Er þetta óheppni eða eitthvað dæmigert?
Fór á tónleikana í gær, þeir voru frábærir eins og ég bjóst við. Var boðin heim til Caroline og Patricks í grill áður og svo þegar við erum að leggja í hann heyrum við í þrumum og það fór að þykkna all verulega upp. Ég með mitt jákvæða hugarfar segi að þetta geri ekkert. Svo komum við á staðinn og alltaf aukast þrumurnar og svo féllu nokkrir dropar en ekkert meir þannig að við frekar ánægð hugsum að við kannski sleppum. Nei svo gott var það ekki haldiði ekki að það hafi gert þetta líka úrhellið, ég sem var að sjálfsögðu ekki með jakka (þau aðeins fyrirsjáanlegri en ég) hljóp í tjald þar sem var verið að selja merkta boli og keypti mér regnjakka svo ég yrði nú ekki alveg holdvot. Jæja skúrinn varð nú ekki langur, hætti um leið og upphitunarhljómsveitin byrjaði og hefur haldið sér frá okkur síðan. Í dag er sól og blíða. Það fyndna við þetta allt saman er að það hefur ekki rignt hér í fleiri fleiri daga, kom einn stuttur skúr aðfaranótt mánudags en annars ekkert í rúman mánuð.
Er maður óheppinn eða?

Hæ hæ bara mánuður í að snigillinn sýni sína snilldartakta og hlaupi 10 km í Stokkhólmi. Snigillinn er nú ágætlega duglegur að æfa sig fyrir þetta. Hleypur úti 2-3x í viku. Held að hringurinn sem ég hleyp heimanfrá mér þessa dagana sé um 5 km þannig að ef ég get hlaupið hann 2x þá meika ég tjejmilen. Snigillinn kom meira að segja næstum því of seint í vinnuna í gær vegna hlaupanna. Ok svo ég segi ykkur frá því þá átti ég að byrja að vinna 9:45 fór út að hlaupa um morguninn og var komin heim um 9, teygði á og skellti mér í sturtu. Síðan barasta ætlaði ég ekki að hætta að svitna, það er svo heitt úti (samt bara um 23°C þegar ég hljóp í gær, fór uppí 31°C þegar það var heitast) þannig að maður svitnar líka ágætlega eftir hlaupin. Eftir sturtuna bara rann af mér og ég stóð fyrir framan viftuna til að reyna að þorna svo ég kæmist í föt=) Annars er svo heitt að maður svitnar bara við að gera einföldustu hluti eins og að vaska upp eða ryksuga og það er ekki eins og maður sé að reyna á sig.
Hvenær veistu að þú ofnotar loftkælinguna? Jú þú ert með kvef í 30°C
Maður er með loftkælinguna á í bílnum, viftu heima hjá sér, ég hef reyndar sloppið við kvefið en margir í vinnunni eru með ágætiskvef þessa dagana. Ég nota bara viftuna á kvöldin þegar ég er að fara að sofa og þvílíkur munur er farin að sofa heilu næturnar, rétt rumska til að slökkva á viftunni þegar mér finnst farið að kólna of mikið.
Sólarkveðjur frá Karlskrona
Anna Dóra

Hæ hæ var að bæta 2 linkum inn hérna við hliðina. Hulda ég vona að það sé ok að ég hafi sett síðuna hans Hákonar inn, annars tek ég það út aftur. Setti líka Jessicu hérna til hliðar þá getiði kíkt ef þið eruð forvitin um hvernig hún hefur það í Ástralíunni.
Keypti mér miða á tónleika í gær, Lars Winnerbäck hann spilar í Ronneby 29.júlí. Fer með Caroline og Patrick, sá hann líka í fyrra þetta verður geggjað. Er að vinna í að auðvelda mér lífið áður en ég fer til Ástralíu, segja upp blaðinu, redda autogiro þar sem það er hægt svo ég þurfi ekki að hafa áhyggjur af reikningunum mínum þar sem ég er í burtu yfir mánaðarmót.

símakveðja
Anna Dóra

Hvað er að frétta af ykkur heima í kuldanum? Ég elska sumarið, hér er búið að vera 25°C+ í 4 vikur þó svo að það sé stundum einum of heitt þá á maður ekki að kvarta þegar sólin skín. Er þvílíkt búin að njóta lífsins, skellt mér á ströndina, legið og notið sólarinnar og kælt mig í sjónum á milli þess sem ég vinn. Skellti mér reyndar til Kalmar með Hrafnhildi síðasta föstudag og við kíktum í IKEA. Ótrúlegt með IKEA að þó svo að maður ætli ekki að versla neitt endar það alltaf með að maður labbar út með fullan poka=)
Ég sagði nú barasta foreldrum mínum að skella sér hingað í sólina til mín, veit ekki hvort þau láti verða af því en maður veit aldrei. Styttist líka í að Helga Dís komi til mín hún kemur 12. ágúst og verður hjá mér í nokkra daga áður en hún fer til Köben að hitta vinkonur sínar.
Best að skella sér út í góða veðrið, er búin að hvíla mig nóg eftir næturvaktina.
Sólarkveðjur
Anna Dóra

Tónleikarnir voru bara frábærir. Robbie var svo frábær að það var næstum þannig að maður færi að gráta. Þvílíkur skemmtikraftur, gjörsamlega sá besti sem ég hef séð. Þið getið bókað að ég á eftir að fara á aðra tónleika með honum. Robbie greyið var aðeins að pirra sig á loftbelg sem sveif rólega yfir Ullevi að þarna væri fólk sem vildi sleppa við að borga of ef við værum sammála að segja þeim að Fu... off og þarna snéru 60 þús manns sér við og görguðu á loftbelginn að F...... off og hann gerði það=) Mér fannst ég síðan svaka góð systir hringdi í Rúnu þegar hann tók einn Take That smell og hvað gerir hún, kallar mig Tu..... en hugsa svo sem að ég hefði brugðist svipað við. Stemmarinn þegar hann svo söng Angels, ef það hefði verið þak á Ullevi hefði það lyftst. Við skelltum okkur svo í Liseberg áður en við keyrðum heim á mánudeginum, ógissla gaman, geggjaðir rússibanar, gott veður frábær dagur. Hér er þvílíkt gott veður hátt í 30°C dag eftir dag yndislegt alveg hreint.
Jæja ætli það sé ekki best að drífa sig með pakka í póstinn og halda áfram að njóta góða veðursins.
Sólarkveðjur
Anna Dóra

Styttist í að ég fái að berja Goðið með eigin augum. Eftir 2 daga stend ég á Ullevi syngjandi með Robbie Williams, negli svo næturlífið í Gautaborg og ætla svo að skella mér í Liseberg á mánudeginum, hrikalega verður mikið stuð.
Skellti mér á ströndina í dag eftir vinnu. Fór í sjóinn í fyrsta skipti í ár, frekar kallt get ég sagt ykkur, efast um að sjórinn sé búinn að ná 20°C þannig að þau voru ekki mörg sundtökin sem voru tekin í dag.
Jessica er búin að finna veitingastað í Sydney sem hún ætlar að fara með mig á, Súkkulaðiveitingastað, við erum að tala um að ég fæ gæsahúð bara við tilhugsunina. Getiði ímyndað ykkur að það sé gott?

Bið að heilsa.
Anna Dóra

Hæ hæ

Ég komst heim á endanum. Eftir aflýstu flugi og seinkunum fékk ég sæti á fyrsta farrými, ekki verra, maður kann bara ekkert á svona, velja mat af matseðli, fá alvöru borðbúnað ekkert plast drasl en ég lét mig nú hafa það svo ég kæmist heim. Ef allt hefði gengið að óskum hefði ég verið komin heim til mín um 2 leytið um nóttina en þar sem flugvélar voru að bila var ég ekki komin heim fyrr en 6 um morguninn og svo mætt í vinnu kl 12, þannig að það varð nú ekkert ógurlega mikið úr fyrriparti vikunnar hjá mér. Er komin inn í sömu gömlu rútínurnar, vinna, sofa, borða, út að hlaupa með þjálfaranum mínum, erum einmitt að auka hlaupin í 2x í viku.
Fagnaði Jónsmessunni með Svíum að þessu sinni á hefðbundinn hátt, var boðin heim til vinkonu minnar, vorum 13 manns með börnum. Átum síld og nýjar karftöflur þar sem það er skylda að taka snafs með síldinni bauð ég uppá ísl. brennivín. Síðan var ráðist í það að tína blóm og trjágreinar og setja saman midsommarstöng sem við dönsuðum svo í kringum. Fengum okkur svo kaffi, skelltum okkur í smá leiki og enduðum svo kvöldið á að grilla. Ekkert smá gaman. Reyndar voru krakkarnir búnir að setja saman smá leiki eftir matinn og m.a. írskt aðfangadagskvöld, þar sem maður hleypur, setur ennið á prik snýr sér í 5 hringi og hleypur til baka (ef maður ratar þ.e.a.s.) eftir snafsana og rauðvínið með matnum var það ekkert alveg gefið get ég sagt ykkur.
Jæja bið að heilsa ykkur, best að skella sér í háttinn, á að mæta á morgunvakt í fyrramálið.
Anna Dóra

GLEÐILEGA ÞJÓÐHÁTÍÐ
Gaman að vera Íslendingur í dag. Við vorum að komast á HM í handbolta. Engin virðing borin fyrir Svíunum. Þó svo að við höfum tapað með einu marki þá dugði það til þar sem við unnum með 4 mörkum í Globen.
Fer svo heim á morgun, byrja daginn á barnaafmæli og svo í flug heim, vona bara að bíllinn minn sé ennþá í Malmö.
Hrafnhildur pæja hljóp brúarhlaupið í dag, hálfmaraþon yfir Eyrarsundsbrúnna, kraftur í kellunni.
Áfram Ísland
Anna Dóra

Hæ hæ kannski tímabært að ég skrifi nokkrar línur.

Komst heim að l0kum eftir miklar raunir síðasta föstudag. Ef ég byrja á byruninni þá var ég komin niður með allt og búin að raða í bílinn þegar ég fattaði að ég gleymdi útprentinu af farmiðanum og hljóp upp að sækja það. Svo hófst ferðin. Þegar ég kom til Lundar (búin að keyra í tæpar 2 klst) uppgötvaði ég mér til mikillar skelfingar að ég hafði gleymt vegabréfinu mínu heima (Doris í essinu sínu) ;-) ég keyrði útaf við fyrsta tækifæri og hringdi í pabba og spurði í hversu djúpum skít ég væri því ég hefði ekki tíma til að keyra heim og sækja passann. Sá gamli gat nú róað dömuna því við Norðurlandabúar þurfum ekki vegabréf okkar á milli, nægir að vera með skilríki með mynd. Áfram hélt ferðin og ég fann bílastæðið sem ég ætlaði að leggja á í Malmö án vandræða og kom mér í lestina yfir á Kastrup. Skelli mér þar í röð til að tékka inn og hvað haldiði skemmtilegt, það var seinkun á fluginu mínu, fyrst til klukkan 18 en endaði að við flugum kl 20, ég get lofað ykkur því að 8 klukkutímar á Kastrup er ekki mín uppáhaldstímaeyðsla. En þetta hafðist allt að lokum ég komst heim og er búin að njóta þess að vera til. Skellti mér í kvennahlaupið og hljóp 5 km, ætla í Slakka í dag með ormana mína (hlakka ekkert smá til) og borða góðan mat, er eitthvað betra en mömmumatur.
Jæja Rúna er að koma að sækja mig, við ætlum að kíkja smá stund í bæinn
Anna Dóra
p.s. er ekki málið að fjölmenna á landsleikinn á laugardaginn og styðja við bakið á strákunum okkar. Svíagrýlan fallin, þvílíkt glæstur sigur sem við unnum sl sunnudag, nú er bara að endurtaka leikinn.
Áfram ísland

Bara 4 dagar í heimkomu =)

Hvað á maður að gera af sér í þrumuveðri. Er í fríi í dag og var að hugsa um að skella mér út og njóta dagsins þegar brestur á þetta líka skemmtilega þrumuveður, ekki kannski besti tíminn til að vera úti og fílósófera um daginn og veginn. Fór út á lífið um helgina, síðasta djamm með Jessicu fyrir Ástralíu. Lenti í svona ógeðslegum KALLI sem fannst ég svo sæt og líta út fyrir að vera góð stelpa (*hrollur*) vildi bjóða mér upp í dans og var að taka utanum mig(*stærri hrollur*). Maður vill nú ekki vera leiðinlegur þannig að maður játar því að vera góður en hvernig ætli svona KALLAR myndu bregðast við ef maður svaraði að maður væri algjör tík? Ef þið eigið góð ráð til að hrista svona KALLA af sér endilega deilið þeim með ykkur.

Sjáumst eftir nokkra daga
Anna Dóra

Smá gott ráð til ykkar vina minna sem eiga börn sem rella í búðum:
Barn: Ég vill FÁÁÁÁ (einhver sem kannast við þetta)
Foreldri: Er það ég eða þú sem eldar matinn?
Barn: Þúúú
Foreldri: Já vertu þá þægur og þegiðu!!!
Hahahahahaha finnst þessi frekar góður þið gætuð kannski reynt þetta næst þegar börnin ætla að biðja um einhvern óþarfa í búðinni.

Hvaða kynþokkafulla merking liggur annars á bak við nafnið ykkar?




Ég bara spyr, prófið og látið mig vita.
Love

Vá hvað ég fékk fyndinn tölvupóst í dag, brot úr grískum fréttum. Silvía Nótt í reiðiskasti eftir að hún komst ekki áfram í lokakeppnina. Þetta er á http://www.youtube.com bara að leita undir Silvia Night og þá ættuð þið að vinna það. Ég veit eiginlega ekki hvað mér á að finnast um þetta, en þið?
Talandi um að stóri bróðir sé alltaf að fylgjast með manni. Fann hrikalega fyndna sænska síðu þar sem fólk sendir inn hluti sem það hefur heyrt þegar það hefur legið á hleri. http://www.tjuvlyssnat.se

Annars er allt í góðu
Kveðja
Anna Dóra

Hversu óheppin getur maður orðið?

Hef rétt á að fara út og hreyfa mig, klst á viku á vinnutíma ef aðstæður leyfa. Í dag var frekar rólegt þannig að ég plataði eina til að fara út að labba með mér, að við myndum hætta klukkan 16 og labba í klukkutíma. Jú henni fannst það barasta hljóma eins og plan. Hvað gerðist jú um leið og við komum út byrjaði að rigna, fyrst bara nokkrir dropar og við bjartsýnar, enginn er verri þótt hann vökni. Ákváðum að labba heim til hennar (tekur klst) og svo gerði líka þetta litla úrhellið (búið að vera þurrt annars í allan dag) og við vorum svo blautar að það var ekki fyndið. Það sem var eiginlega er kómískt við þetta allt saman er að það hætti að rigna u.þ.b. korteri eftir að við komum heim til hennar. Þessi göngutúr hefði sómað sér vel í hvaða gamanmynd sem er.

blautar kveðjur frá Karlskrona
Anna Dóra

Er komið nýtt landslag í Eurovision? Er svo ánægð með að Finnarnir hafi unnið mér fannst þeir ekkert smá góðir. Ég fíla reyndar svona rokkara;-) Svo finnst mér náttúrulega ekkert nema fyndið að Lettarnir hafi komist svona langt. Sá reyndar ekki keppnina í gær, var á djamminu með vinnunni. Það var sírenupartý(blåljusfest) þ.e.a.s. sjúkrabíllinn, slökkviliðið, löggan, bráðamóttakan og að sjálfsögðu svæfingin. Ekkert smá gaman. Það byrjaði á að öllum karlmönnum var safnað saman og þeir látnir fara úr einum skó, sumir reyndar báðum þar sem kvenfólk var í meirihluta. Síðan áttum við að taka skó ég fékk 2 pör og leita svo að eiganda skónna og það var borðfélagi okkar. Ég sat með einum félaga mínum frá svæfingunni og miðaldara slökkviliðsmanni. Svo var bara djammað frameftir og allir skemmtu sér hrikalega vel.

Rock on
Anna Dóra

Ótrúlegt litli púkinn minn er orðinn 4ra ára. Hann átti afmæli í gær og að sjálfsögðu hringdi besta frænkan hans og söng fyrir drenginn sinn (veit nú ekki alveg hvað honum fannst um það því mamma hans sagði að hann hefði verið frekar skrýtinn á svipinn) Við ákváðum alla vega í gær að þegar ég kem verður stöðug afmælisveisla, við ætlum að leika okkur saman á hverjum degi.
Er í fríi í dag og það er svo yndislegt veður eða þannig, skýjað, 10°C og ég bara bíð eftir að það byrji að rigna. Ætla reyndar ekki að láta veðrið halda mér inni, ætla út að labba hringinn minn og svo jafnvel að kíkja í smá í búðir, langar í nýjar gardínur í stofuna hjá mér aðeins að fá smá líf þangað inn.
Var í gær hjá vinkonu minni sem var að byrja að selja snyrtivörur frá Mary Kay, fékk smá treatment, hún er ennþá bara með hin ýmsu krem (er svo fín í húðinni í dag og með silkimjúkar hendur) en eftir 3 vikur lærir hún föðrun og að hjálpa fólki að velja þá liti sem hentar þeim og ég var ekki lengi að þakka gott boð um persónulega ráðgjöf í þeim málunum.

þetta varð nú lengra babl en ég æltaði mér
Lifið heil

Díva eða......

Hvað finnst öllum heima um framlag okkar til Evróvisjón. Persónulega er ég hrifin af laginu og finnst Silvia Nótt frekar fyndin en hvar liggja mörkin fyrir dívur, getur dívan orðið drusla? Núna er mikið í fréttum hérna blótsyrðin í laginu og að aðstandendur keppninnar vilji að textanum verði breytt fyrir fimmtudaginn. Þessi setning the vote is in, I'll fucking win fer mjög svo fyrir brjóstið á aðstandendum keppninnar, svona í seinna lagi finnst mér þar sem það er bara tæp vika í keppnina. Í morgun las ég svo á textavarpinu að ef textanum verði ekki breytt eigi Íslendingar á hættu að verða reknir úr keppninni og hver eru viðbrögð Silvíu jú "I'll fucking sing what I fucking want" því spyr ég hvar eru mörkin hvenær fær maður nóg af dívunni og sniðgengur hana? Silvía Nótt er kannski eins og Selma sagði í þættinum full sigurviss og góð með sig. En svo á hinn bóginn eins og Eiríkur Hauksson sagði annaðhvort elskar maður hana eða hatar hana.
Hvað finnst ykkur, verður Ísland sniðgengið í keppninni eða læra Grikkirnir að taka gríni fyrir fimmtudaginn?
Ein ráðvillt

Hrikalega er ég DUGLEG, var að skrá mig í Tjejmilen, sænskt kvennahlaup sem verður 27.ágúst í Stokkhólmi. Við ætlum að fara nokkrar úr vinnunni og hlaupa/skokka/ganga 10 km. Ætlum að byrja að æfa okkur saman með því að hittast einu sinni í viku og fara út að hlaupa saman, best ég fari að byrja sjálf aðeins svo ég verði mér ekki til algjörrar skammar. Eftir hlaupið ætlum við svo að sjá söngleikinn Mamma Mia eftir þá ABBA-bræður, ég sá hann reyndar í London fyrir nokkrum árum (þori varla að hugsa til að það séu 5 ár, sá hann nefnilega í útskriftarferðinni minni) það var reyndar á ensku, núna er allt á sænsku meira að segja lögin.
Þið vitið hvað spekingarnir segja time flies when you're having fun.... 5 ár síðan ég kláraði hjúkkuna og 3 ár síðan ég flutti til Karlskrona ótrúlegt og ég ennþá bara tvítug.

Er búin að bóka flugmiða heim núna í júní kem um miðjan dag 9.júní og flýg svo heim seinnipart 18.júní. Ágústa ég kem beint í afmæliskaffið ekki satt;-þ

Kveðja
Anna Dóra

Komin einu skrefi nær Ástralíu, bókaði ferðina í gær :-) Var svo heppin að ég þarf bara að skipta einu sinni um vél. Flýg til Bankok og þaðan beint til Sydney og svo taka við 4 vikur af skemmtilegheitum. Er búin að fá vinnuskýrsluna fyrir sumarið, og ég fékk vikufrí sem ég bað um núna í júní og kem heim líklegast 9.júní og verð til 18. júní hljómar vel ekki satt. Hlakka til að hitta alla, veit að saumó ætlar að hafa smá hitting. Verð eins og vanalega heima hjá m+p þannig að það er bara að hafa samband.
Var ekki búin að segja ykkur frá nærridauðaupplifuninni minni hérna um daginn, var að fara að sofa þegar ég rek augun í þessa líka risahlussukónguló sem situr á veggnum í svefnherberginu mínu alveg uppvið loftið. Með adrenalínið í botni og öndunina á 100 km/klst byrja ég á að hringsnúast og reyna að ákveða hvað ég eigi að gera, ekki ætlaði ég að sofa hjá kvikindinu. Sæki svo ryksuguna, stend uppi í rúmi 2m frá helv..... (betra að vera í öruggri fjarlægð ef hún skyldi detta á gólfið) og náði henni með ryksugunni :-). Til að vera viss um að hún kæmist nú ekki út aftur setti ég ryksuguna í gang 5x í viðbót svona just in case. Einn vinnufélagi minn sem er ekki hræddur við kóngulær spurði hvort ég héldi að kóngulóin biði þarna á veggnum þar til ég sofnaði og kæmi svo og myndi ráðast á mig. Ég tilkynnti honum bara að ég tæki ekki sjénsinn á því, þá bara hló hann að mér ;-)
Jæja bið að heilsa í bili
Anna Dóra

Það var ekkert smá gaman hjá mér í gær.

Í gær var opið hús hjá hernum hér í Karlskrona og þeir voru að kynna sína starfsemi og buðu fólki innfyrir hliðin og að sjálfsögðu var ég og Jessica á staðnum. Við röltum þarna um og skoðuðum stríðsbáta og fórum að sjálfsögðu um borð. Kynntum okkur þrengslin í kafbátum (það er ekkert smá sem maður þarf að vera liðugur til að vinna við þessar aðstæður) Horfðum á flugsýningu þar sem herinn sýndi stolt sitt JAS 39 Gripen stríðsflugvél (ekkert smá Top Gun;-þ) þyrluflugmenn voru einnig á svæðinu og léku listir sínar. Einnig kíktum við á köfunaraðstöðuna þeirra en það eru margir Íslendingar sem hafa komið hingað og æft fri uppstigning (veit ekki hvað það er á íslensku) og þar er líka aðstaða til að veita sjúklingum súrefnismeðferð þar fékk ég einmitt einkatúr því að einn sem var að vinna með mér (og farinn að vinna hjá hernum) var á staðnum og sýndi mér vinnusvæðið sitt. Hápunkturinn var svo eiginlega þegar við fórum svo í planetariumið og skoðuðum stjörnuhvolfið. Held barasta að ég geti fundið Karlsvagninn og Pólstjörnuna eftir þetta. Auðvitað skelltum við okkur svo út á lífið í gærkvöldi, síðasti sjéns núna í margar vikur. Jessica fer til Englands í fyrramálið. Við skemmtum okkur svo vel að ég held að við eigum eftir að lifa á þessu kvöldi í langan tíma.

Kveð í bili að hermannasið
Anna Dóra

Travelfever

Ég og Jessica ætlum að hittast á morgun og aðeins að skipuleggja Ástralíuferðalagið okkar. Þ.e. að ákveða hvað við viljum sjá, hún er nefnilega á leiðinni til Englands á mánudaginn og verður í 3 vikur þar í verknámi. Það er reyndar sumt sem við erum búnar að ákveða, við ætlum að klifra á einhverri risabrú í Sydney, synda með höfrungum, snorkla á kóralrifinu, ath hvort við getum ekki látið taka mynd af okkur á krókódílabaki og dansa með frumbyggjum og síðast en ekki síst djamma með brimbretta gaurum. Vá hvað það verður gaman hjá okkur.
Annars held ég barasta að sumarið sé komið hérna hjá okkur. Sólin farin að skína og hitinn farinn að nálgast 20°C, ekki leiðinlegt það.

Bið að heilsa í bili
Anna Dóra