Maggi vaxdúkka!!!
Þannig var það að Magnús sem var eins og svo oft áður að bíða eftir okkur hinum sem vorum að skoða stjörnurnar á Madam tussaud og stendur alveg grafkyrr (þið sem þekkið hann kannist örugglega við þetta) og svo þegar hann lítur skyndilega til hliðar standa þar tveir menn sem höfðu verið að dást að honum og greinilega að spá í hver hann væri. Nú það þarf nú varla að segja frá því að þegar Maggi leit á þá misstu þeir sig og voru fljótir að láta sig hverfa, ætluðu ekki að láta alla sjá að þeir hefðu ruglast á vaxdúkku og lifandi manni. Ef ég hefði tekið eftir þessum mönnum starandi á bróðir minn hefði ég líklegast stillt mér upp við hliðina á honum og látið taka mynd af okkur saman aldrei að vita nema maður hefði soðið saman einhverja lygasögu um að hann væri frækinn fótboltakappi eða eitthvað þaðan af betra :-)
Þið báðuð um skýringu og hér fenguð þið hana, persónulega fannst mér þetta eitt af því besta sem gerðist í London ég er þvílíkt búin að hlæja að þessu.
Heilsur
Anna Dóra

Jæja þá er maður kominn heim aftur- þið vitið hvað þeir segja fínt að fara í burtu en heima er best.
Londonarferðin var æðisleg gott veður, yndislegt bara að vera léttklæddur úti og ekkert stress. Hér fáiði smá innsýn í það sem við gerðum
* Skoðuðum Kensington höllina þar sem Díana bjó
* Löbbuðum að Stanford Bridge heimavelli Chelsa
* Fórum í rútuferð með leiðsögumanni um London- mæli með því
* Fórum í smá siglingu á Thames ánni, ekkert nema frábært
*Fórum í London eye- risa parísarhjól á bökkum Thamesárannir og sáum yfir stóran hluta borgarinnar, var reyndar að spá hvort Bretar væru making mockery af Frökkum með því að vera með svona risaparísarhjól í London?
* Fórum á markað í Campden sem mér fannst gaman en Maggi og pabbi voru á því að ég væri að draga þá inn á sögusvið Olivers Tvist þ.e. vasaþjófar útum allt.
* Fórum á Lion King söngleikinn sem var barasta æðislegur
* Fórum á Madam Tussaud og þar var Maggi tekinn í misgripum fyrir vaxdúkku, annaðhvort er hann svona gervilegur eða dúkkurnar svona raunverulegar

Annars hefðuð þið átt sjá hótelherbergið mitt, eina herbergið á hæðinni, inngangurinn að hurðinni var eins og frímerki þannig að ég þakkaði nú fyrir að vera ekki mikið stærri en ég er!!!
Þannig að ég skildi betur af hverju galdraskólinn í Harry Potter er svona skrýtinn eins og hann er.
Annars er Maggi hetja ferðarinnar, við fórum á Pakistanskan veitingastað og Maggi sem aldrei þessu vant var ekki mjög svangur pantaði sér þessa líka girnilegu grænmetissúpu sem var hrikalega græn og full af baunum og vitiði hvað hann kláraði hana- vel upp alinn drengur þar á ferð.
Jæja vona að ég hafi ekki gleymt miklu bið að heilsa í bili
Desperate housewifes að byrja
Anna Dóra

Ég held að það sé eins gott að það séu að koma páskar og ég fái smá frí. Var eitthvað svo þreytt og utanvið mig þegar ég kom heim úr vinnunni að í staðinn fyrir að slá inn 4 stafa kódann fyrir hurðina sló ég inn pin-númerið á debetkortinu mínu og skildi ekkert af hverju hurðin opnaðist ekki ;-)
Annars er allt gott að frétta af mér, ég held að vorið sé að reyna að brjótast fram, snjórinn er byrjaður að bráðna, íkornarnir að skoppa og svo er sól og ágætisveður á daginn, reyndar morgunfrost ennþá en það fer hlýnandi.
Bið að heilsa í bili
Anna Dóra

Ef maður ætlar að keyra fullur er alveg eins gott að gera það almennilega!!
Á forsíðu BLT í morgun var skrifað um konu sem var að keyra drukkin, ekki nóg með að hún var með 3,11 prómill í blóði þá var hún með eina svona 3ja lítra belju milli fótanna og drakk meðan hún keyrði. Lögreglan þurfti víst að styðja konugreyið út úr bílnum sem ber við minnisleysi um atburðinn.

Þetta er ekki brandari heldur satt, ég hélt ég yrði ekki eldri en þetta gerðist víst.
Annars allt í góðu, sófinn ekkert smá þægilegur og ég er svo ánægð.
Kramiz
Anna Dóra

Nýji fíni sófinn minn 

Jæja finnst ykkur ekki nýji sófinn minn glæsilegur? Elsku Sigrún til hamingju með afmælið þitt í gær og bílprófið. Ætlaði bara aðeins að monta mig kramiz Anna Dóra

Til hamingju með daginn strákar!!!

Jú 2 frændur mínir voru að komast í fullorðinna manna tölu eins og það var nú kallað og er kannski enn, þeir voru fermdir í morgun. Ég bakaði meira að segja köku í tilefni dagsins. Guðrún og Eiríkur komu og sóttu nýju svefnsófana sína í dag og ég bauð þeim svo í kaffi á eftir. Það bergmálar aðeins í stofunni minni núna en nýji sófinn kemur á morgun JIBBÝ vona bara að ég fái að fara aðeins fyrr heim úr vinnunni til þess að geta tekið á móti honum en annars ætlar hún Carro vinkona mín að hleypa mönnunum inn þannig að sófann fæ ég hvort sem það er ég eða hún sem tekur á móti honum.

Bið að heilsa í bili
Anna Dóra

Ég enn á lífi þrátt fyrir mikið stress!!!

Skrýtið þetta með stress. Þó svo að hafi unnið sjálfstætt síðustu 7 vikur þá vissi ég alltaf að það var einhver vanur sem stóð á bakvið mig. Núna er einhvern veginn bara að hringja á svæfingalækninn ef það er eitthvað vesen og treysta á sjálfan sig. Get sagt ykkur það svona í trúnaði að aðfaranótt mánudags svaf ég frekar illa og var alltaf að vakna upp gæti verið að ég hafi verið farin að kvíða fyrir mánudeginum?

Að öðru leyti er allt gott að frétta, ég er farin að hlakka til páskanna, helgarferð til London ekki bagalegt, mér finnst ég þurfa á smá tilbreytingu að halda þessa dagana.

Bið að heilsa í bili
kramiz
Anna Dóra

Jeminn haldiði ekki að maður sé orðinn semi-þekktur ekki bara í Karlskrona heldur í öllu Blekinge :-)

Þegar ég var í verknáminu fyrir jól kom mogginn og var að fylgjast með aðgerð þar sem ég var að aðstoða við að svæfa og í morgun birtist þessi hérna í mogganum.


Svo maður vitni nú aðeins í félaga sína Stuðmenn:
Já hún er engin venjuleg kona og hún býr í litla Karlskrona og hún er alveg ofboðslega frægur hún fékk myndina af sér í BLT ...........

Þessi hálf-þekkta í Karlskrona
Anna Dóra semi-kändis

Stelpan á leiðinni til London!!!

Jú þið lásuð rétt, stelpan er á leiðinni til London og ætlar að vera flott á því. Fer á skírdag eftir vinnu niður til Köben og gisti eina nótt og tek svo flugið snemma á föstudagsmorgninum til London þar sem ég ætla að hitta mömmu, pabba, Magga og Helgu Dís og vera með þeim yfir helgina og fljúga svo heim á annan í páskum. Ekki bagalegir páskar þetta eller hur.
Í dag var síðasti dagurinn í aðlögun í vinnunni þannig að á mánudaginn er það Anna Dóra sem ræður, handleiðarinn minn var nú svo sæt og hringdi í mig áðan (hún var úti með sjúkrabílnum þegar ég fór heim) og var bara að spá hvernig þetta legðist nú í mig og aðeins að gefa mér góð ráð- það væri ég sem stjórnaði ekki sjúkraliðarnir en hún sagðist hafa verið svipuð þegar hún byrjaði að þegar svæfingalæknirinn sér um að svæfa þá eigi ég ekki að bakka og hleypa sjúkraliðunum framfyrir mig en vissar hafa þann leiða óvana að halda að þær séu barasta svæfingalæknar held ég því þær hafa unnið í 30 ár á svæfingunni. Nei nú er bara að standa föst fyrir og sýna þeim að núna er það víkingurinn sem ræður.

kram, kram
Anna Dóra

Þetta vekur mann til umhugsunar

• Ef að ristað brauð með smjöri lendir alltaf með smjörhliðina niður og kettir lenda alltaf á fótunum, hvað ætli myndi gerast ef maður festir ristað brauð með smjöri á bakið á ketti og sleppir honum svo?
• Nonni litli fékk sögubók í gjöf frá ömmu sinni. Þakka þér kærlega fyrir amma mín, segir hann og er svakalega kurteis. O það var ekkert svarar amma. Þá snéri Nonni sér að mömmu sinni og sagði, hvað var það sem ég sagði, maður þarf ekki að þakka fyrir svona drasl.........

Annars allt í góðu

Anna Dóra

Halló halló

Hvað er það besta við að fá útborgað- jú mikið rétt að eyða peningunum. Fór í dag með Huldu og Guðrúnu í MIO sem er húsgagnaverslun hérna rétt hjá og viti menn mér tókst að eyða nokkrum þúsundköllum, keypti mér nýjan sófa, svaðalega fínan hornsófa sem er blásvartur, set kannski mynd af honum hérna þegar ég verð búin að fá hann.
Annars er allt það besta að frétta héðan úr snjónum í Karlskrona, Svíarnir eru nú reyndar alveg að gefast upp á snjónum og farnir að lengja eftir vorinu- eins og við öll held ég barasta. Annars eru bókaútsölur í fullum gangi núna og ég keypti 2 bækur sem heita því skemmtilega nafni dassboken, salernisbókin á góðri íslensku, þetta eru svona litlar bækur með stuttum skemmtisögum gerðar til að hafa á salerninu svo fólk geti stytt sér stundir við að gera stykkin sín =) Maggi minn ég er semsagt búin að kaupa lestrarefni svo þú getir æft þig í sænskunni næst þegar þú kemur í heimsókn c",)
Jæja best að fara og elda mér mat svo ég verði búin að borða þegar melodifestivalen byrjar í kvöld, 3ja undankeppni fyrir evróvisíón
Det gör ont .........
Anna Dóra

Risin úr rekkju og farin að vinna

Jú jú tók ekki nema viku að hrista af sér flensuna, mætti tvíefld í vinnuna í morgun þ.e. ef þið kallið löðursveitt eftir 10 mín göngu tvíefld. Nei nei annars gekk dagurinn barasta mjög vel, bara 2 sjúklingar og svo námskeið eftir hádegið er hægt að biðja um betri fyrsta dag eftir flensu, nei ég held barasta ekki.
Annars er allt á kafi í snjó hérna hjá okkur, ótrúlegt en satt þá er snjórinn búinn að sitja í rúmar 2 vikur, gerist ekki oft hérna enda Svíarnir alveg í vandræðum með að keyra bílana sína í svona ófærð =)
Á í vandræðum með msn-ið hjá mér, þeir barasta vilja ekki skrá mig inn þannig að ég hef ekki verið online síðan ég veit ekki hvenær, vona að mér verði fyrirgefið, smá tæknileg vandræði sem ég er að reyna að yfirstíga.
Gerði annars hrikalega uppgötvun í dag, hef bara næstu viku með handleiðaranum mínum og svo er barasta vesgú og spís að standa á eigin fótum engar hækjur eða hjálpargögn nei nei auðvitað er maður aldrei einn það er bara eitt stórt skref sem skilur mig frá hinum svæfingahjúkkunum.
Kramiz
Anna Dóra

Hiti, hor og hósti!!

Glæsilegur titill en um þetta hefur líf mitt snúist frá því á föstudag, jú flensan hefur slegið fæti sínum niður á Snapphaneväg og fyrst að Anna Dóra hefur ekki fengið flensuna síðan hún man ekki hvenær ákvað flensan að gera sig heimakæra. Ef ég er ekki að deyja úr hita eða svita þá eru það kölduköst sem ráðast á mig, þetta er skelfilegt ástand. Ennþá verra fannst mér þegar ég kláraði panodilið mitt að þurfa að hringja í Caroline í vinnuna og biðja hana að koma við í apótekinu á leiðinni heim =( En svo fór ég að hugsa hversu gott það er að eiga góða vini sem hugsa um mann þegar maður er lasinn, það er til fullt af fólki sem á engan að. Reyndar sakna ég þess að hafa ekki mömmu til að stjana í kringum mig, það svona einhvern veginn tilheyrir í veikindum.

Jæja kveð í bili úr flensubælinu
Anna Dóra

HINIR UMHVERFISVÆNU SVÍAR = DREPFYNDIÐ

Jú öll vitum við hversu umhverfisvænir (miljövänliga) frændur okkar Svíarnir eru en það sem ég las í blöðunum um helgina slær eiginlega botninn úr tunnunni. Það er ólöglegt að þrífa bílinn sinn heima á planinu, þetta er einhver ný umhverfisstefna þar sem hætta er á að eiturefnin í sápunni og tjöruhreinsinum blandist grunnvatninu besta er að þrífa bílinn á þesstilgerðum þvottaplönum (sem hafa væntanlega eigið afrennsli) eða á bílaþvottastöð. Ef þú endilega vilt þrífa bílinn heima skal það gerast á malar- eða grasbletti þar sem er minni hætta á að óhreina sápublandaða vatnið blandist grunnvatninu!!! Sektir við umhverfisbrotum geta verið frá nokkrum mánuðum til 2 árum í fangelsi. Þeir pólitíkusar sem stóðu á bak við þessa frétt viðurkenndu nú að það væri mjög erfitt að fylgja þessu eftir þar sem það væri nú ekki hægt að fylgjast með öllum í einu (döööö) =)
Jæja bið að heilsa frá þessu umhverfisvæna landi
Anna Dóra, laus við þessar áhyggjur í bili

Mikið svaðalega finnst mér ég hafa verið dugleg að púsla takið eftir að það er ekki bein umgjörð. Versta var eiginlega að miðað við hvað það tók langan tíma að koma þessu saman þá tók það 2 mínútur að setja það ofaní kassa aftur =( Annars allt í góðu, bauð Guðrúnu og Eiríki í bollukaffi áðan (betra seint en aldrei) þar sem mánudagurinn fór í stórþvott og þetta er alltaf jafn gott get ég sagt ykkur. Jæja bið að heilsa í bili Anna Dóra

Sjáið hvað ég var dugleg!!!

Halló halló hvað segist þá?

Með hjálp Jóhönnu vinkonu minnar er komið nafn á svona gleymið fólk eins og okkur tvær og hvað er það annað en Doris (skemmtilegi fiskurinn úr Nemó sem skortir skammtímaminni!!) Jú Jóa er algjör Doris en mér finnst eiginlega betra að það sé til nafn yfir okkur. Ef ég deili með ykkur því helsta sem Doris hefur gert síðustu daga:

- Gleymdi húslyklunum hangandi í skáphurðinni í vinnunni og uppgötvaði það þegar hún kom heim 3 klst síðar
- Gleymdi að panta leigubíl á flugvöllinn síðasta föstudag og rétt náði flugrútunni
- Gleymdi dagbókinni sinni hjá hinni Doris
- Gleymdi að panta þvottahúsið og bauð sér því í heimsókn til Guðrúnar og Eiríks í gær með óhreina þvottinn sinn
- Gleymdi næstum því öllu sem hún þurfti að hafa með sér inni á skurðstofunni í dag þannig að greyið sem stóð á bak við hana fékk að stjana aðeins í kringum hana!!

Annars var æðislega gaman hjá mér um helgina þið getið rétt ímyndað ykkur það Doris og Doris saman, getur ekki annað en verið bara frábært.
Núna er svo ný vinnuvika tekin við sem endar á föstudaginn með því að SVÆFINGAMAFÍAN (dídídí dumm) ætlar að skella sér í Laser tag og aldrei að vita hvað áframhaldið verður
Verði ykkur saltkjötið að góðu
Kabúmm frá Karlskrona
Anna Dóra ekki sprengsödd af saltkjöti heldur pasta

Halló halló jæja ég er loksins búin að koma upp myndaalbúminu frá óvæntu heimsókninni sem ég fékk og það heitir jú Surprise!!!
Annars er allt gott að frétta ekki mikið um að ske þessa dagana vinna, borða, sofa.... þið kannist við þetta. Ætla að skella mér til Jóhönnu, Gísla og gormanna næstu helgi og hlakka ekkert smá til að hitta þau, orðið alltof langt síðan síðast. Við keyptum líka ferð heim í sumar í vikunni, núna er þetta ákveðið, ég Caroline og Jessica komum 26. maí til 9. júní og ég ætla að byrja á að sýna þeim íslenskt næturlíf í Reykjavík og svo ætlum við að ferðast hringinn í kringum landið þetta verður ekkert smá skemmtilegt.
Smá afmæliskveðjur í lokin: Harpa og Unnur urðu 6 ára síðasta miðvikudag og á morgun verður Guðfinna Ósk 3ja ára til hamingju skottur
Bið að heilsa í bili
Anna Dóra

Jú ég er enn á lífi en varla mikið meira en það.....

Lifði fyrstu vinnuvikuna af og þurfti satt að segja bæði laugardag og sunnudag til þess að jafna mig, ótrúlegt hvað maður er þreyttur þegar maður byrjar að vinna á nýjum stað því það er svo mikið um að ske og að sjálfsögðu tímir maður ekki að missa af neinu!!! En það gengur vel í vinnunni, ég hef reyndar fengið illkvittnisaugnaráð frá barnafólki þegar ég segist vakna hálfsjö en er samt mætt hálfátta, en svona er það þegar maður hefur bara sjálfan sig að hugsa um og ég nýt þess í ræmur =)
Er byrjuð að setja inn myndir frá óvæntu heimsókninni sem ég fékk og hugsa að það taki smá tíma sökum þreytu hjá undirritaðri.
Jæja bið að heilsa í bili
Anna Dóra

Ótrúlegt heil vika er liðin!!!
Þið kannist við orðatiltækið þröngt mega sáttir sitja jæja það átti nú ansi vel við síðastliðna viku, sem betur fer semur fjölskyldunni mjög vel saman því annars hugsa ég að það hefði legið við stórslysi. Mamma, pabbi og Halldór Óskar yfirtóku svefnherbergið mitt og ég, Rúna og Maggi sváfum í stofunni (það hefur nú barasta ekki gerst að við systkinin höfum sofið svona saman síðan við vorum lítil í sumarbústað í Svartagili hjá ömmu og afa). Alla vega gekk þetta hrikalega vel, svo er líka svo gott að fá svona laghentan pabba í heimsókn, pabbi setti upp fyrir mig gardínur, hann og Maggi hjálpuðust svo að við að setja upp nýtt ljós í stofuna hjá mér og Maggi skrúfaði saman hægindastólinn sem ég fékk í útskriftargjöf frá fjölskyldunni.
Ég segi barasta takk fyrir komuna
Anna Dóra, að reyna að venjast þögninni sem varð allt í einu ríkjandi á Snapphaneväg

Já Maggi kom mér aldeilis á óvart í dag. Hringir í mig og biður mig að koma á móti sér úr lestinni sem ég geri. Svo komum við heim og erum barasta að spjalla þegar dyrabjallan hringir og ég sem gerði eiginlega ráð fyrir nágrannanum fékk fyrir hjartað þegar í stigaganginum standa MAMMA, PABBI, RÚNA OG HALLDÓR ÓSKAR. Þetta voru samantekin ráð hjá þeim að koma mér á óvart á útskriftardeginum og ég get sagt ykkur að það tókst núna 4 klst síðar er ég enn að átta mig á þessu.

Ein í sjokki

Það var aldrei að stjörnuspáin mín átti vel við:
"Getur verið að þú gerir skrýtin innkaup fyrir heimilið. Fjölskyldumeðlimur kemur þér kannski á óvart á einhvern hátt" Ok scary Maggi bróðir kemur í dag í þessum skrifuðu orðum situr hann í flugvélinni. Hann er búinn að vera að tala um útskriftargjöf sem enginn annar veit hvað er hmmmmm hvað finnst ykkur er þetta tilviljun eða hvað?

Kveðja
Anna Dóra stjörnuspekingur

Á morgun gerist það.......
Síðasti skóladagurinn og ég get farið að kalla sjálfa mig svæfingahjúkku ótrúlegt en satt þá er árið liðið og ég er nýkomin heim frá síðasta skóladeginum mínum vonandi það sem eftir er!!!
Á morgun förum við svo saman úr að borða hópurinn, mér finnst nú reyndar svolítið sorglegt að hætta í skólanum því við erum öll að fara hvert í sína áttina og ég og Guðrún erum þær einu sem verðum að vinna hér í Karlskrona en svona er víst lífið. Eftir að ég hef kvatt fólkið á morgun kemur Maggi bróðir og við ætlum að slaka á í viku áður en alvara lífsins tekur við, jú ég þarf víst að byrja að vinna fyrir mér eins og svo margur annar. 19. janúar verður fyrsti vinnudagurinn (af mörgum) og ég er bæði spennt að takast á við þennan nýja kafla í lífi mínu sem svæfingahjúkka en einnig liggur pínu ótti þarna á bakvið- nú er að duga eða dr......
Einu langar mig að deila með ykkur; ég var skotin niður í skólanum í dag, ég var nefnilega ósammála kennaranum í umræðum sem við áttum og sagðist vera Egóisti því mér finnst ég svolítið sjálfsmiðuð en þá var bara baulað úr öllum hornum að ég væri nú ein af þeim minnst sjálfsmiðuðu manneskjum sem þau hefðu hitt og öll mín framkoma benti á allt annað en egóista, það er þó eitthvað jákvætt við mig!!!
kveðja
Anna Dóra svæfingarhjúkrunarfræðingur (þvílíkur tungubrjótur)

5 dagar bæði í að Maggi komi og að skólinn klári =)
Var að klára að setja inn myndir frá jólafríinu mínu þannig að ef þið hafið áhuga þá er þar brot af því besta=)
Er boðin í mat til Guðrúnar og Eiríks í kvöld, ætlum að kveðja jólin saman þó svo að það sé einum degi of seint en eins og spekingurinn sagði: "Betra er seint en aldrei"
Annars á Helga frænka mín afmæli í dag, látum aldur liggja milli línanna og jólaboð fjölskyldunnar verður í kvöld, góða skemmtun gott fólk ég hugsa til ykkar.

Jæja ætla að skella saman nokkrum glærum svo ég geti haldið kynningu á verkefninu mínu næsta mánudag
Anna Dóra

Ótrúlegt en satt þá á ég bara 3 daga eftir í skólanum og síðasta daginn ætlum við bara út að borða saman, ekkert smá spennandi.
Annars er allt við það sama hér, allt í góðu gengi, á bara eftir að kynna eitt verkefni búin að ná öllu öðru.
En svo styttist í að Maggi bróðir komi bara vika í kappann. Hann ætlar að vera í viku hjá mér og ég get sagt ykkur það strax að lífinu verður tekið létt, ætlum reyndar að kíkja út á lífið í tilefni skólaslita minna að sjálfsögðu setjum við það mikinn svip á bæinn að um annað verður ekki rætt næstu árin =)
Annars eignaðust Íris og Kalli strák á gamlársdag, innilega til hamingju
Kveðja í bili
Anna Dóra
P.s ætla að setja inn myndir úr jólafríinu mínu við tækifæri, kannski í kvöld, kannski á morgun

Nú er enn eitt árið að verða liðið- ótrúlegt hvað þetta líður hratt.
Ætla að deila með ykkur stjörnuspánni minni fyrir árið 2005, það verður gaman að sjá hversu mikið er til í því sem stjörnuspekingarnir segja
Það var stundum eins og þú værir í rússíbanaferð á árinu sem er að líða. Stundum var eins og verið væri að sjóða þig í olíu en einnig eins og hunangi væri dreypt yfir þig. Tilgangurinn hefur örugglega verið sá að láta þig komast að því að enginn verður óbarinn biskup. Reiknaðu með að upphaf komandi árs verði í svipuðum dúr. Heilsan mun batna verulega á árinu sem er að ganga í garð og efnahagurinn mun verða góður eins og áður. Ástarmálin voru í nokkurri kyrrstöðu á árinu en nú virðast mikilvægar breytingar vera í aðsigi. Þú munt verða látin axla meiri ábyrgð í vinnunni. En þótt þú verðir metnaðarfull mestan hluta ársins meturðu tillfinningajafnvægið meira en árangur í starfi.
Þar hef ég það, vona nú að þetta með ástarmálin rætist einnig að efnahagurinn verði góður en er hægt annað þegar maður hefur verið í námi og er að byrja að vinna aftur=)
Gleðilegt ár
Anna Dóra

Tíminn líður hratt á gervihnattaöld......................
Alveg er þetta ótrúlegt ég er búin að vera heima í næstum því viku og finnst það bara vera eins og 2 dagar það er eins og Icy söng hér forðum tíminn líður hratt á gervihnattaöld.
Garg garg og aftur garg, eins og ég hef sagt ykkur áður er ekkert ákveðið í þessum blessaða skóla mínum allt bara undir skipulagi. Var búin að fá stundaskrá fyrir síðustu 2 vikurnar og hvað og hvað fæ tölvupóst í morgun þar sem er búið að breyta stundaskránni og verkefnið sem við áttum að kynna 4-5. jan eigum við að kynna 3. jan og ég sem kem heim 2. jan. Ég og Guðrún erum semsagt í fjarsambandi að vinna þetta blessaða verkefni til að geta skilað því. Við erum þó duglegri en flestir (nema hvað) því við vorum langt komnar með verkefnið, fæstir voru byrjaðir fyrir jól.
Jæja best að hætta þessu bulli, Guðrún bíður á msn-inu óþreyjufull að geta hafið verkefnavinnuna =)
Kveðja í bili
Anna Dóra

Gleðileg Jól allir saman.
Takk fyrir allar jólakveðjurnar og gjafirnar ég ætla nú ekki að fara að telja upp það sem ég fékk en það kom sér allt mjög vel. Ég komst að lokum heim, var frekar smeyk við veðurspána en það var búist við óveðri í suður-Svíþjóð sem varð ekki svo mikið úr. Svo þegar ég var sest upp í vélina ánægð með lífið bara 3 klst í heimkomuna fékk ég blauta tusku í andlitið, áætlaður flugtími 3 klst og 45 mín vegna gífurlegs mótvinds, þetta voru með lengri 45 mín sem ég hef upplifað. En ég var nú reyndar fljót að gleyma þeim þegar ég sá hver kom og sótti mig, haldiði ekki að Rúna og Halldór Óskar hafi komið með Magga að sækja mig. Á Þorláksmessu vék drengurinn ekki frá mér, hann var svo glaður að besta frænkan væri komin heim.
Jólakveðja úr frostinu á Íslandi, ekki nema -12 þegar ég kom en hlýnandi bara -4 í dag.
Anna Dóra

Jólafrí ó jólafrí tralalalalalalala

Jæja þá er maður kominn í langþráð jólafrí og í fyrsta skipti ætla ég bara að slaka á, engin vinna bara að njóta þess að vera til og hitta vini og ættingja. Prófið í morgun gekk held ég barasta ágætlega, við vorum 4 í hóp sem ræddum 2 tilfelli sem geta komið upp við svæfingar og skiluðum inn sameiginlegu svari.
En á morgun gerist það, tek lestina héðan klukkan 13:30 og svo á ég flug klukkan 20 frá kastrup og verð lent heima um 22 hrikalega hlakka ég til. Ef einhver vill ná sambandi við mig er annaðhvort að hringja heim til mömmu og pabba eða gsm-inn minn +46(0)708319753 =)

Hlakka til að sjá alla

Jólakveðja

Anna Dóra

Nú styttist í það bara 1,5 klst í fyrra prófið og ég er orðin mettuð, núna ætla ég bara að reyna að slaka aðeins á og einbeita mér að öndunaræfingum =) Annars gleðifréttir það er snjór úti, fyrsti snjórinn í Karlskrona á þessum vetri, ég er búin að bíða svo lengi eftir að fá smá snjó að þetta hlýtur að vera gott merki fyrir mig að hann komi þegar ég er að fara í próf=) Jæja anda svo rólega inn um nefið og út um munninn og hugsa jákvætt ÞÚ GETUR ÞETTA 2ja daga heimkomukveðja Anna Dóra prófkvíðakerling

Á til með að deila með ykkur smá jólasveinabröndurum sem ég heyrði í gær bara svona í tilefni þess að það eru að koma jól. Vitiði af hverju jólasveinninn á engin börn.............. jú hann kemur bara einu sinni á ári Vitiði af hverju jólasveininn á engin börn................. jú hann kemur bara í skorsteininn Thí hí hí 5 daga heimkomukveðja Anna Dóra að komast í jólaskap en verður fyrst að klára próflestur

Fallinn með 4,9 Nei nei að sjálfsögðu ekki, nema hvað þá stóðst ég verknámshluta námsins með sóma. Það sem handleiðararnir sögðu að ég þyrfti að bæta en það væri eitthvað sem kæmi að vera aðeins ákveðnari og svo þyrfti ég að byggja upp þykkari skráp gagnvart sjúkraliðunum því margar þeirra hafa unnið þarna í 30 ár og reyna að stjórna nýju starfsfólki eins og þær mögulega geta. En að öðru leiti var allt hið besta. Þá er bara að einbeita sér að næsta hluta þ.e. prófunum. Jæja 7 daga heimkomukveðja Anna Dóra

Þið sem eruð eins og ég í stöðugri baráttu við aukakílóin eins og ég þá vil ég meina að aukakílóin fara ekki að verða vandamál fyrr en við verðum SVONA eða hvað finnst ykkur.

Kramiz

Anna Dóra

Vika í próf og ég held ég sé að verða búin að læra yfir mig. Nei nei en greinilegt merki um það sem er efst í mínum huga þessa dagana er að í nótt dreymdi mig að ég var að svæfa kennarann minn og þar sem hlutirnir gengu ekki nógu vel þá bara gerði hann sér lítið fyrir og vaknaði til að leiðbeina mér =) Annars gengur allt vel og ég er að undirstinga handleiðarana mína fyrir góða einkunn. Jæja best að snúa sér að skólabókunum 9 daga heimkomukveðja Anna Dóra

Hvað er að okkur konum? Fór í gær í bíó að sjá vinkonu okkar allra Bridget Jones sem var hin ágætasta skemmtun. Á leiðinni heim vorum við einmitt að tala um að það sorglega við þessa mynd er að það leynist lítil Bridget í öllu kvenfólki, eitt á ég til dæmis sameiginlegt með Bridget og það er "very bad hairday" allt árið =) Annað sem við vorum að velta okkur uppúr er af hverju föllum við alltaf fyrir Daniel Cleaver týpunum þegar við þráum að hitta Mr. Darcy. Smá vangaveltur um lífið og tilveruna hér í Karlskrona. Annars er bara rúm vika í prófin =( og lokadómur um frammistöðu mína í verknáminu fellur næsta miðvikudag=S þannig að það er eins gott að fara að snúa sér að bókunum og hugsa fallega til handleiðaranna. Þetta er Anna Jones á barmi örvæntingar

Rakst á þetta á vefnum!! Fyndið að það sé að sé hægt að meta hver maður er á nafninu manns. Endilega prófið:) og látið mig vita hvernig þið eruð!!!:)

Whats does your personality rate from 1-10? by morning_prayer
Your first full name
Your personality rates a	nine =)
your best quality is	people envy you
your worst quality is	youre too sweet
this is because	you were always this way
Quiz created with MemeGen!

Haldiiði ekki að ég hafi "eignast" barn í dag. Lilja vinkona eignaðist dóttir í morgun og gekk bara mjög vel. Núna get ég loksins andað rólega, er nefnilega búin að hugsa mikið til hennar síðustu daga. Vildi bara deila þessu með ykkur. Anna Dóra skáfrænka í 5ta lið

Það versta við að vera í skóla er að þurfa að fara í próf!! Nú styttist óðum í prófin bara 2 vikur og Anna Dóra er farin að finna fyrir spennu og kvíða eins og vanalega. Versta er að allir í vinnunni eru svo rólegir segja mér að reyna að slaka á því prófin gangi oftast vel. Ég hef náttúrulega ofurtrú á sjálfri mér og veit að ég næ prófunum en engu að síður læðist stressið aftanað manni eins og lúmskur draugur. Annars var ferðin upp til Växjö æðisleg þið vitið ekki hvað það er gaman að fara í svona stórar dótabúðir, ég yngist um 25 ár og langar í allt sem í boði er (þið getið rétt ímyndað ykkur hvað púkinn minn á eftir að græða á þessarri ferð) ég gjörsamlega gleymi stað og stund. Svo áttu þeir líka smá snjóleifar þarna uppi sem ég prófaði aðeins að trampa í, hér hefur bara verið smá slydda enginn snjór :-( 16 dagar í heimkomu, Anna Dóra

Ég er ekkert smá heppin Var í dag á brjóstholsskurðdeildinni, var aðeins að fá að fylgjast með hvernig svæfingin er hjá þeim því þau vinna öðruvísi en við og ég fékk barasta að sjá meirihlutann af því sem þau gera. Ég sá þá skipta um hjartaloku, gera hjáveituaðerð á hjarta og leggja inn gangráð. Enda átti starfsfólkið ekki til orð yfir hvað ég hefði verið heppin. Á morgun fer ég svo með Guðrúnu og Eiríki upp til Växjö þar sem við ætlum að gleyma okkur í dótabúð kannski að við kaupum einhverjar jólagjafir ef við munum eftir því (ég er ansi hrædd um að mig eigi eftir að langa að kaupa allt sem ég sé eða að minnsta kosti prófa það) :Þ Svo verður lokadjamm fyrir próf um kvöldið, jólapartý lyfjasviðs ég efast nú um að ég endurtaki leikinn frá því í fyrra og syngi fyrir þau á íslensku en aldrei að vita hvað verður!!! Jæja er að hugsa um að læra smávegis eða á ég bara að slaka aðeins á hmmmm Anna Dóra

1. des = oppna fyrsta gluggann á súkkulaðidagatalinu Allt í góðu gengi hér aðventan gengin í garð þannig að ég er byrjuð að skreyta. Setti í dag upp jólastjörnu í eldhúsgluggann og jólaseríu í stofugluggann er nefnilega að reyna að lauma jólaskapinu inn með próflestrinum. Annars finn ég að ég er að byrja að verða stressuð fyrir prófin og nettur hnútur kominn í magann sem ég efast um að hverfi fyrr en klukkan 2 þann 21. des þegar prófin eru formlega búin. Annars er afmælistíminn genginn í garð. Afi minn á afmæli í dag, Jóhanna skvísa á afmæli á föstudag, Edda frænka á laugardag og Binni sonur hennar á sunnudag þannig að til hamingju með það öllsaman. Ég hugsa til ykkar. Afmæliskveðjur frá Karlskrona Anna Dóra

Eini gallinn við það að hafa ekki þvottavél í íbúðinni hjá sér eru hinir sem virðast líka þurfa að þvo. Átti þvottahúsið um síðustu helgi en var barasta alltof slöpp til að nenna að druslast niður með allan þvottinn minn. Svo þegar ég ætlaði að panta nýjan tíma var ekkert laust nema í morgun þannig að ég er búin að standa á haus frá því klukkan 8 í morgun og þvo 2ja vikna uppsafnaðan þvott og ég get sagt ykkur það að skáparnir mínir eru því sem næst tómir. Annars er allt gott að frétta, djamm síðasta föstudag og annað næsta föstudag. Ætla reyndar næsta föstudag með Guðrúnu og Eiríki upp til Växjö og við ætlum í dótabúðaleiðangur í Toys'r'us ég hlakka svo til að það er ekki venjulegt. Bið að heilsa í bili, þvotturinn kallar Anna Dóra

Ímyndið ykkur þetta og hugsið hvað er að? Hversu langt eigum við eiginlega eftir að ganga með þessu svokallaða raunveruleikasjónvarpi? Piparsveinninn, piparjúnkan, ást eða peningar, survivor, robinson, farmen, hver vill giftast pabba mínum og ég veit ekki hvað. Núna það nýjasta gay or straight. Ung og hugguleg (nema hvað) dama ein með 14 karlmönnum, helmingur þeirra er samkynhneigður, allir eru þeir að keppa um ástir hennar, ef hún velur homma fær hann miljón dollara ef hún velur "rétt" fær hún peninginn HJÁLP hvað er að!!! Mér finnst reyndar ágætis framtak hjá einni sjónvarpsstöðinni hérna sem er að gera grín að þessum þáttum í formi jóladagatals. Í fyrra var það jólasveinninn á loftinu, 24 einstaklingar sem lifðu á möndlugraut og sælgæti og einn kosinn út á hverjum degi. Núna hver verður frú Sveinki 24 stúlkukindur að keppa um ástir Sveinka og byrjar 1.des ég er svo þreytt á þessu raunveruleika sjónvarpi að ég hugsa að ég bara kveðji að sinni. Anna Dóra ekki næsta frú Sveinki :-)

Þetta kalla ég þjónustu í lagi. Var semsagt að panta mér linsur í vikunni og hérna fær maður alltaf augnskoðun með hverri linsupakkningu bara til að þeir séu vissir um að maður sé ekki að fá linsur sem eru annaðhvort of daufar eða sterkar. Annars er ég frekar slappur núna, með verki um allan líkamann, reyndar hitalaus en mér virðist ekki ætla að hlýna þannig að öllum djammplönum kvöldsins verður frestað þar til um næstu helgi þar sem ég hef ekki tíma til að verða veik. Ég og Guðrún erum búnar að vera hrikalega duglegar að læra og komnar ágætlega af stað með síðasta verkefnið okkar, gengur hrikalega vel í vinnunni og höldum barasta að við séum bestar þó svo við segjum sjálfar frá. Jæja ætla að hugsa vel um mig í kvöld, á víst að mæta í vinnuna annaðkvöld. Kveðja Lasarusinn í Karlskrona

Þvílíkur dagur sem ég hef átt í dag. Í morgun í vinnunni var kvartað um að það væri of mikil ilmvatnslykt af mér og ég var send niður í sturtu........ það er nú oftast á hinn veginn að fólk kvarti frekar undan svitalykt heldur en góðri lykt c",). Fór svo á fyrirlestur og þegar ég kom tilbaka kallaði deildarstjórinn í mig, great hugsaði ég fæ ég fyrirlestur um ilmvatnsnotkun núna en nei hvað haldiði hún bauð mér VINNU þið eruð semsagt að lesa dagbókarfærlsu eftir nýjasta starfsmann svæfingadeildarinnar hér í Karlskrona JIBBÝ JIBBÝ endalaus gleði, ég er semsagt búin að fá afleysingastöðu á svæfingunni fram til ágústloka 2005 og þá er bara að sjá hvað gerist. Bið að heilsa frá gleðigeiminu á Snapphaneväg Anna Dóra sem er í þvílíka dúndurgleðiskapinu :-)

Laufabrauð

Hittumst í dag Íslendingarnir og gerðum saman laufabrauð og hlustuðum á jólatónlist, ekkert smá skemmtilegt- hávaðasamt en gaman.
Hitti líka starfsmannastjórann og deildarstjórann á bráðamóttökunni og fæ svo að vita meira í næstu viku hvernig þetta verður allt saman og Maggi, ég byrja ekki að vinna fyrr en eftir að þú verður farinn heim þannig að þú þarft ekkert að væflast um einn meðan ég er að vinna.
Setti inn smá myndir frá laufabrauðsgerðinni.
Verðum í bandi
Kveðja
Anna Dóra

Tatatatdammmmmmmmmm...............

Jæja þá er komið að því, ég hitti semsagt starfsmannastjórann hann Mats í dag og eins og staðan er í dag get ég því miður ekki fengið vinnu á svæfingunni fyrr en í haust en hann bauð mér stöðu á bráðamóttökunni hérna þangað til, sagði að þar væri ég vel geymd en ekki gleymd því þau hefðu mikinn áhuga á að fá mig síðan til starfa þau geta bara ekki ráðið mig í janúar. Ég var því bara mjög sátt, bráðamóttakan er mun betra en ekki neitt og svo verð ég dugleg að minna hann á mig. En svo er líka eins og hann sagði að ástandið getur breyst eins og hendi sé veifað og aldrei að vita nema hann þurfi fyrr á mér að halda inn á svæfinguna, ég bara vona hið besta. Á semsagt að hitta hann og deildarstjórann á bráðamóttökunni á föstudaginn kl 10, ætli það sé ekki til þess að semja um laun og annað.
Jæja ætla að fara og kíkja á Fab Five gaurana
Anna Dóra

Sat í dag að spjalla við Rúnu í símann þegar gemsinn minn byrjar að hringja, ég sé að það er hringt úr leyninúmeri þannig að ég segi við Rúnu, æj þetta er vinnan leyfum þeim að tala inn á talhólfið. Hringdi svo í talhólfið, þá var þetta ekki vinnan, heldur starfsmannastjóri eða hvað ég á að kalla hann af svæfingunni og hann ætlar að hitta mig á morgun um eittleytið og við ætlum að ræða um framtíð mína innan sjúkrahússins!!!!!! Vona að það sé jákvætt en I'll keep you posted.
Þannig að ég ætla að biðja ykkur að hugsa fallega til mín í hádeginu á morgun og það væri ekki verra að þið mynduð krossleggja fingurna c",)
Bjartsýniskveðja
Anna Dóra

Veit ekki hvort ég var búin að segja ykkur frá því en ég þekki hinn sænska Martein Mosdal. Aðalkennarinn í skólanum hann Sten aka Marteinn er svolítið einráður og það er hans leið eða engin leið sem er málið. Svo ég fái útrás á ykkur hinum líka þá stóð í stundaskránni að á planinu væri frí í viku 52 og svo setur hann prófin í byrjun viku 52 (20. og 21. des) ég benti nú kurteislega á að skv stundaskrá væri nú frí en fékk þá bara tilbaka að það væri bara á planinu það væri ekkert ákveðið og svo hlustaði hann ekki einu sinni þegar ég sagði að ég hefði pantað flugmiða heim um jólin eftir að ég hefði talað við hann og sem betur fer væri það 22. des þá bara hlær fíflið og segir mér að fara heim og leika við jólasveina og baða í heitu hverunum :-S þá gekk ég í burtu því annars hefði ég bæði sagt og gert eitthvað sem ég hefði séð eftir síðar. Það sem var verst við þessa prófdaga var að Maggi ætlaði að koma til mín þann 17. des, við ætluðum að jólaskapast hér í Karlskrona og Köben og fljúga svo saman heim, þannig að Maggi ákvað að breyta sínum miða og kemur til mín í janúar, líklegast þegar ég útskrifast og verður stuðningsfulltrúi frá fjölskyldunni á þessum "stóra gleðidegi", besta að losna við kennarann og óskipulagið sem virðist fylgja honum og þar af leiðandi náminu!!!
Jæja best að byrja á næsta verkefni
Anna Dora föst á Stensleið hinni "einu réttu"

Víkingarnir rúla............

Skellti mér á djammið með Carro og Jessicu í gær, smá hrekkjavökustemmari í gangi, var svo ásökuð um að hafa ofurfyllt stelpurnar (dettur ykkur slík fásinna í hug um mig) og þegar ég minnti þær nú á að við hefðum allar drukkið það sama þá flugu þau fleygu orð "Þú ert víkingur og þolir meira en við hin" hafiði heyrt það betra. Það var allavega hrikalega gaman þó svo að við höfum farið heim í fyrra lagi vegna ölvunarástands sumra. Í nótt breyttum við svo yfir í vetrartíma, frekar skrýtið að vakna klukkan 9 og þá var klukkan í raun bara 8, reyndar lítið getað sofið í dag, nágrannarnir fyrir ofan mig eru að flytja og búið að vera frekar mikið um brölt og læti af efri hæðinni í dag, slæmt mál fyrir mig sem á að vinna í nótt=þ

Jæja er að spá í að athuga hvort Caroline sé á lífi og hafi komist í vinnuna

Víkingakveðja

Anna Dóra

Góðan og blessaðan daginn og sælt veri fólkið, allt gott að frétta síðan síðast, orðin árinu eldri, veit nú ekki með vitrari en það á allt eftir að koma í ljós á komandi mánuðum.

Skellti mér í ræktina í morgun til að losa um helgarsamviskubitið og gerði mér lítið fyrir og pantaði mér tíma hjá sjúkraþjálfaranum til þess að hjálpa mér að setja saman æfingaprógram sem ég get þá farið eftir. Þó svo að ég kunni á flest þessarra tækja þá getur nú verið ágætt að fá smá sérfræðiálit á þessu öllu saman og ég held að ég fái svo meira út úr æfingunum ef ég fer að gera allt rétt eller hur. En lífið heldur áfram að ganga sinn vanagang hér á Snapphanevägen, ég mæti í skólann, læri (þykist alla vega gera það) og tek einstaka aukavaktir- maður getur nú ekki alveg sleppt kontaktinum við deildina, það var einmitt hringt í mig áðan og hvað haldiði mér voru boðnar kvöldvaktir sem ég þakkaði kærlega fyrir, skemmtileg tilbreyting frá næturröltinu.

Ætla að skella mér út að borða á miðvikudaginn með deildinni, erum að halda uppá 4 stórafmæli, það verður farið á gríska uppáhaldsveitingahúsið mitt hér í bænum, hlakka til.

Þar til næst, verið dugleg að hreyfa ykkur

Anna Dóra

Fiskinn minn, nammi nammi namm
Keyrði í dag samtals 400 km, 200 hvora leið til þess að kaupa íslenskan fisk. Ég og Guðrún pöntuðum semsagt íslenskan fisk sem ég sótti niður í Lund í dag og svo buðu Guðrún og Eiríkur uppá fiskinn þegar ég kom tilbaka og ég get sagt ykkur það að hann var hvers kílómeters virði og eiginlega meira en það, þannig að núna á ég 4,5 kg af fiski í frystinum þvílíkur lúxus.
Annars allt gott að frétta, dómur féll í gær á því hvernig ég hef staðið mig í verknáminu og að sjálfsögðu var ekkert nema gott sagt um mig c",) og ég stóðst fyrri hluta verknámsins.
Sé fram á hrikalega spennandi og skemmtilegan afmælisdag á morgun, umræðufundur frá 9-15 en hei það gæti verið verra (alltaf að leika pollýÖNNU). Fékk reyndar pakka í gær svona fyrirfram frá Caroline svakalega flott veggskraut sem má bæði nota sem kertastjaka eða fyrir smáblóm.
Smá kveðjur, Mæja pæja til hamingju með gærdaginn og Rúna til hamingju með morgundaginn
kram
Anna Dóra orðin afmælisbarn eftir 2 klst

Þó svo að ég sé að verða búin að búa hérna í 1 1/2 ár hættir þetta ofurupplýsingaeðli Svíanna ekki að koma mér á óvart. Á hverjum laugardegi er lítill pistill í blaðinu um það hvar lögreglan verði að hraðamæla komandi vikuna (enginn feluleikur hér, við viljum nefnilega ekki ná í rass...... á þeim sem eru að keyra of hratt) og svo er annar með matseðlum fyrir skólana og elliheimilin, like I care, kemur skólamatseðillinn fyrir foreldrana svo þeir geti þá sent nesti með barninu ef þeir vita að barnið eigi ekki eftir að borða þann daginn :-) ég á ábyggilega aldrei eftir að skilja Svíana til fullnustu, en ef einhver gerir það kalla ég þann sama mjög góðan.
Jæja þá er að snúa sér að lærdómnum,
Anna Dóra nývöknuð eftir næturvaktina
P.s Raggi til hamingju með daginn í gær

Púff ef ykkur fannst Íslendingarnir fá rassskell í gær hefðuði átt að mæta með mér í vinnuna í morgun. Heyrði ýmist "ykkur gekk ekki alltof vel í gær" eða "4-1" en diplómatinn Anna Dóra var fljót að segja "nei en Svíarnir spiluðu mjög vel" og þá urðu allir mjög ánægðir.
Annars allt gott að frétta, fæ að vita í næstu viku hvað handleiðurunum finnst um mig, hvort ég sé algjör njóli úti á hóli eða hvort ég viti eitthvað í minn haus, við eigum nefnilega að hittast með kennaranum og fara í gegnum það hvernig ég hef staðið mig- hjálp fæ ég allt bullið í hausinn-
en má ekki vera að þessu blaðri núna
verðum í bandi- þar til næst....................................
Anna Dóra
P.s til hamingju með daginn Ninna Rós

ZZZZzzzzzzzzzzzzzzzzzzzzzzz
Dagurinn í dag, byrjaði á því að ég svaf yfir mig, vaknaði kl. 9 og átti að vera mætt 8:30, hrökk upp, hringdi til að láta vita af mér, henti mér í sturtuna og svo beint út, fór reyndar í föt þar á milli ;-). Þegar ég svo kom í vinnuna var handleiðarinn minn í besta skapi og fannst þetta nú ekki mikið mál við myndum bara byrja á því að fá okkur kaffi í rólegheitunum, hitti svo Guðrúnu sem sagði að við ættum að mæta í skólann á umræðufund kl 13 sem ég var búin að afskrifa og var þar af leiðandi ekki nógu vel undirbúin en það gekk vel engu að síður- vona ég alla vega.
Helgin var reyndar mjög fín, skellti mér með stelpunum á hinn eina sanna schlagerbar, dró Huldu og Guðrúnu með, og svo var matarboð hjá Huldu og Steina í gær ekkert smá gott.
Jæja bið að heilsa í bili, lofaði Maríu handleiðaranum mínum að lesa heima fyrir það sem við ætlum að gera á morgun.
Kveðja
Ein sem hafði stór orð um það í gær að hún ætlaði að fara að taka sig á, að vera ekki alltaf á síðustu stundu=)

Rólegheit, rólegheit = Anna Dóra kannist þið við það
Í morgun þegar ég var að ganga í vinnuna var ég það heppin að ein bekkjasystir mín keyrði framhjá mér og pikkaði mig upp, hún þekkti mig nefnilega á rólega göngufasinu, hún sagði ég vissi að þetta væri þú því þú ert aldrei á hraðferð c",)
Annars allt gott að frétta, gengur vel í skólanum- nema hvað.
Jæja bið að heilsa í bili úr rólegheitunum
Anna Dóra
P.s til hamingju með daginn Eiríkur

Það er greinilegt að það er að styttast í afmælið mitt, átti í þvílíkri tilvistarkreppu í gær allt var ómögulegt og ég að verða hrikalega gömul, ef ég á að vera hreinskilin þá var þetta svolítið svona Bridget Jones meets sex and the city dæmi. En I slept it off og líður mikið betur núna, það skrýtnasta við þetta allt saman er að ég hef ekki upplifað svona aldurstengda krísu áður- nóg um það.
Merkisdagur í dag, Lilja vinkona og Villi frændi minn eiga afmæli í dag, og svo er Sigrún frænka mín að skíra litlu prinsessuna sína.
Kveðja
Anna Dóra

Sæl og blessuð öll saman. Skipulagið sem ég minntist á við ykkur síðast gengur barasta mjög vel, reyndar er ég best (eins og þið kannski þegar vitið) í því að njóta lífsins en það þarf líka. Núna er ég í heilsuátaki, búin að bóka deit í ræktina í fyrramálið. En síðan síðast er ég búin að svæfa fyrsta barnið mitt og gekk bara vel, svæfingalæknirinn reyndar ekkert svona hrikalega uppörvandi, hann var að fræða mig um hve auðvelt væri að halda opnum loftvegum hjá börnum, þau gerðu það að mestu leiti sjálf, ef barnið fengi ekki loft þá væri það vegna þess að ég hefði kyrkt það- einmitt það sem ég vildi heyra þar sem ég stóð og hélt maska yfir barnsandliti :-S
Í vikunni þreytti ég líka frumraun mína í sultugerð, gerði chilipaprikusultu og tókst svona hrikalega vel, hún bragðast allavega vel og það er fyrir mestu ekki satt.
Bið að heilsa ykkur í bili þar til næst...............
Anna Dóra

Síðan síðast er ég búin að
............ fá aðra kveðjugjöf frá deildinni, það var víst staðið fyrir söfnun og fékk ég 2 rosalega flotta trékertjastjaka og 2 myndir, önnur með fílum og hin með zebrahestum (þau þekkja Afríkustílinn minn)
........... vita ekki hvernig ég átti að vera þegar mér var færð kveðjugjöfin í fordrykknum heima hjá Lindu
.......... mæta í kveðjupartýið sem endaði heima hjá lækninum, hann er að reyna að selja íbúðina sína og vildi hávaða og læti svo nágrannarnir myndu borga með íbúðinni NB!! engan misskilning hér, ég fór ekki ein í eftirpartýið
......... vera í partýinu til 04 sem ég held að sé met hjá Svíum !!!
......... reyna að setja saman ritgerð í stjórnun

Þar til næst ætla ég að
............ vera langt komin með þessa blessuðu ritgerð
........... vera dugleg að læra þar sem ég á von á yfirheyrslu um skammtastærðir og ýmislegt fleira í næstu viku
.......... byrjuð að æfa á fullu a.m.k fara út að labba x 3 í viku
.......... halda áfram að njóta þess að vera til og láta mér líða vel
hej då så länge
Anna Dóra

Hæ hæ ætlaði bara að segja ykkur að ég var að setja inn myndir frá Búlgaríu.
Annars allt gott að frétta, gengur vel í verknáminu, verst að geta ekki notið þess, alltaf einhver verkefni sem bíða.
Stefnan tekin á deildarpartý annaðkvöld og hefst fordrykkur heima hjá Lindu kl 16,
Party on Wayne
c",)

Hverjar eru líkurnar á þessu!!!
Annar handleiðarinn minn hún Cecilia er líka eineggja tvíburi og 5 mínútum yngri en systir hennar, nákvæmlega eins og ég og Rúna.
Hérna kemur smá skoðanakönnun:
Hef undanfarna viku bæði á leiðinni í vinnuna og heim gengið framhjá fugli (veit svo sem ekki hvort þetta sé alltaf sami fuglinn) sem gengur út á götuna og hoppar svo í burtu áður en bílarnir koma. Nú er spurningin
a) Hann er leiður á lífinu og er í sjálfsvígshugleiðingum, á bara erfitt með þessa ákvörðun
b) Hann er með gráa fiðringinn og þetta er hans leið til að sýna dömunum hversu kúl hann er þar sem hann hefur ekki efni á blæjubíl
Hvað haldið þið, orðið er frítt!!!
Kveðja
Anna Dóra

Mental note to self: Ekki bera á mig vellyktandi kókoskremið mitt áður en ég fer í vinnuna
Þar sem ég er frekar þurra húð eftir vikuna í sólinni og sjónum er ég búin að vera bera á mig hrikalega gott og feitt krem frá body shop, gerði ekki alveg ráð fyrir því að lyktin myndi halda jafn lengi og hún gerir og varð því frekar hverft við þegar einn svæfingalæknirinn kom inn á stofuna þar sem ég var að svæfa sjúkling og sagði "er ég að verða vitlaus eða er kókoslykt hér inni" ég vissi uppá mig sökina og varð því að gefa mig fram sem eiganda lyktarinnar, svona var þetta allan daginn sama hvar ég fór alls staðar heyrði ég "finniði kókoslyktina" ekki slæmt að það sé svona góð lykt af manni en þetta var kannski ekki alveg rétti staðurinn fyrir það.
kveðja
Anna Dóra Kókosgella

Þá er ég komin aftur heim eftir alveg hrikalega skemmtilega ferð. Ætla að gefa ykkur smá ferðasögu. Best að segja samt að Albena þar sem við vorum er alger ferðamannastaður, allir kunnu einhverja frasa á þýsku og sænsku, ég hef aldrei talað jafn litla ensku og í þessarri ferð!! Þjónarnir læra spes sænsku og þýsku til að geta gert sig betur skiljanlega við eldra fólk, sniðugt en samt skrýtið.
Dagur 1
Lentum á flugvellinum í Varna um 13 og allt gengið mjög vel, ég ætlaði reyndar aldrei að komast í gegnum vegabréfsskoðunina, hann rýndi og rýndi í vegabréfið mitt, snéri því á alla kanta og ég veit ekki hvað, spurði svo loksins hvaða stafur þetta væri og benti á LL í Halldóra hvort þetta væri W ég gat nú sagt honum að þetta væru 2 L og hann stimplaði vegabréfið mitt og hleypti mér í gegn. Við komust svo heilar á höldnu á hótelið í Albena, ekkert smá fallegt en þurrt landslag, heilu akrarnir af sólblómum sem hefðu verið meiriháttar ef þau hefðu verið enn í blóma. Hótelið var mun betra en við áttum von á, búið að lýsa því fyrir okkur sem mjög gömlu og slitnu sem það var en samt betra. Ég var í herbergi með Carro og Jessicu og við skiptumst á að sofa á aukabeddanum því það var gamall tréhægindastóll sem var útdreginn, u.þ.b. 20 cm bil þar sem hnén komu og það var um að gera að snúa sér reglulega til að forðast legusár svo harður var hann, en við lifðum þetta af eins og allt annað. Kíktum svo aðeins á ströndina til að kanna aðstæður og fengum okkur svo að borða og þá kom líka þessi hrikalegasta rigning sem við höfum séð en þetta var bara "skúr" sem gekk yfir á klst. Saddar og þreyttar eftir langan dag fórum við uppá hótel að sofa.
Dagur 2
Eftir morgunmat var slappað af á ströndinni og ákveðið að kíkja svo á lífið í bænum um kvöldið. Við komum við í næstu búð og keyptum okkur vínflösku og hittumst svo inni á herbergi, kíktum svo á hótelbarinn, þetta dróst svo hrikalega hjá okkur að um miðnættið þegar við kíktum út, var allt að loka og við fengum náðarsamlegast að kaupa samlokur á einhverjum barnum sem við löbbuðum framhjá, fengum svo að vita daginn eftir að ferðamannatímabilið er bara út sept. þannig að það var orðið frekar rólegt í bænum. Þannig að ekki varð mikið úr djamminu í þessarri ferðinni.
Dagur 3
Fórum í verslunarferð til Varna, fengum næstum paník á útimarkaði sem við kíktum á, yfir ágengni sölumanna allir vildu selja okkur peysur, boli, skó, nærföt eða töskur og voru ekkert að sleppa okkur. Við enduðum reyndar allar á því að kaupa okkur Diesel peysur á 1200 kr íslenskar og vorum svo fljótar að forða okkur sem var kannski eins gott, því þessar hlýju peysur björguðu okkur alveg, um leið og sólin hvarf fór hitinn nefnilega líka og kvöldin voru ísköld. Um kvöldið fórum við svo í fyrsta skipti út að borða á Poco Loco veitingastað þar sem þjónarnir dansa og við erum að tala um ekkert smá flott show hjá þeim, lifandi tónlist þannig að í rauninni fær maður dinner and a show, stelpurnar féllu kylliflatar fyrir þessum sætu þjónum þannig að þetta varð okkar staður, var reyndar eini staðurinn þar sem var eitthvað líf þannig að þetta var svo sem í lagi.
Dagur 4
Slappað af á ströndinni hrikalega háar og lokkandi öldur en bannað að fara í sjóinn einmitt þegar mann langaði til þess sem mest, en best að hlíða strandvörðunum, kíkt í búðir, fengum nýja nágranna, Svíar öðrum megin og frekar spúkí Rússi hinum megin sem sagðist vera demókrati og skrifa fyrir einhvern sem var gerður útlægur (hugsa að það sé einhver georgíumaður, kannaðist alla vega við það úr fréttum) en við reyndum bara að forðast þennan kall og fórum svo út að borða á Poco Loco um kvöldið mér var boðið upp 2svar og fékk svo lítinn hjartalímmiða að launum fyrir =) ekkert smá gaman.
Dagur 5
Fórum í bátsferð út frá Balchik, ekkert smá fallegur dagur, ákvað samt að taka sjóveikitöflu svona fyrirbyggjandi og sem betur fer, því það var frekar lúmskur öldugangur. Carro greyið varð svo sjóveik að hún bara lá kyrr og naut ferðarinnar engan veginn. Um hádegið var stoppað í vík (frekar óspennandi) og manni boðið að synda, veiða á handfæri eða bara njóta góða veðursins meðan skipstjórinn undirbjó handa okkur hádegismat. Þar sem sjórinn var frekar skítugur þarna, ýmislegt rusl á floti ákvað ég að reyna að fiska sem gekk reyndar ekki fiskurinn frekar latur svona í góða veðrinu, kastaði reyndar prikinu sem hélt færinu fyrir borð en skipstjórinn bjargaði mér og sótti það með háf. Það fyndnasta við þessa bátsferð var að þarna í Búlgaríu voru samankomin á þessum bát, 3 búlgarar (fararstjórinn og tveir af bátnum) 6 Svíar, 1 Norðmaður, 2 Finnar og Íslendingurinn Anna Dóra vantaði bara Dani og þá hefðum við getað stofnað nýtt Norðurlandaráð =) Fórum svo að borða nema hvað á Poco Loco um kvöldið, vorum farnar að kunna prógrammið utanað og ég var búin að benda stelpunum á að mér fyndist þetta eiginlega orðið neyðarlegt að fara alltaf svona á sama staðinn en þetta var eini staðurinn þar sem var eitthvað um að ske og ég var 1 á móti 4 þannig að ég fékk að bakka.
Dagur 6
Ég, Caroline og Jessica ákváðum að gefa húðinni smá frí frá sólinni (líka af því að það var svo kaldur vindur) og kíkja í búðir. Held við getum sagt að við séum búnar að bjarga efnahag þeirra Búlgara sem hafa sumaraðstöðu á Albena. Ég verslaði a.m.k allar jólagjafirnar þannig að ég ætla ekki að segja hvað ég keypti, allt var á útsölu því ferðamannatímabilið fer að hætta. Ákváðum reyndar um kvöldið að fara á nýjan veitingastað, sænskan stað en viti menn, þjónarnir af Poco Loco komu hlaupandi með matinn, þá var þessi sænski staður hluti af einhverri keðju 3ja staða sem voru með sitthvorn matseðilinn eldaðan í sama eldhúsinu og borinn fram af sömu þjónum =0)
Dagur 7
Hrikalega kaldur vindur samt 25°C þannig að við ákváðum að gefa Varna annað tækifæri bara forðast þennan hrikalega markað sem við fórum á síðast. Nú gekk allt mikið betur við fórum reyndar á annan markað og merkilegt nokk keyptum bara ekki neitt. Annars virðist Búlgurunum nægja smá hola mestalagi 2x5 metrar þá er skellt upp hillum og opnuð búð enda gerðum við mikið af því að skoða í búðarglugga, hættum okkur ekki alveg inn í búðirnar.
Þar sem þetta var síðasta kvöldið fórum við út að borða á Poco Loco og Carro fékk að dansa við strákinn sem henni fannst svo sætur, bjargaði fríinu hennar!!
Dagur 8
Áttum að skila herberginu kl 12 og fjandans já ég segi fjandans ræstinakonurnar voru komnar inn á herbergin að þrífa áður en við vorum komnar út og skildu náttúrulega ekki stakt orð í ensku þegar við vorum að reyna að útskýra að við værum að fara hvort þær gætu komið seinna =(. Dagurinn var svo tekinn létt, slakað á við sundlaugina á næsta hóteli (hvorki sundlaug, né morgunmatur á okkar hóteli við fórum á hótelið við hliðina á á morgnana) svo kíkt í bæinn og reynt að eyða síðustu levunum okkar, borðuðum svo á sænska staðnum (stelpunum langaði svo í fisk og kartöflumús) og svo var haldið heim á leið. Að sjálfsögðu lenti ég aftur í vandræðum í vegabréfaskoðuninni þeir snéru vegabréfinum mínu á alla kanta og skoðuðu hverja síðu, hleyptu mér svo að lokum í gegn en komu svo á eftir mér og báðu um að fá vegabréfið mitt lánað í 2 mín. ég náttúrulega varð eins og eitt spurningamerki í framan og spurði why? þá kom maður sem talaði ensku og útskýrði að þetta væri svo þeir gætu lært hvernig íslenskt vegabréf liti út (ég er farin að halda að ég sé fyrsti Íslendingurinn sem hefur stigið fæti sínum til Varna og Albena) þannig að gott fólk afrit af vegabréfinu mínu er notað sem kennslugagn fyrir flugvallarstarfsmenn í Varna, kosturinn reyndar að ef ég kem aftur þá ættu þeir að þekkja mig c",)
Jæja bið að heilsa í bili, ætla að kíkja í lærubækurnar, búin að þvo hrikalega er ég dugleg, læt ykkur svo vita þegar ég hef sett inn myndir.
Anna Dóra kennslugang í því hvernig íslenskt vegarbréf lítur út

Förum saman í ærlegt sumarfrí svona sungu Stuðmenn hér um árið og það ætla ég að gera núna, við leggjum af stað héðan kl 04:30 í nótt og eigum svo flug frá Malmö einhvern tíma milli 9-10 í fyrramálið, þó svo að það taki bara 2 -2 1/2 klst að keyra niðureftir þá held ég að bílstjórinn okkar hún Jessica sé svolítið stressuð að keyra með svona fullan bíl af fólki þannig að hún vill leggja tímanlega af stað og ég meina she's the boss hún á bílinn.
Annars er ótrúlegt hvað fólk leggur á sig fyrir dýrin sín, ég er sjálf mikill dýravinur en mér finnst hundar ekki eiga heima í blokk, það er par fyrir ofan mig (3.ja hæð) sem var að fá sér Schäffer hvolp og þar sem hvolpgreyið á bágt með stigana ennþá eru þau hlaupandi með greyið í fanginu upp og niður mörgum sinnum á dag til að hleypa honum út að gera stykkin sín (við vitum hvernig hvolpar eru, sífellt að tæma) persónulega finnst mér að ef maður vill eiga hund þá verður maður að hafa garð.
Verð annars að deila með ykkur dýrasögu fyrst ég er byrjuð. Í gærkvöldi sauð Rúna systir fisk sem er svosem ekki í frásögur færandi nema það að Halldór Óskar horfir á diskinn sinn og segir "þetta er Nemó" ég hélt ég yrði ekki eldri ég hló svo mikið þegar ég fékk að vita þetta.
Jæja þá ætla ég að fara að pakka og þrífa íbúðina fyrir fríið, það er svo mikill munur að allt sé hreint þegar maður kemur heim.
Anna Dóra í nettum sumarfíling

2 dagar í sumarfrí....
Suma daga er maður meira mis en aðra, í dag t.d. æltaði ég að vera rosalega dugleg, þvo og svoleiðis fyrir utan að læra heima náttúrulega. Kom heim um 4 úr skólanum og drusla nú þvottinum niður í þvottahús og þegar ég kem niður er einhver byrjaður að þvo í mínum þvottatíma ég setti auðvitað saman nokkur velvalin orð sem eiga ekki heima hér fyrir þessa frekju og verður þá litið á töfluna þar sem maður pantar tíma og viti menn ég á þvottahúsið á morgun, ég var alveg viss um að ég hefði pantað þvottahúsið í dag svo allt væri nú þurrt og fínt þegar ég kæmi heim úr skólanum á morgun og gæti bara byrjað á því að pakka- nei nú verður þvegið, ofurkrafturinn settur á þurrkherbergið.
Þökk sé þessrri nútímatækni þá er ég að fara í saumaklúbb heima annaðkvöld, jú MS-gellurnar ætla að hittast og Ásdís pæja er með vefmyndavél þannig að ég ætla að kíkja við hjá þeim, verst að ég geti smakkað á góðgætinu sem í boði verður.
Jæja ætli það sé ekki best að fara að sofa, umræðutími á morgun í skólanum mikið hlakka ég til (sá einhver kaldhæðnina í þessu)
Bið að heilsa í bili og óskið mér góðs gengis á morgun
Anna Dóra, eitthvað frekar mis í dag

Svíar og sund = fyndið
Skellti mér í sund í morgun með Guðrúnu og það var nú bara hellingur af fólki í lauginni sem syntu næstum allir eins og aldraðir Íslendingar með höfuðið uppúr (NB! mikið af ungu fólki og fólki á miðjum aldri líka) við íslensku skvísurnar tókum nú bara 500 metrana the Icelandic way snabbt og effektivt. Svo þegar við vorum að stíga uppúr lauginni kom baðvörðurinn til okkar og spurði hvað lægi á, hvort við værum að stefna á úrslit í næstu ólympíuleikum eða hvað, þetta væri nú illa gert gagnvart hinum að synda svona hratt. Við bara vissum ekki hvaðan á okkur stóð veðrið og bara brostum að kallinum sem sagði okkur að synda rólega áður en hann kvaddi okkur.
En bara 4 dagar í sumarfrí
kveðja
Anna Dóra

Kveðjugjöfin
Sætir þessir samstarfsmenn mínir á hjartadeildinni, þetta fallega blóm fékk ég í kveðjugjöf og svo var búið að panta tertu sem við gæddum okkur á í nótt, reyndar ekki mjög hjartavæn terta frekar í hina áttina alger kólesterólbomba en mjög góð engu að síður. Þannig eru nefnilega hjartahjúkkur prédika yfir sjúklingunum um heilsusamlegt líferni en fylgja því kannski ekki til hins ítrasta sjálfar.
Anna Dóra

Gleði, gleði gleði........... ég er búin að kaupa ferð heim um jólin, kem heim 22. des. og fer svo heim aftur 2. jan. þó svo ég eigi heima hérna þá finnst mér alltaf jafn ruglandi þegar kemur að því að fara til Íslands, þó svo ég búi ekki þar lengur þá er það alltaf heim, svo bý ég hérna og þetta er líka heima (jæja ef þið eruð orðin rangeygð af rugli-velkomin í hópinn).
Annars önnur gleðifrétt, eðlumaðurinn af neðri hæðinni er fluttur (allt í lagi smá útskýring fyrrverandi nágranni minn er með eðlu fyrir gæludýr) þó svo hann hafi aldrei valdið mér neinum ama þá finnst mér gott að vita til þess að eðlan sé horfin út úr húsinu, ég hef aldrei skilið þá sem vilja eiga svona "gælu"dýr, þetta er eins og allir Svíarnir sem eiga skjaldbökur sem "gælu"dýr what's the point maður getur hvorki klappað þeim né faðmað þær, en svona eru þessir rugludallar.
Spáið í það á þessum tíma eftir viku verð ég að sóla mig á strönd svartahafsins.
Síðasti vinnudagurinn minn er í nótt, eftir það þarf ég að stóla á veikindi annarra til að koma inn að vinna (hræðileg tilhugsun) þannig að hugsiði fallega til Lín sem eru að taka afstöðu til þess hvort ég eigi rétt á námsláni eða ekki, kræst ég get orðið titlað mig sem fátækan námsmann og meint það.
Kveðja
Anna Dóra

Í skólanum í skólanum er skemmtilegt að vera.............. reyndar misskemmtilegt eftir efni. Er í kúrs um stjórnun og skipulag sem er ekki sá skemmtilegasti sem ég hef tekið þátt í, kannski vegna þess að það er mikið vísað í sænsk lög og reglugerðir sem ég er ekkert inní og hef ekki svo mikinn áhuga á þeim heldur. Einn kennarinn minn er svæfingahjúkka og hann var að forvitnast um verkefnin og fannst frekar skrýtið að þau væru öll tengd stjórnun, ekki því mikilvæga starfinu sjálfu.
En annars er allt gott að frétta, styttist í sumarfrí og ég hlakka sko til, önnur ánægju og gleði frétt er að ég ætla að koma heim um jólin í 2 vikur, Maggi kemur til mín í nokkra daga og svo förum við samferða heim, ég á nefnilega 2ja vikna jólafrí ef frí skyldi kalla því við byrjum svo á hálfgerðu prófi/kynningu á ritgerð strax 3.jan. og svo er síðasti skóladagur 14. jan.
En nú er bara að reyna að byrja að læra svo ég sé nú komin af stað áður en ég fer í frí.
kveðja
Anna Dóra

Til hamingju með daginn Rúna og Eiríkur
Tíminn er ekkert smá fljótur að líða, það er ár liðið síðan Rúna og Eiríkur giftu sig mér finnst svo stutt síðan við vorum að flippa í gæsaveislunni og semja lagið sem við tókum í brúðkaupinu sem var svo bara Ekkert mál.....
Áður en ég veit af verða þau komin með fleiri börn og einbýlishús og ég skil ekkert í því að tíminn líði svona hratt því ég held að ég sé föst í einhverju öðru tímatali heldur en flestir aðrir því tíminn líður hægar hjá mér c",)
Jæja ætla að hætta þessu bulli og reyna að gera eitthvað sniðugt
pappírsbrúðkaupskveðjur frá Karlskrona
Anna Dóra

Þá eru þau farin og ég aftur orðin ein í kotinu. Nú styttist í að skólinn byrji en ég byrja skv stundaskrá á miðvikudaginn og held barasta að ég sé farin að hlakka til þið þekkjið þetta "Í skólanum í skólanum er skemmtilegt að vera........" Ótrúlegt að eftir nokkra mánuði verð ég orðin svæfingahjúkrunarfræðingur, hitti einmitt handleiðarann minn í vinnunni í nótt og hún var að spyrja hvenær ég kæmi í verknám, þannig að það virðist sem við fáum að halda sama handleiðara, jibbý því ég var mjög ánægð með minn. Heyriði styttist í Ísland-Rússland, ég ætla að fara að gera mig klára, setja upp víkingahjálminn og styðja mína menn svo undir taki í blokkinni.
Áfram Ísland
Anna Dóra
P.s. var að setja inn myndir frá því að mamma, pabbi og Helga Dís voru hjá mér, endilega lítið við

Hann á afmæli í dag tralalalalalala....... hann á afmæli í dag.
Til hamingju með daginn Maggi hafðu það sem allra best í dag
Í gær fengum við okkur þann mesta skrímslaís sem ég hef á ævinni séð, græðgin er að gera útaf við mann. Fórum semsagt í Glassieren sem er aðalísbúð bæjarins og fengum okkur sérréttinn þeirra, tvær bragðtegundir af kúluís og svo mjúkan ís ofaná í nýbakaðri vöfflu, þetta var það mikið að ísfólkið (Anna Dóra, Nannfríður og Helga Dís) gátu ekki klárað ísinn sinn og ég efast að það hafi gerst áður í sögu ísfólksins, pabba hins vegar nægði að sjá skrímslið til að verða saddur.
Afmælis- og ískveðjur frá Karlskrona
Ísfólkið c",) c",) c".) c",)

Var að gera myndasíðu, nú getiði virkilega fylgst með mér í máli og myndum. Setti link hér við hliðina.
Góða nótt
Anna Dóra

Þá er það ákveðið, við ætlum til Búlgaríu og stelpurnar ætla að fara og panta ferðina í dag. Gaman að fara á svona nýja staði og kanna ótroðnar slóðir.
Annars er lífið ljúft, mamma og pabbi stjana í kringum mig (átti svo sem ekki von á öðru) og svo erum við búin að skoða margt og mikið, fórum m.a. í frábæra siglingu um skerjagarðinn og báturinn sigldi svo hratt með vindinum að áður en við vissum af fengum við ískalda gusu úr Eystrarsaltinu yfir okkur, þá ákváðum við að sólin fengi að bíða, við myndum sitja inni. Í gær fórum við svo og versluðum föt og ýmsar aðrar græjur meira að segja ég fataði mig upp fyrir skólann og keypti mér ný gleraugu.
Við biðjum að heilsa héðan frá Karlskrona, ætlum í Wamöpark að skoða og svo á kaffihús sem er staðsett uppi á útsýnispalli.
Anna Dóra og fjölskylda

Tjeisemester....... við ætlum í sumarfrí, ég er búin að ákveða mig, ætla að skella mér með stelpunum í vikuferð í sólina núna í byrjun september, hvert við ætlum er ekki ákveðið, erum að spá í Króatíu en ekkert er ákveðið bara að það sé sól þá erum við ánægðar. Ég á þetta líka skilið, er búin að vinna næstum allt sumarið, ég missi reyndar þrjá daga úr skólanum en vona að Guðrún taki fyrir mig glósur. Við ætlum að fara á morgun eftir vinnu niður í bæ og kíkja á ferðaskrifstofur og sjá hvað er í boði. Þetta verður frábært, ég hef ekki farið áður í svona stelpuferð, þó svo að Spánn '99 hafi verið vinaferð þá var það öðruvísi, núna erum við 5 gellur sem ætlum að leggja land undir fót og njóta þess að vera til.
Annað skemmtilegt sem gerist á morgun eftir vinnu er að mamma, pabbi og Helga Dís koma til mín og verða fram á laugardag, ég er svo sjálfselsk að um leið og ég vissi að þau voru lent í Köben þá vildi ég bara að þau kæmu beint til mín og slepptu því að kíkja á Röggu syss, allt í einu voru þau svo nálægt en samt svo langt í burtu, ég finn alltaf þegar einhver er á leiðinni hversu mikið ég sakna þeirra (sjá allir duldu skilaboðin- ég vil fá ykkur í heimsókn) svona þykir mér ofboðslega vænt um ykkur. Hjálp ég held ég fari að hætta þessarri væmni áður en flóðgáttirnar opnast.
Bið að heilsa í bili
Anna Dóra

Hef verið að velta einu fyrir mér undanfarna daga, hvort þetta sé eitthvað sem er innbyggt í okkur Íslendinga eða hvað. Ef það er gott veður þá fæ ég samviskubit yfir að sitja inni þó svo að ég viti að ég þurfi að vera inni og gera eitthvað, mér finnst bara eins og ég eigi að vera úti í góða veðrinu, sænskar vinkonur mínar virðast ekki eiga við sama vandamál að stríða=)
Ætli þetta sé ekki eitthvað í okkur Íslendingum, ég heyri bara í mömmu minni segja ekki hanga inni í góða veðrinu c",)
Kveðja frá Karlskrona,
Anna Dóra með samviskubit að bíða eftir þvottavélinni í góða veðrinu
P.s Til hamingju með daginn Eiríkur, góða skemmtun í sveitinni
Kræst var næstum búin að gleyma að segja ykkur frá því að ég hélt ég myndi deyja í gærkvöldi og ég er ekki að ýkja. Sá þessa líka flennistóru köngurló sem minnti mig bara á skrímslin í arachnachphobia myndinni (ok smá ýkt kannski en hún var eins og þessar minni sem voru út um allt eins og þessi í poppskálinni), ég er ekki að grínast en ég kaldsvitnaði og gólfið fór á hreyfingu en sem betur fer bjargaði Eiríkur mér þetta var skelfileg lífsreynsla, ég vona að ég sjái svona ekki aftur nema kannski í sjónvarpinu =(

Hæ hæ lífið gengur sinn vanagang hér í Karlskrona, stelpurnar úr vinnunni eru að koma til mín á eftir í smá saumó eða að "fika" eins og það kallast hérna og þar sem það er smá íslenskur stíll yfir þessu hjá mér (nema hvað) þá vona ég að þær séu svangar....
Annars er ég að fara í bólusetningu á morgun, datt allt í einu í hug að láta athuga hjá mér mótefnavaka gegn lifrarbólgu B því ég fékk mína bólusetningu '98 og hvað kom í ljós, jú ég hef enga vörn gegn lifrarbólgu B þannig að ég mæli með því að þið sem eruð með "gamla" bólusetningu látið athuga ykkur, þetta er jú ekkert sem maður vill taka sénsinn á.
Jæja þá er að fara og leggja lokahönd á herlegheitin áður en gellurnar láta sjá sig
Bless í bili
Anna Dóra

Sól sól skín á mig................ það er búið að vera alveg geggjað veður um helgina, sól sól og aftur sól. Keyrði á föstudagsmorguninn niður til Köben að sækja Guðrúnu, Eirík og Guðfinnu Ósk, 27°C og ég sem var bara í stuttbuxum og hlýrabol hélt ég myndi gjörsamlega andast í bílnum og var svo límd við sætin þegar ég kom loks til Köben að það var ógeðslegt... Anyhow við áttum góða 2 daga í Danaveldi, kíktum með Guðfinnu í dýragarðinn, ég veit ekki hvort það var ég eða hún sem skemmti sér betur=) og dóluðum okkur svo á strikinu í gær áður en við lögðum á stað heim. Eins og þið vitið er fullt af götulistafólki og bara almennt skrýtnu fólki á strikinu. Við sáum m.a. það sem spaugstofan kallaði nýaldarfólk, lítill hópur fólks í hálfgerðum munkakuflum, rakað höfuð (sumir skildu eftir nokkur strá í hnakkanum) með munkahljóðfæri, hoppandi, skoppandi og syngjandi hare krishna hare krishna............. sama línan aftur og aftur, líklega leiðigjarnt til lengdar. Maður hefði kannski dottið inn í svona nýaldar fíling ef ekki hefði verið fyrir glæsilegan skóbúnað þeirra, ýmist flottir strigaskór eða glænýir eccosandalar=) passaði ekki alveg við restina af ímyndinni.
Anyhow þá komumst við að lokum heim (augljóslega), sveitt, þreytt en ánægð með lífið. Svo er bara að drífa sig aftur út í sólina og svo ætla ég út að grilla, spila Kubb(einhver sænskur leikur) og jafnvel minigolf í kvöld.
Sólarkveðjur frá Karlskrona
Anna Dóra

Eins og þið vitið er fullt af rugluðu fólki sem gengur laust......
Ég leit við í sjoppu um daginn til að kaupa frímerki og bað eins og venjulega um frímerki til Evrópu og sjoppukonan lítur grafalvarleg á mig og segir það er ekkert til lengur sem heitir Evrópa, ég sem varð eins og spurningarmerki því eftir því sem ég best vissi var búið að handsama Saddam og ekkert í fréttum um heimsyfirráð Bush ennþá. Nei nú selur pósturinn bara frímerki innanlands eða utanlands og það var það sem konugreyið átti við, engu að síður skemmtilegt orðaval hjá henni.
Kveðja
Anna Dóra, Karlskrona, Svíþjóð, Evrópu

Í dag er stór dagur
2 mikilvægustu mennirnir í mínu lífi eiga afmæli í dag, Pabbi minn og Óskar "bróðir" aldurinn skiptir engu máli. Hafið það sem allra best í dag og ég vona að ég sjái ykkur í kvöld í veislunni hjá Óskari.
Knús. kossar og stór afmæliskveðja
Anna Dóra
P.s. til hamingju með daginn Maggi

Eins og þið sjáið er mikið um að ske
Anna Dóra
P.S. Til hamingju með daginn Guðrún

Svona lítur höfnin út meðan að á Sailinu stendur, fullt af skútum og hellingur af lífi, sölubásum, tónleikum og tívolí á hafnarbakkanum. 

Nú stendur Sailið sem hæst, allt á fullu. Gettu hvað Maggi, ég sá orrustuþotu flugsýninguna í dag sem við heyrðum bara í í fyrra. Frekar magnað hvað þeir geta gert á þessum þotum, mér fannst barasta eins og ég væri að horfa á Tom Cruise í Top Gun eða Charlie Sheen í Hot Shots........ það hefði kannski ekki verið verra ef þetta hefðu verið þeir c",)
Annars er allt gott að frétta, kæfandi hiti núna dag eftir dag en eins og Gloria Gaynor orðaði það svo eftirminnilega I will Survive.
Jæja ætla að skella mér aftur út í sólina
Sólarkveðjur
Anna Dóra

Í sól og sumaryl

Já nú hef ég á tilfinningunni að sumarið sé loksins að koma, það er alla vega sól og 25°C og kannski ríflega það í skjóli, og ég í fríi á morgun, erum að spá í að skella okkur á ströndina og fá okkur eins og eina smá dýfu í Eystrasaltið ef veður leyfir, ég ætla alla vega að sjá til hversu langt ég fer en mér heyrðist á Carro að hún verði að dýfa sér almennilega. Sailið byrjar líka á morgun, það er árlegur viðburður hérna, þá flykkist að fólk á seglsútum bæði alls staðar frá Svíþjóð og utan úr heimi og mikið líf á hafnarbakkanum, við  vorum reyndar búnar að lofa okkur í smá partý með kellum úr vinnunni á morgun því þær fara alltaf á hafnarbakkan fyrsta kvöldið og dansa við Black Jack alveg æðislegt dansband (við erum að tala um gömlu dansana eða þaðanaf verra, þetta er eins og í verstu B-myndunum þegar konurnar stilla sér upp og bíða eftir að verða boðið upp) en það verður gaman að fylgjast með þeim höstla einhverja gamla gubba upp á dansgólfið eða ragga eins og það heitir á sænskunni.
Jæja löngu kominn háttatími
Góða nótt, Anna Dóra

Þreytt en mjög ánægð eftir velheppnaða tónleika 
Já þá er velheppnaðri helgarferð lokið og ég komin heim aftur.  Ferðin byrjaði mjög vel á föstudeginum, Linda byrjaði á að sýna fram á hversu mikil ljóska hún er strax í flugrútunni á leiðinni fráArlanda þegar sessunautur hennar, erlendur karlmaður spurði hvaðan hún væri og hún sagðist vera sænsk og from the south, já frá Malmö spurði hann þá, "No the other South" svaraði Linda og ég og Carro grétum í sætinu fyrir aftan þau. Ekki nóg með þetta  því svo þegar við ætlum að taka lestina er ég spurð hvert ég ætli og ég heyrði ekki hvað hann sagði fyrir utan að vita ekki hvað það hét þar sem við vorum að fara þannig að ég lít á Carro til að fá að vita hvert við ætlum nú, jú jú þetta gekk og svo kom greyið Linda síðust og segir bara það sama og er þá spurð komið þið utan af LANDI, ég veit ekki hvað kom upp um okkur en við vorum greinilega dreifbýlistúttur á ferð um höfuðborgina. Tónleikarnir á laugardeginum voru meiriháttar, meira að segja fyrir mig sem er ekki sænsk, þessi hljómsveit Gyllende tider er greinilega fyrir þeim eins og Stuðmenn eru fyrir mig. Þetta voru 25 ára afmælistónleikar og voru hvorki fleiri en færri en 32.700 manns sem voru í Stadion með okkur. Versta var að maður fékk ekki að taka með sér vatnsflöskur inn á svæðið og svo vildi maður ekki vera að flakka og eiga á hættu á að týna stelpunum meðan að á tónleikunum stóð þannig að eftir 4 klst þegar við vorum að niðurlotum komnar af þreytuverk í fótum, og að líða yfir okkur af vökvaskorti en samt ánægðar með tónleikana var ákveðið að kaupa sér að drekka og kaupa miða í sæti á næstu tónleikum sem við förum á hvenær sem það verður. Á sunnudagskvöldinu fórum við svo í Gröna Lund tívolíið og skemmtum okkur stórkostlega vel, skellihlógum í rússíbananaum og vorum við það að pissa niður af hræðslu í draugahúsinu, hugsið einmitt hvað maður er vitlaus, maður borgar fyrir að láta hræða sig.......
Nóg í bili
Anna Dóra

Er ekki tæknin frábær

Fjárfesti fyrir helgina í vefmyndavél og er búin að vera að spjalla við fjölskylduna heima þvílík SNILLD segi ég bara þó svo að ég sé svona langt í burtu er ég samt svo nálægt þeim.
Annars er allt það besta að frétta héðan, er í fríi á morgun og þá er einmitt besta spáin fyrir vikuna heiðskýrt og 25° það er bara að vona að það haldi.
Fer svo með Caroline og Lindu A að hitta Söndru uppí Stokkhólmi um helgina, þar sem við fáum fría gistingu ákváðum við að leggja meira í ferðina og ætlum að fljúga en það var að opna lággjaldaflugfélag sem flýgur héðan upp til Stokkhólms (er reyndar að fara yfirum af stressi sá mynd af rellunni í blaðinu um daginn en það hlýtur að reddast) Við förum á föstudagskvöldi og komum tilbaka á mánudagskvöldi, ætlum á tónleika á laugardeginum og í Gröna Lund tívolíið á sunnudagskvöldinu, þess á milli ætlum við bara að leika okkur og sjá hvað við finnum okkur til skemmtunar.
Bið að heilsa í bili
Anna Dóra

Sumir dagar eru þannig að maður vildi eiginlega hafa sleppt því að fara á fætur. T.d. eins og dagurinn í dag. Við ákváðum semsagt stelpurnar að gera eitthvað annað í dag en að sitja heima og glápa á tærnar á okkur. Við pökkuðum niður  einnota grilli, kjöti og meðlæti og keyrðum út í eyjar. Allt í lagi með það, svo kveikjum við upp í grillinu og pappírinn bara fuðrar upp og ekkert meira gerist nei og meðan við erum að baksa við grillið kemur fullt af fólki og fer að fylgjast með okkur þannig að við bara helltum vatni yfir þetta ónýta grill, hentum því og keyrðum á næsta matsölustað, svo þegar ég átti að borga þá var ég ekki með nógan pening og ekki tóku þeir við korti og ég þurfti að leita uppi vinkonur mínar og fá lánaðan pening. Eins og þetta væri ekki nóg á einum degi, nei svo þegar ég kom heim ákvað ég að fara og kaupa mér vefmyndavél og þurrkgrind og vökva og tæma póstkassann fyrir Guðrúnu í leiðinni og fá lánaðan bíl til að koma græjunum heim, þar sem ég keyri í búðina sé ég að það fer að vanta bensín á bílinn og ákveð því að redda því og vill ekki betur en svo að dælan sem var frekar treg frussar allt í einu út bensíninu þannig að það skvettist á mig, fyrst ég var fyrir utan búðina ákveð ég bara að drífa mig inn og versla  og svo þegar ég stend við kassan (angandi eins og ég væri tilbúin að kveikja í sjálfri mér ef ég fengi ekki það sem ég vildi) spyr afgreiðsludaman "afsakið en finnurðu bensínlykt" ég sem vissi uppá mig skömmina varð nú að játa að bensínlyktin væri af mér, afgreiðsludömunni sem var nú frekar mikið skemmt en um leið létt því nú vissi hún að það var ekkert mikið um að ske og ekki þurfti að rýma búðina brosti bara til mín og rukkaði fyrir það sem ég var að kaupa.
Eins og ég segi sumir dagar eru þannig að maður hefði alveg eins getað sleppt því að fara á fætur.
Ein frekar niðurlægð
Anna Dóra

Spáið í því að vera opinber "eign", í dag á Viktoría krónprinsessa afmæli, er 27 ára (þvílíkt góð árgerð c",) og það er haldið upp á afmælið hennar opinberlega með risa tónleikum (sem væri í sjálfu sér ekki leiðinlegt) allt í lagi að halda upp á afmælið svona opinberlega þegar hún er 20, 25 o.s.frv. en á hverju ári hljómar svolítið mikið.
Annars er allt gott að frétta héðan, sólin lætur enn bíða eftir sér en vitur maður sagði að á sunnudag er fullt tungl og þá breytist þetta og viti menn að samkvæmt veðurfréttum kvöldsins þá er spáð batnandi veðri frá og með næsta sunnudegi=)
Bið að heilsa í bili
Anna Dóra

Skellti mér með Caroline á markað í Ronneby í dag, og við örkuðum um markaðinn og eyddum peningum þrátt fyrir hellidembu sem kom inná milli. Það er einhvern veginn gaman að rölta svona um markaði, það er ákveðin stemmning sem myndast og allir voða glaðir.
Besta fannst okkur eiginlega að labba á milli bása sem seldu stuttermaboli með hinum ýmsu áletrunum, þar gátum við staðið og grenjað úr hlátri. Rákumst m.a. á þessa "Að tala áður en maður hugsar er eins og að skeina sér áður en maður skítur" getið þið ímyndað ykkur að ganga um í svona bol.
Annars er planið bara að taka því rólega um helgina og hlaða batteríin fyrir komandi ferðalög, við erum að spá í að fara upp á Öland í næstu viku og svo ætlum við í helgarferð til Stokkhólms 23-26. júlí.
Munið að hugsa áður en þið talið
Anna Dóra

Varð óþægilega vör við það í gærkvöldi að ég er að eldast.
Ég kíkti aðeins út á lífið með stelpunum, við vorum að sýna einni sem býr i Stokkhólmi allt lífið sem er hér í Karlskrona en hvað er opið á miðvikudagskvöldum? Við byrjuðum nú bara svona eins og gengur rólega í heimahúsi og síðan var haldið niður í bæ. Flestir staðir voru nú reyndar hálftómir alla vega þeir með dansgólfi. Við leiddumst að lokum inn á stað sem heitir Piraten því þar átti að vera opið frameftir og svo ég vitni nú í vini Oh my God...... þeir sem ekki voru að nálgast tvítugt voru 40+ og það voru kannski 4, mér leið eins og ég væri gamalmenni (kannski ekki nógu drukkin en mér fannst þetta minna mig á diskóin sem ég sótti á Spáni'99 svona eitthvað týpískt til að halda opnu fyrir unga fólkið sem er í sumarfríi) þannig að ég hefði fílað þennan stað í ræmur ef ég hefði verið nokkrum árum yngri og það sem var verst var að þeir spiluðu alveg geggjaða tónlist svona ekta til að dansa við. Þó svo að maður sjái að maður eldist þegar vinir eignast börn,gifta sig, litlu frændsystkin og litla systir séu að fá bílpróf þá er það einhvern veginn eðlilegra en að vera með þeim elstu á skemmtistað það er eitthvað sem ég hef ekki lent í áður og vona að sé langt í að það gerist aftur.
Nei þá segi ég bara Lifi Schlagerbarinn...........
Kveðja
Anna Dóra

Svona á ég erfiða fjölskyldu 

Er hægt að vera kvikindislegri en að senda manneskju sem býr erlendis mynd af íslensku lambakjöti á grillinu =(
Annars er allt gott að frétta, er að skipuleggja ferðalag með stelpunum hvort sem það verður Stokkhólmur, Malmö eða Köben kemur allt í ljós.
Kveðja í bili
Anna Dóra

Hér er svo eg og Linda A 

Við kíktum aðeins út á lífið í gær, skemmtum okkur að sjálfsögðu mjög vel og fórum hvert annað en á Schlagerbarinn. Ákvað að prófa photobloggið með því að skella inn myndum af okkur frá því í gærkvöldi.
Kveðja
Anna Dóra

Þetta er Caroline vinkona mín nú getið þið tengt andlit við nafnið 

Smá hugleiðing
Í vinnunni í gær vorum við að flétta gömlu séð og heyrt blaði þar sem sænski kylfingurinn Jesper Parnevik bauð lesendum heim sem er svo sem ekki í frásögur færandi nema fyrir það að húsið hans er á 3 hæðum og hver hæð 600 m2, bara rúmið hans er 10 m2 og vegna þess hve hann ferðast mikið er lyfta fyrir ferðatöskur úr svefnherberginu niður í anddyrið. Ég fór einmitt að hugsa hvort ég hefði valið mér rangan starfsferil, hefði maður frekar átt að reyna við eitthvað annað, nei ég held ekki ég er svo ánægð með það sem ég hef, himinlifandi á mínum 50m2, finnst gaman að mæta í vinnuna, hvað annað þarf maður. Þessi aumingja maður þarf viku til að ganga um allt húsið sitt og gps-staðsetningartæki til að finna frúna í rúminu.
Hvð finnst ykkur?
Anna Dóra í skrýtnum hugleiðingum