir að ferðamannatímabilið er bara út sept. þannig að það var orðið frekar rólegt í bænum. Þannig að ekki varð mikið úr djamminu í þessarri ferðinni.
Dagur 3
Fórum í verslunarferð til Varna, fengum næstum paník á útimarkaði sem við kíktum á, yfir ágengni sölumanna allir vildu selja okkur peysur, boli, skó, nærföt eða töskur og voru ekkert að sleppa okkur. Við enduðum reyndar allar á því að kaupa okkur Diesel peysur á 1200 kr íslenskar og vorum svo fljótar að forða okkur sem var kannski eins gott, því þessar hlýju peysur björguðu okkur alveg, um leið og sólin hvarf fór hitinn nefnilega líka og kvöldin voru ísköld. Um kvöldið fórum við svo í fyrsta skipti út að borða á Poco Loco veitingastað þar sem þjónarnir dansa og við erum að tala um ekkert smá flott show hjá þeim, lifandi tónlist þannig að í rauninni fær maður dinner and a show, stelpurnar féllu kylliflatar fyrir þessum sætu þjónum þannig að þetta varð okkar staður, var reyndar eini staðurinn þar sem var eitthvað líf þannig að þetta var svo sem í lagi.
Dagur 4
Slappað af á ströndinni hrikalega háar og lokkandi öldur en bannað að fara í sjóinn einmitt þegar mann langaði til þess sem mest, en best að hlíða strandvörðunum, kíkt í búðir, fengum nýja nágranna, Svíar öðrum megin og frekar spúkí Rússi hinum megin sem sagðist vera demókrati og skrifa fyrir einhvern sem var gerður útlægur (hugsa að það sé einhver georgíumaður, kannaðist alla vega við það úr fréttum) en við reyndum bara að forðast þennan kall og fórum svo út að borða á Poco Loco um kvöldið mér var boðið upp 2svar og fékk svo lítinn hjartalímmiða að launum fyrir =) ekkert smá gaman.
Dagur 5
Fórum í bátsferð út frá Balchik, ekkert smá fallegur dagur, ákvað samt að taka sjóveikitöflu svona fyrirbyggjandi og sem betur fer, því það var frekar lúmskur öldugangur. Carro greyið varð svo sjóveik að hún bara lá kyrr og naut ferðarinnar engan veginn. Um hádegið var stoppað í vík (frekar óspennandi) og manni boðið að synda, veiða á handfæri eða bara njóta góða veðursins meðan skipstjórinn undirbjó handa okkur hádegismat. Þar sem sjórinn var frekar skítugur þarna, ýmislegt rusl á floti ákvað ég að reyna að fiska sem gekk reyndar ekki fiskurinn frekar latur svona í góða veðrinu, kastaði reyndar prikinu sem hélt færinu fyrir borð en skipstjórinn bjargaði mér og sótti það með háf. Það fyndnasta við þessa bátsferð var að þarna í Búlgaríu voru samankomin á þessum bát, 3 búlgarar (fararstjórinn og tveir af bátnum) 6 Svíar, 1 Norðmaður, 2 Finnar og Íslendingurinn Anna Dóra vantaði bara Dani og þá hefðum við getað stofnað nýtt Norðurlandaráð =) Fórum svo að borða nema hvað á Poco Loco um kvöldið, vorum farnar að kunna prógrammið utanað og ég var búin að benda stelpunum á að mér fyndist þetta eiginlega orðið neyðarlegt að fara alltaf svona á sama staðinn en þetta var eini staðurinn þar sem var eitthvað um að ske og ég var 1 á móti 4 þannig að ég fékk að bakka.
Dagur 6
Ég, Caroline og Jessica ákváðum að gefa húðinni smá frí frá sólinni (líka af því að það var svo kaldur vindur) og kíkja í búðir. Held við getum sagt að við séum búnar að bjarga efnahag þeirra Búlgara sem hafa sumaraðstöðu á Albena. Ég verslaði a.m.k allar jólagjafirnar þannig að ég ætla ekki að segja hvað ég keypti, allt var á útsölu því ferðamannatímabilið fer að hætta. Ákváðum reyndar um kvöldið að fara á nýjan veitingastað, sænskan stað en viti menn, þjónarnir af Poco Loco komu hlaupandi með matinn, þá var þessi sænski staður hluti af einhverri keðju 3ja staða sem voru með sitthvorn matseðilinn eldaðan í sama eldhúsinu og borinn fram af sömu þjónum =0)
Dagur 7
Hrikalega kaldur vindur samt 25°C þannig að við ákváðum að gefa Varna annað tækifæri bara forðast þennan hrikalega markað sem við fórum á síðast. Nú gekk allt mikið betur við fórum reyndar á annan markað og merkilegt nokk keyptum bara ekki neitt. Annars virðist Búlgurunum nægja smá hola mestalagi 2x5 metrar þá er skellt upp hillum og opnuð búð enda gerðum við mikið af því að skoða í búðarglugga, hættum okkur ekki alveg inn í búðirnar.
Þar sem þetta var síðasta kvöldið fórum við út að borða á Poco Loco og Carro fékk að dansa við strákinn sem henni fannst svo sætur, bjargaði fríinu hennar!!
Dagur 8
Áttum að skila herberginu kl 12 og fjandans já ég segi fjandans ræstinakonurnar voru komnar inn á herbergin að þrífa áður en við vorum komnar út og skildu náttúrulega ekki stakt orð í ensku þegar við vorum að reyna að útskýra að við værum að fara hvort þær gætu komið seinna =(. Dagurinn var svo tekinn létt, slakað á við sundlaugina á næsta hóteli (hvorki sundlaug, né morgunmatur á okkar hóteli við fórum á hótelið við hliðina á á morgnana) svo kíkt í bæinn og reynt að eyða síðustu levunum okkar, borðuðum svo á sænska staðnum (stelpunum langaði svo í fisk og kartöflumús) og svo var haldið heim á leið. Að sjálfsögðu lenti ég aftur í vandræðum í vegabréfaskoðuninni þeir snéru vegabréfinum mínu á alla kanta og skoðuðu hverja síðu, hleyptu mér svo að lokum í gegn en komu svo á eftir mér og báðu um að fá vegabréfið mitt lánað í 2 mín. ég náttúrulega varð eins og eitt spurningamerki í framan og spurði why? þá kom maður sem talaði ensku og útskýrði að þetta væri svo þeir gætu lært hvernig íslenskt vegabréf liti út (ég er farin að halda að ég sé fyrsti Íslendingurinn sem hefur stigið fæti sínum til Varna og Albena) þannig að gott fólk afrit af vegabréfinu mínu er notað sem kennslugagn fyrir flugvallarstarfsmenn í Varna, kosturinn reyndar að ef ég kem aftur þá ættu þeir að þekkja mig c",)
Jæja bið að heilsa í bili, ætla að kíkja í lærubækurnar, búin að þvo hrikalega er ég dugleg, læt ykkur svo vita þegar ég hef sett inn myndir.
Anna Dóra kennslugang í því hvernig íslenskt vegarbréf lítur út

Förum saman í ærlegt sumarfrí svona sungu Stuðmenn hér um árið og það ætla ég að gera núna, við leggjum af stað héðan kl 04:30 í nótt og eigum svo flug frá Malmö einhvern tíma milli 9-10 í fyrramálið, þó svo að það taki bara 2 -2 1/2 klst að keyra niðureftir þá held ég að bílstjórinn okkar hún Jessica sé svolítið stressuð að keyra með svona fullan bíl af fólki þannig að hún vill leggja tímanlega af stað og ég meina she's the boss hún á bílinn.
Annars er ótrúlegt hvað fólk leggur á sig fyrir dýrin sín, ég er sjálf mikill dýravinur en mér finnst hundar ekki eiga heima í blokk, það er par fyrir ofan mig (3.ja hæð) sem var að fá sér Schäffer hvolp og þar sem hvolpgreyið á bágt með stigana ennþá eru þau hlaupandi með greyið í fanginu upp og niður mörgum sinnum á dag til að hleypa honum út að gera stykkin sín (við vitum hvernig hvolpar eru, sífellt að tæma) persónulega finnst mér að ef maður vill eiga hund þá verður maður að hafa garð.
Verð annars að deila með ykkur dýrasögu fyrst ég er byrjuð. Í gærkvöldi sauð Rúna systir fisk sem er svosem ekki í frásögur færandi nema það að Halldór Óskar horfir á diskinn sinn og segir "þetta er Nemó" ég hélt ég yrði ekki eldri ég hló svo mikið þegar ég fékk að vita þetta.
Jæja þá ætla ég að fara að pakka og þrífa íbúðina fyrir fríið, það er svo mikill munur að allt sé hreint þegar maður kemur heim.
Anna Dóra í nettum sumarfíling

2 dagar í sumarfrí....
Suma daga er maður meira mis en aðra, í dag t.d. æltaði ég að vera rosalega dugleg, þvo og svoleiðis fyrir utan að læra heima náttúrulega. Kom heim um 4 úr skólanum og drusla nú þvottinum niður í þvottahús og þegar ég kem niður er einhver byrjaður að þvo í mínum þvottatíma ég setti auðvitað saman nokkur velvalin orð sem eiga ekki heima hér fyrir þessa frekju og verður þá litið á töfluna þar sem maður pantar tíma og viti menn ég á þvottahúsið á morgun, ég var alveg viss um að ég hefði pantað þvottahúsið í dag svo allt væri nú þurrt og fínt þegar ég kæmi heim úr skólanum á morgun og gæti bara byrjað á því að pakka- nei nú verður þvegið, ofurkrafturinn settur á þurrkherbergið.
Þökk sé þessrri nútímatækni þá er ég að fara í saumaklúbb heima annaðkvöld, jú MS-gellurnar ætla að hittast og Ásdís pæja er með vefmyndavél þannig að ég ætla að kíkja við hjá þeim, verst að ég geti smakkað á góðgætinu sem í boði verður.
Jæja ætli það sé ekki best að fara að sofa, umræðutími á morgun í skólanum mikið hlakka ég til (sá einhver kaldhæðnina í þessu)
Bið að heilsa í bili og óskið mér góðs gengis á morgun
Anna Dóra, eitthvað frekar mis í dag