Nú stendur Sailið sem hæst, allt á fullu. Gettu hvað Maggi, ég sá orrustuþotu flugsýninguna í dag sem við heyrðum bara í í fyrra. Frekar magnað hvað þeir geta gert á þessum þotum, mér fannst barasta eins og ég væri að horfa á Tom Cruise í Top Gun eða Charlie Sheen í Hot Shots........ það hefði kannski ekki verið verra ef þetta hefðu verið þeir c",)
Annars er allt gott að frétta, kæfandi hiti núna dag eftir dag en eins og Gloria Gaynor orðaði það svo eftirminnilega I will Survive.
Jæja ætla að skella mér aftur út í sólina
Sólarkveðjur
Anna Dóra

Í sól og sumaryl

Já nú hef ég á tilfinningunni að sumarið sé loksins að koma, það er alla vega sól og 25°C og kannski ríflega það í skjóli, og ég í fríi á morgun, erum að spá í að skella okkur á ströndina og fá okkur eins og eina smá dýfu í Eystrasaltið ef veður leyfir, ég ætla alla vega að sjá til hversu langt ég fer en mér heyrðist á Carro að hún verði að dýfa sér almennilega. Sailið byrjar líka á morgun, það er árlegur viðburður hérna, þá flykkist að fólk á seglsútum bæði alls staðar frá Svíþjóð og utan úr heimi og mikið líf á hafnarbakkanum, við  vorum reyndar búnar að lofa okkur í smá partý með kellum úr vinnunni á morgun því þær fara alltaf á hafnarbakkan fyrsta kvöldið og dansa við Black Jack alveg æðislegt dansband (við erum að tala um gömlu dansana eða þaðanaf verra, þetta er eins og í verstu B-myndunum þegar konurnar stilla sér upp og bíða eftir að verða boðið upp) en það verður gaman að fylgjast með þeim höstla einhverja gamla gubba upp á dansgólfið eða ragga eins og það heitir á sænskunni.
Jæja löngu kominn háttatími
Góða nótt, Anna Dóra

Þreytt en mjög ánægð eftir velheppnaða tónleika 
Já þá er velheppnaðri helgarferð lokið og ég komin heim aftur.  Ferðin byrjaði mjög vel á föstudeginum, Linda byrjaði á að sýna fram á hversu mikil ljóska hún er strax í flugrútunni á leiðinni fráArlanda þegar sessunautur hennar, erlendur karlmaður spurði hvaðan hún væri og hún sagðist vera sænsk og from the south, já frá Malmö spurði hann þá, "No the other South" svaraði Linda og ég og Carro grétum í sætinu fyrir aftan þau. Ekki nóg með þetta  því svo þegar við ætlum að taka lestina er ég spurð hvert ég ætli og ég heyrði ekki hvað hann sagði fyrir utan að vita ekki hvað það hét þar sem við vorum að fara þannig að ég lít á Carro til að fá að vita hvert við ætlum nú, jú jú þetta gekk og svo kom greyið Linda síðust og segir bara það sama og er þá spurð komið þið utan af LANDI, ég veit ekki hvað kom upp um okkur en við vorum greinilega dreifbýlistúttur á ferð um höfuðborgina. Tónleikarnir á laugardeginum voru meiriháttar, meira að segja fyrir mig sem er ekki sænsk, þessi hljómsveit Gyllende tider er greinilega fyrir þeim eins og Stuðmenn eru fyrir mig. Þetta voru 25 ára afmælistónleikar og voru hvorki fleiri en færri en 32.700 manns sem voru í Stadion með okkur. Versta var að maður fékk ekki að taka með sér vatnsflöskur inn á svæðið og svo vildi maður ekki vera að flakka og eiga á hættu á að týna stelpunum meðan að á tónleikunum stóð þannig að eftir 4 klst þegar við vorum að niðurlotum komnar af þreytuverk í fótum, og að líða yfir okkur af vökvaskorti en samt ánægðar með tónleikana var ákveðið að kaupa sér að drekka og kaupa miða í sæti á næstu tónleikum sem við förum á hvenær sem það verður. Á sunnudagskvöldinu fórum við svo í Gröna Lund tívolíið og skemmtum okkur stórkostlega vel, skellihlógum í rússíbananaum og vorum við það að pissa niður af hræðslu í draugahúsinu, hugsið einmitt hvað maður er vitlaus, maður borgar fyrir að láta hræða sig.......
Nóg í bili
Anna Dóra

Er ekki tæknin frábær

Fjárfesti fyrir helgina í vefmyndavél og er búin að vera að spjalla við fjölskylduna heima þvílík SNILLD segi ég bara þó svo að ég sé svona langt í burtu er ég samt svo nálægt þeim.
Annars er allt það besta að frétta héðan, er í fríi á morgun og þá er einmitt besta spáin fyrir vikuna heiðskýrt og 25° það er bara að vona að það haldi.
Fer svo með Caroline og Lindu A að hitta Söndru uppí Stokkhólmi um helgina, þar sem við fáum fría gistingu ákváðum við að leggja meira í ferðina og ætlum að fljúga en það var að opna lággjaldaflugfélag sem flýgur héðan upp til Stokkhólms (er reyndar að fara yfirum af stressi sá mynd af rellunni í blaðinu um daginn en það hlýtur að reddast) Við förum á föstudagskvöldi og komum tilbaka á mánudagskvöldi, ætlum á tónleika á laugardeginum og í Gröna Lund tívolíið á sunnudagskvöldinu, þess á milli ætlum við bara að leika okkur og sjá hvað við finnum okkur til skemmtunar.
Bið að heilsa í bili
Anna Dóra

Sumir dagar eru þannig að maður vildi eiginlega hafa sleppt því að fara á fætur. T.d. eins og dagurinn í dag. Við ákváðum semsagt stelpurnar að gera eitthvað annað í dag en að sitja heima og glápa á tærnar á okkur. Við pökkuðum niður  einnota grilli, kjöti og meðlæti og keyrðum út í eyjar. Allt í lagi með það, svo kveikjum við upp í grillinu og pappírinn bara fuðrar upp og ekkert meira gerist nei og meðan við erum að baksa við grillið kemur fullt af fólki og fer að fylgjast með okkur þannig að við bara helltum vatni yfir þetta ónýta grill, hentum því og keyrðum á næsta matsölustað, svo þegar ég átti að borga þá var ég ekki með nógan pening og ekki tóku þeir við korti og ég þurfti að leita uppi vinkonur mínar og fá lánaðan pening. Eins og þetta væri ekki nóg á einum degi, nei svo þegar ég kom heim ákvað ég að fara og kaupa mér vefmyndavél og þurrkgrind og vökva og tæma póstkassann fyrir Guðrúnu í leiðinni og fá lánaðan bíl til að koma græjunum heim, þar sem ég keyri í búðina sé ég að það fer að vanta bensín á bílinn og ákveð því að redda því og vill ekki betur en svo að dælan sem var frekar treg frussar allt í einu út bensíninu þannig að það skvettist á mig, fyrst ég var fyrir utan búðina ákveð ég bara að drífa mig inn og versla  og svo þegar ég stend við kassan (angandi eins og ég væri tilbúin að kveikja í sjálfri mér ef ég fengi ekki það sem ég vildi) spyr afgreiðsludaman "afsakið en finnurðu bensínlykt" ég sem vissi uppá mig skömmina varð nú að játa að bensínlyktin væri af mér, afgreiðsludömunni sem var nú frekar mikið skemmt en um leið létt því nú vissi hún að það var ekkert mikið um að ske og ekki þurfti að rýma búðina brosti bara til mín og rukkaði fyrir það sem ég var að kaupa.
Eins og ég segi sumir dagar eru þannig að maður hefði alveg eins getað sleppt því að fara á fætur.
Ein frekar niðurlægð
Anna Dóra

Spáið í því að vera opinber "eign", í dag á Viktoría krónprinsessa afmæli, er 27 ára (þvílíkt góð árgerð c",) og það er haldið upp á afmælið hennar opinberlega með risa tónleikum (sem væri í sjálfu sér ekki leiðinlegt) allt í lagi að halda upp á afmælið svona opinberlega þegar hún er 20, 25 o.s.frv. en á hverju ári hljómar svolítið mikið.
Annars er allt gott að frétta héðan, sólin lætur enn bíða eftir sér en vitur maður sagði að á sunnudag er fullt tungl og þá breytist þetta og viti menn að samkvæmt veðurfréttum kvöldsins þá er spáð batnandi veðri frá og með næsta sunnudegi=)
Bið að heilsa í bili
Anna Dóra

Skellti mér með Caroline á markað í Ronneby í dag, og við örkuðum um markaðinn og eyddum peningum þrátt fyrir hellidembu sem kom inná milli. Það er einhvern veginn gaman að rölta svona um markaði, það er ákveðin stemmning sem myndast og allir voða glaðir.
Besta fannst okkur eiginlega að labba á milli bása sem seldu stuttermaboli með hinum ýmsu áletrunum, þar gátum við staðið og grenjað úr hlátri. Rákumst m.a. á þessa "Að tala áður en maður hugsar er eins og að skeina sér áður en maður skítur" getið þið ímyndað ykkur að ganga um í svona bol.
Annars er planið bara að taka því rólega um helgina og hlaða batteríin fyrir komandi ferðalög, við erum að spá í að fara upp á Öland í næstu viku og svo ætlum við í helgarferð til Stokkhólms 23-26. júlí.
Munið að hugsa áður en þið talið
Anna Dóra

Varð óþægilega vör við það í gærkvöldi að ég er að eldast.
Ég kíkti aðeins út á lífið með stelpunum, við vorum að sýna einni sem býr i Stokkhólmi allt lífið sem er hér í Karlskrona en hvað er opið á miðvikudagskvöldum? Við byrjuðum nú bara svona eins og gengur rólega í heimahúsi og síðan var haldið niður í bæ. Flestir staðir voru nú reyndar hálftómir alla vega þeir með dansgólfi. Við leiddumst að lokum inn á stað sem heitir Piraten því þar átti að vera opið frameftir og svo ég vitni nú í vini Oh my God...... þeir sem ekki voru að nálgast tvítugt voru 40+ og það voru kannski 4, mér leið eins og ég væri gamalmenni (kannski ekki nógu drukkin en mér fannst þetta minna mig á diskóin sem ég sótti á Spáni'99 svona eitthvað týpískt til að halda opnu fyrir unga fólkið sem er í sumarfríi) þannig að ég hefði fílað þennan stað í ræmur ef ég hefði verið nokkrum árum yngri og það sem var verst var að þeir spiluðu alveg geggjaða tónlist svona ekta til að dansa við. Þó svo að maður sjái að maður eldist þegar vinir eignast börn,gifta sig, litlu frændsystkin og litla systir séu að fá bílpróf þá er það einhvern veginn eðlilegra en að vera með þeim elstu á skemmtistað það er eitthvað sem ég hef ekki lent í áður og vona að sé langt í að það gerist aftur.
Nei þá segi ég bara Lifi Schlagerbarinn...........
Kveðja
Anna Dóra

Svona á ég erfiða fjölskyldu 

Er hægt að vera kvikindislegri en að senda manneskju sem býr erlendis mynd af íslensku lambakjöti á grillinu =(
Annars er allt gott að frétta, er að skipuleggja ferðalag með stelpunum hvort sem það verður Stokkhólmur, Malmö eða Köben kemur allt í ljós.
Kveðja í bili
Anna Dóra

Hér er svo eg og Linda A 

Við kíktum aðeins út á lífið í gær, skemmtum okkur að sjálfsögðu mjög vel og fórum hvert annað en á Schlagerbarinn. Ákvað að prófa photobloggið með því að skella inn myndum af okkur frá því í gærkvöldi.
Kveðja
Anna Dóra

Þetta er Caroline vinkona mín nú getið þið tengt andlit við nafnið 

Smá hugleiðing
Í vinnunni í gær vorum við að flétta gömlu séð og heyrt blaði þar sem sænski kylfingurinn Jesper Parnevik bauð lesendum heim sem er svo sem ekki í frásögur færandi nema fyrir það að húsið hans er á 3 hæðum og hver hæð 600 m2, bara rúmið hans er 10 m2 og vegna þess hve hann ferðast mikið er lyfta fyrir ferðatöskur úr svefnherberginu niður í anddyrið. Ég fór einmitt að hugsa hvort ég hefði valið mér rangan starfsferil, hefði maður frekar átt að reyna við eitthvað annað, nei ég held ekki ég er svo ánægð með það sem ég hef, himinlifandi á mínum 50m2, finnst gaman að mæta í vinnuna, hvað annað þarf maður. Þessi aumingja maður þarf viku til að ganga um allt húsið sitt og gps-staðsetningartæki til að finna frúna í rúminu.
Hvð finnst ykkur?
Anna Dóra í skrýtnum hugleiðingum

Heyrði einn ansi góðan um helgina sem ég ætla að deila með ykkur.
Tvær vinkonur voru að ganga heim af djamminu og styttu sér leið í gegnum kirkjugarðinn. En svo var eins og oft vill verða að þeim varð ansi brátt í brók og engin leið að bíða þar til heim væri komið þannig að þær ákveða að pissa á bakvið næsta legstein. Þegar þær svo eru að pissa segir önnur: "Við höfum ekkert til að þurrka okkur með" hin sem var frekar frökk sagði "ahh ég þarf ekkert brókina" og með því reif hún sig úr brókinni þurrkaði sér og henti svo brókinni bak við næsta tré. Sú fyrri vildi nú ekki fara úr brókinni og greip því borðann af kransinum á næsta leiði og þurrkaði sér. Svo héldu þær áfram heim. Daginn eftir hittast svo eiginmenn þessarra kvenna áhyggjufullir og annar segir "ég veit nú ekki hvað gekk á þarna í gærkvöldi því konan mín kom brókarlaus heim" þá segir hinn "ert þú með áhyggjur konan mín var að vísu í brókinni en það stóð prentað á botninn á henni TAKK FYRIR ALLT, KVEÐJA STRÁKARNIR Í VINNUNNI"
Vona að hann missi ekki marks svona á netinu.
Annars er planið hjá mér að koma upp myndabloggi, þannig að þið getið fylgst með mér bæði í máli og myndum. Að vísu ekkert komið þarna inn ennþá en þið verðið fyrst til að fá að vita þegar það gerist.
Bið að heilsa í bili
Anna Dóra

Leiðinlegt að Svíarnir komust ekki áfram, þetta er í fyrsta skipti sem ég hef getað haldið með landsliðinu í svona stórri keppni og eigt smá von um að komast áfram (hvenær hefur það gerst með íslenska landsliðið- ekki illa meint) þannig að nú verður maður að snúa sér að næstu norðulandaþjóð og segja Áfram Danmörk.....
Annars hef ég nú oft sagt ykkur frá því hvað Svíarnir eru fyndnir og ég held að þetta komist ofarlega á listann minn yfir topp tíu. Í síðustu viku var ég semsagt að skrifa undir pappíra í vinnunni þar sem er verið að úthluta mér að ég í vissum tilfellum megi gefa ýmis lyf án þess að læknir hafi gefið fyrirmæli um það, stuða við hjartastopp og taka blóðgös (það er allt skriflegt hérna, sem er bara ágætt) nema hvað svo fæ ég eitt blað einn til að kvitta á og hvað jú ég fékk úthlutun á það að mér sé treyst fyrir því að geta sett armband á sjúklingana með nafninu þeirra og að það sé réttur sjúklingur, ég veit ekki hvort deildarstjórinn hafi heyrt kaldhæðnina þegar ég spurði hvort ég væri að kvitta fyrir því að geta merkt sjúklinga en engu að síður er þetta eitt af því sem þeir treysta mér til að gera. Semsagt Svíar eru fyndnir=)
Kveðja
Anna Dóra full af sænsku trausti
P.s Til hamingju með daginn Mamma

Ég er megapæja, fór í dag og keypti mér nýja fartölvu og finnst hún vera huge við hliðina á þessarri litlu og sætu sem ég er með núna. Núna líður að Jónsmessunni eða Midsommar eins og hún kallast hérna og byrja hátíðarhöldin hér á morgun með markaði niðri í bæ og svo verður reist maístöng á laugardaginn og væntanlega dansað og sungið í kringum hana og svo fara allir heim og borða síld og nýjar kartöflur sem eru soðnar með dilli og salti (einhver hérlenskur siður). Ég hef svosem ekki ákveðið hvað ég ætla að gera, vill svo skemmtilega til að ég er í fríi en það er leiðindaspá fyrir helgina eins og mér heyrist reyndar heima líka. Annars finnst Svíunum (sérstaklega karlmönnuum) svolítið skemmtileg íslenska hefðin (þ.e. þessi gamla) að velta sér nakinn upp úr dögginni á Jónsmessunótt, það hljómi skemmtilegra heldur en að syngja og dansa kringum blómum skreytta stöng.
Munið eftir hefðinni
Anna Dóra

Þá er ég komin heim aftur eftir tæplega 3ja vikna dvöl heima á Íslandi, ótrúlegt hvað tíminn var fljótur að líða ég hafði það engu að síður alveg hrikalega gott, það var dekrað svo hrikalega við mig að það liggur við að maður kvíði hversdagsleiknum sem tekur við núna. Mér finnst reyndar svolítið öfugsnúið að segjast hafa verið í sumarfríi á Íslandi þetta á eiginlega að vera á hinn bóginn, venjan er að maður fari frá Íslandi í sumarfríinu sínu. Ég virðist þó hafa sett eitthvað af góðu veðri ofaní ferðatöskuna mína því í dag er búið að vera betra veður en hefur verið í marga daga þannig að núna er bara að krossa fingurna og vona að þetta haldi.
Bið að heilsa í bili
Anna Dóra

Hæ hó jibbý jei og jibbý jei það er kominn 17. júní.........
Gleðilegan þjóðhátíðardag hvar sem þið eruð stödd
Anna Dóra

Halló halló
Var á vafri á vefnum um daginn þegar ég rakst á þennan. Reynið við hann og látið vita hvernig ykkur gekk, það tók mig dágóða stund að komast að lausninni, hversu klár eruð þið.
Reyndu á heilasellurnar
Góða skemmtun
Anna Dóra svaka klára

Meiri lásí bloggarinn sem ég er, eða kannski bara að njóta þess að vera í sumarfríi? Annars er ég búin að hafa það mjög gott hérna heima, dreg mömmu greyið út að labba og í sund næstum því á hverjum degi þar sem ég er vöknuð eldsnemma því ég á svo erfitt með að sofa í allri þessari birtu. Átti reyndar my moment of glory síðastliðinn miðvikudag þegar það birtist við mig viðtal í kvöldfréttum stöðvar 2 því ég og mín fjölskylda erum ein af fáum sem eiga allt Andrésar Andar safnið á íslensku og þar sem ég er svo heppin að vera skráð fyrir áskriftinni vildu þeir tala við MIG í tilefni þess að Andrés kallin varð sjötugur. Þið sem sáuð okkur systur vitið hvað ég meina og þið hin, sorry þarna misstuð þið af mikilli skemmtun c",)
Ætla að drífa mig í sund, nýta tímann meðan ég hef tækifæri til þess að synda
þar til næst.......
Anna Dóra sund- og göngugarpur

Komin heim aftur, skellti mér með foreldraeiningunni í sumarbústað um helgina, þau svaka sæt að hringja í mig út og spyrja hvort ég vilji koma með þeim í Munaðarnesið eina helgi það séu komnir pottar og læti, ég sem er búin að sjá svona ferðir í hillingum var að sjálfsögðu fljót að þakka gott boð ég kæmi með. Þá kom það... við erum sko að fara að þrífa bústaðina og koma þeim í stand fyrir sumarið.... Þetta var létt verk og löðurmannlegt fyrir mig sem fékk að þrífa en grey pabbi og Maggi fengu að vera úti og tyrfa, ekki alveg jafn létt en löðurmannlegt. Annars var helgin fín, bongóblíða og glæsilegur pottur við bústaðinn, Munaðarnes er greinilega að reyna að koma sér aftur á kortið hjá kröfuhörðum íslenskum sumarbústaðadýrkendum.
Kveðja
Anna Dóra í íslenskum fíling